زانكۆیا دھۆك و پەیمانگەھا سیاسەتا جیھانی IWP ب فەرمیكرنا ھەڤكاریا ئەكادیمی رابوون ب رێكا ئیمزاكرنا گرێبەستەكێ بۆ ئامادەكرنا بەرنامەیەكێ نمرەیێن ھەڤپشك د بوارێ دیپلۆماسی دا. ئەڤ پێنگاڤا گرنگ و مێژوویی كو ب پێنگاڤەكا مەزن د پێشڤەبرنا ھەڤكاریا ئەكادیمی یا ناڤدەولەتی دھێتە ھژمارتن، ئەڤرۆ 4ـی خزیرانێ 2024 ل سەنتەرێ پەیمانگەھا سیاسەتا جیھانی IWP ل واشنتون پایتەختێ ویلایەتێن ئێكگرتی یێن ئەمریكا ھاتە ئەنجامدان.
د ڤێ ھەلكەڤتێ دا ل دەستپێكێ پەیڤەك ژ لایێ سەرۆكێ پەیمانگەھا سیاسەتا جیھانی IWP و ل دویڤ دا پەیڤەك ژ لایێ تریفە عەزیز، نوینەرا حكومەتا ھەرێما كوردستانێ ڤە ھاتە پێشكێشكرن، دیسان د. داود سلێمان ئەتروشی، سەرۆكێ زانكۆیا دھۆك پەیڤا خۆ پێشكێشكر، ل دویڤ دا ئیمزا ل سەر گرێبەستی ژ لایێ سەرۆكێ زانكۆیا دھۆك و سەرۆكێ پەیمانگەھا سیاسەتا جیھانی IWP ھاتە كرن. ل دویڤ گرێبەستا ھەڤپشكیێ بەرنامەیەكێ خواندنێ بۆ ماوێ سالەكێ ل كولیژا زانستێن سیاسی ل زانكۆیا دھۆك دێ ھێتە بەرھەڤكرن، كو دەلیڤا خواندنێ ل پەیمانگەھا سیاسەتا جیھانی IWP ب قوتابیێن زانكۆیا دھۆك دھێتە دان یانژی پشكداریكرن د وانەیان یێن پەیمانگەھا IWP پێشكێشدكەت دا ب رێكا ئونلاین.
بەرنامێ نمرا ھەڤپشك یێ نوی پەرەپێدانا شیانێن ئەكادیمی و پیشەیی یێن قوتابیا د بوارێ دیپلۆماسی دا ددەت، ھەروەسا بۆ پیشەیێن كاریگەر د پەیوەندیێن ناڤدەولەتی دا بەرھەڤدكەت. ھەڤكاریا د ناڤبەرا زانكۆیا دھۆك و پەیمانگەھا سیاسەتا جیھانی IWP پێشڤەچوونەكا مەزنە د بوارێ ھەڤكاریا ئەكادیمی و فێركرنا ناڤدەولەتی، كو مفای دێ گەھینیتە قوتابی و مامۆستایێن ھەردوو لایەنا.
ئەڤ پێنگاڤە تەكەزێ ل سەر پێگیریا زانكۆیا و پەیمانگەھا سیاسەتا جیھانی IWP دكەت بۆ پەرەپێدانا لێكتێگەھشتن و ھەڤكاریا زێدەتر د بوارێ دیپلۆماسی دا، ھەروەسا دھێتە پێشبینیكرن كو ئەڤ ھەڤپشكیە مفایێن مەزن بۆ جڤاكێ ئەكادیمی بدەستڤەبینیت و پشكداریێ د پێشئێخستنا سەركردێن پاشەرۆژێ د پەیوەندیێن ناڤدەولەتی دا بكەت.
ئیمزاكرنا سەركەڤتیانە بۆ ئەڤێ رێككەڤتنێ پێداگیریا زانكۆیا دھۆك دیاردركەت بۆ بەرزكرنا ئاستێ خواندنا بلند و پەرەپێدانا ھەڤپشكیێن ئەكایمی یێن ناڤدەولەتی، ئەڤ ھەڤكاریا مێژویی رێخۆشكەرە بۆ پێشڤەچوونا فێركرنێ و ھەڤكاریا جیھانی د پاشەرۆژێ دا.
راگەھاندنا زانكۆیا دھۆك؛ 4ـی خزیرانێ 2024
عسمەت خابوور و ماھر طاھر كێستەیی