د چارچۆڤێ پرۆژێ (پشتەڤانیا پێرابوونێن کەلتۆریێن رەسەن ل دەشتا نەینەوا)، ئەوێ زانکۆیا دهۆک ب هەڤکاری ل گەل رێکخراوا USAID ئەنجامددەت و ب مەرەما هەلسەنگاندنا بجهئینانا پرۆژێ ناڤبری، ل ١٤ـی شوباتێ ٢٠٢٣ ل سەنتەرێ رەوشەنبیری و جڤاکیێ زانکۆیا دهۆک، روینشتەکا تایبەت ل دۆر هشیاری و بەرپرسیاریێ هاتە ئەنجامدان.
د ڤێ روینشتنێ دا و ب ئامادەبوونا د. لقمان هادی حەسەن و د. نەبەز ئیبراهیم محەمەد هاریکارێن سەرۆکێ زانکۆیا دهۆک و د. رەند حەمۆدی، رێڤەبەرا ئۆفیسا پەیوەندیێن نێڤدەولەتی ل زانکۆیا دهۆک و نوینەرێن پێکهاتێن جودایێن دەشتا نەینەوا و هژمارەکا مامۆستایێن زانکۆیا دهۆک و نوینەرێن سازیێن حکومی ل دەڤەرێ، دانوستاندن ل دۆر کەتوار و دەرئەنجامێن پرۆژە گەهشتیێ و چەوانیا بەزاندنا بەربەستا و گەهشتن ب ئارمانجێن پلان بۆ دانای هاتنە ئەنجامدان.
ل دەستپێكێ د. لقمان ھادی حسن د پەیڤەکێ دا باس ل ساخكرنا پێرابوونێن كەلتۆری کر و دیارکر "ئەڤ پرۆژێ مەزن بۆ خزمەتكرنا ھەمی پێكھاتێن دەشتا نەینەوا كاردكەت. ھەڤگرتنا جڤاكی د ناڤبەرا ھەمی پێكھاتان دا پشكەكە ژ ڤی پرۆژەی. ھیڤیخوازین ئەڤ روینشتنە ببیتە پێنگاڤا ئێكێ بۆ ڤەدیتنا ھۆكارێن ئەرێنی یێن دناڤبەرا پێكھاتێن قەزا تلكێفێ دا، ئەم وەك زانكۆیا دھۆك دێ ھەولا پەیداكرنا چارەسەرییان و پێشكێشكرنا خزمەتان بۆ ئاكنجیێن قەزا تلكێفێ دەین".
دیسان د. نەشوان شەوكەت بەرپرسێ ھەماھەنگیا پرۆژێ ناڤبری ئارمانجێن پرۆژەی بۆ ئامادەبوویان دیاركرن و گۆت "مە ب ھەڤكاری ل گەل رێكخراوا USAID ھەمی ھەولێن خۆ بۆ جێبەجێكرنا ئەڤی پرۆژەی بۆ خزمەتكرنا خەلكێ دەشتا نەینەوا مەزاختینە. پرۆژە وەكو پەیوەندیەكێ یە دناڤبەرا كەلتۆری و بوارێ چاندنێ دا، ئەڤ پرۆژە ھەولا دانەنیاسینا ژێدەرێن چاندنێ یێن خودان بوھایێ كەلتۆری ددەت، ھەروەسا كاریگەریا رێكخراوا تیرۆرستا داعش ل سەر دەڤەرێ و بكارخستنا خەلكێ دەڤەرێ بۆ دووبارە ساخكرنا بەرھەمئینانێ و پەرەپێدانا پێكڤەژیانێ پشتی ئازادبوونا دەڤەرێ".
هەر د ڤێ د روینشتنێ دا د. عومران عەلی عومەر و د. نزار ئەمین محەمەد داتا و ئەنجامێن ڤەكۆلینا خۆ، ئەوا ل دۆر بوارێ چاندنێ ل دەڤەرێ ھاتیە ئەنجامدان، دانە دیاركرن. ڤەکۆلینێ دیاركریە كو نەبوونا پالپشتیا حكومی بۆ جۆتیاران و كێمیا بارانبارینێ بووینە ئەگەرێ كیمیا ھێزا كاری و پشتگوھئێخستنا ھزارا دارێن كرۆم و زەیتونا ل دەڤەرێ. د. نزار ئەمین ئەوژی دیارکر "خۆشبەختانە بۆ مە دیاربوو كو پشتی ئازادبوونا دەڤەرێ ژ رێكخراوا تیرۆرستیا داعش، خەلكێ دەڤەرێ ب سەر بەربەستا زالبوویە و كارلێكا جڤاكی بھێزتر كەڤتیە".
ژ لایێ خۆ ڤە عەدنان یووسف پەیڤەک ل دۆر پێكڤەژیانێ ل دەڤەرێ پێشكێشكر. ل دویڤ دا تیما زانكۆیا دھۆك ل گەل شاندێ تلكێف كەڤتنە د گەنگەشەكا ڤەكری دا، بۆ پشكداریكرنا سەربۆر و ئەنجامێن پرۆژەی و دیاركرنا وان پێنگاڤێن پێدڤیە ل قەزا تلكێف بھێنە ئەنجامدان بۆ بھێزكرنا ئێكگرتنا جڤاكی د ناڤبەرا پێكھاتێن دەڤەرێ دا.
ژ لایێ خۆ ڤە ئایە ھاشم سەعید ئێك ژ پشكدارێن روینشتنێ خویاکر "یا فەرە باوەری د ناڤبەرا ھەمی لایەنان دا ھەبیت. ئەم وەك چالاكڤان ھەولا پەیداكرنا باوەریێ و بھێزكرنا پەیوەندیا بۆ ئاڤاكرنا جڤاكەكێ ساخلەمتر ددەین.
ھەژی ئاماژەپێدانێ یە، ئەڤ پرۆژە ھەمی پێكھاتێن دەشتا نەینەوا ل قەزا تلكێف و ناحیا بەعشیقە و قەزا حەمدانیە بخۆڤەدگریت. د پلاندایە د داھاتیەكێ نێزیك دا روینشتنەكا دی بۆ گەنگەشەكا ڤەكری ل گەل سەركردێن جڤاكی یێن قەزا حەمدانیە بھێتە رێكخستن.
راگەھاندنا زانكۆیا دھۆ؛ 14ـی شوبات 2023
ماھر كێستەیی