ل رۆژا ٦ـی گولانێ ٢٠٢٤، ل هۆلا پێشمەرگە، ناڤەندا قوتابیان ل زانکۆیا دهۆك ب ئامادەبوونا د. داود سلێمان، سەرۆکێ زانکۆیا دهۆك و ئانۆ جەوهەر، وەزیرێ ڤەگوهاستن و گەهاندنێ ل حکومەتا هەرێما کوردستانێ و هژمارەکا راگر و مامۆستا و قوتابیێن زانکۆیا دهۆک و بەرپرسێن حزبی و حکومی، سمینارەك ل دۆر کاریگەریا بریارێن دادگەها فیدرال ل سەر رەوشا کێم نەتەوا و پێکڤەژیانێ ل هەرێما کوردستانێ هاتە ئەنجامدان.
ل دەستپێکێ، د. داود سلێمان ئەتروشی، سەرۆکێ زانکۆیا دهۆك بخێرهاتنا هەمى ئامادەبوویان کر و باس ل رەوشا سیاسیا عیراق و کوردستانێ ب تایبەتی کر و دیارکر:" بریارێن ئەڤێ دووماهیێ یێن دادگەها فیدڕال، کوردستان ئێخستیە د ڕەوش و پاشەروژەکا نەدیار دا." هەروەسا ژ بریارێن هاتینە دان، راگرتنا کورسیێن کێم نەتەوانە ل کوردستانێ کو ئەڤە زۆلمەکە ل کێم نەتەوان و کوردستانێ هەمیێ دهێتە کرن.
د. هەوار خەلیل، راگرێ کۆلیژا زانستێن سیاسی دیارکر؛ ئەڤ سمینارە هاتیە رێکخستن ل دۆر بریارێن دادگەها فیدرال یێن کو نە د بەرژەوەندیا پێکهاتەیان دا یه. وەزیرێ ڤەگوهاستن و گەهاندنێ ل هەرێمێ وەك ئەندامەکێ پێکهاتەیا كریستیان ل هەرێما کوردستانێ پشکدارە تەكەز ل وێ چەندێ كر کو داخوازیێن پێکهاتەیان بهێنە دیاركرن ژبەرکو بریارێن دادگەها فیدرال نە د چوارچۆڤێ یاسایی و دەستووری دا بوون و ئەو د ئەوێ باوەرێ دا نە کو پێداچوون د بریارێن دادگەها فیدرال دا بهێنە کرن. و دیسان دیار كر کلتوورێ کوردان و حکومرانیا هەرێما کوردستانێ دەرگەهەك بۆ پێکهاتەیان ڤەکریە کو ل هەرێما کوردستانێ د ئارام بن.
ئانۆ جەوهەر، وەزیرێ ڤەگوهاستن و گەهاندنێ ل هەرێما کوردستانێ راگەهاند: "راستیا پێکڤەژیانێ ل باژێران نینە، بەلکو دڤێت ل گوندان پێکڤەژیان بهێتە پیڤان ژبەرکو پەیوەندیێن گوندا د راست و سروشتی نە، پەیوەندیێن پێکهاتەیان ل گوندان باشترن کو ل پارێزگەها دهۆکێ گەلەك گوند هەنە موسلمان و کریستیان پێکڤە دژین." ئانۆ جەوهەر گۆت ژی:"بریارێن دادگەها فیدرال، دڤێن قەوارەیێ هەرێما کوردستان بهێنە لاوازکرن و بەرەڤ نەمانێ ببەن و ئێك ژ خالا بهێز یا هەرێما کوردستانێ، پێکڤەژیانا نەتەوەیانە و دادگەها فیدرال دڤێت ئەڤ پێکڤەژیانە نەمینیت و بریارێن دادگەهێ نەدەستووری نە و پێچەوانەیی دوو برگەیێن دەستوورێ عیراقێ نە، ماددێ ٤٩ و ماددێ ١٢٥ ژ دەستوورێ عیراقێ و کورسیێن کوتا یێن پەرلەمانی مافەکێ زێدەتر ژ ٣٠ سالا یێ هەرێما کوردستانێ یە".
دهێتە زانین؛ دادگەها فیدرال چەند بریار ل دژی هەرێما کوردستانێ داینە و ئێک ژ وان بریارا راگرتنا کورسیێن پێکهاتەیان ل پەرلەمانێ کوردستانێ یە، لەوڕا زانکۆیا دهۆك ب فەر دیت وەزیرێ ڤەگوهاستن و گەهاندنێ ل حکومەتا هەرێمێ وەك نوینەرێ پێکهاتەیان پشکداری سمینارەکێ بکەت ل دۆر بریارێن دادگەها فیدرال.
راگەهاندنا زانکۆیا دهۆك؛ ٦ـی گولانێ ٢٠٢٤
تەڤژین الیاس
فۆتۆ: عەلی بانکی