ئەڤرو روژا پێنجشەمبی ل رێکەفتی ٢٠٢١/٣/١١ ل سەنتەرێ ڤەکولینێن جینوسایدێ - زانکویا دهوك چالاکیەك ل ژێر ناڤێ "کەسێ گوهلێنینە: جیهانا ئاشوپ" هاتە ئەنجامدان ژ دەمژمێر ٩ سپێدێ هەتا ٥ ئێڤاری. ئەڤ چالاکیە هاتبوو رێکخستن ژلایێ سەنتەرێ ڤەکولینێن جینوسایدێ - زانکویا دهوك، زانکویا پولیتەکنیك - سلێمانی، رێکخراوا یەزدا، رێکخراوا کوچبەریا نێڤ دەولەتی، تورا نەهرەین، و ئاژانسا ئەمریکی یا گەشەپێدانا نێڤ دەولەتی. د ئەڤێ چالاکیێ دا دەرفەت بو ١٥ بەشداربویان ژ قوتابیێن بەشێ سیاسەتا گشتی و ستافێ سەنتەرێ خواندنێن جینوسایدێ چێبوو رویدانێن جینوسایدا ئێزدیان بتایبەت رویدانێن گوندێ کوچو ببینن ب کارئینانا ئامیرێ تەکنولوژی ب سێ بوچوون یان دیتنێن جیاواز (زاروکەكێ ئێزدی، کچەکا ئێزدی یا قورتال بوی، و چەکدارەکێ داعش). ل دویفدا چەندین پسیار هاتنە بەرسڤدان ژلایێ بەشداربوویان ڤە دەربارەی ئەو سەربورا وەرگرتی ژ ئەڤێ چالاکیێ. مەرەم ژ ئەڤێ چالاکیێ بهێزکرنا پرەنسیپێن پێکڤەژیانێ و ئازادیا ئایینی و یەکسانیێ د کومەڵگەهێ دا، و دانەنیاسینا تاوانێن دگەل قوربانیێن ئێزدییان ژلایێ تیرورستێن داعشێ هاتینەکرین دا ئەڤ جورە تاوانە دوبارە نەبن.