روینشتنه‌كا ڤه‌كرى ل ناڤبه‌را رێڤه‌به‌ریا راگه‌هاندنێ و راگه‌هاندنكارێن هه‌مى كۆلیژ و سه‌نته‌رێن زانكۆیا دهۆك هاته ئه‌نجامدان
رێڤه‌به‌ریا راگه‌هاندنا زانكۆیا دهۆك ل رۆژا 30/1/2018 كۆمبوونه‌ك ل گه‌ل راگه‌هاندنكارێن هه‌مى كۆلیژ و سه‌نته‌رێن زانكۆیا دهۆك ل سه‌ه‌نته‌رێ ره‌وشه‌نبیرى و جڤاكى یێ زانكۆیا دهۆك گرێدا.
د ڤێ كۆمبوونێ دا كو هاریكارێ سه‌رۆكێ زانكۆیا دهۆك بۆ كاروبارێن كارگێرى و دارایى د. حه‌جى موسا تێدا یێ به‌رهه‌ڤ بوو ل ده‌ستپێكێ پرێزنتێشنه‌ك ل دۆر كارێ رێڤه‌به‌ریا راگه‌هاندنێ و هه‌روه‌سا كار و ئه‌ركێ راگه‌هاندنا كۆلیژ و سه‌نته‌ران هاته پێشكێش كرن، ژلایێ خۆڤه ژى د. حه‌جى موسا د په‌یڤه‌كى دا به‌حسێ رۆلێ راگه‌هاندنێ كر ل دیاركرنا كار و چالاكیێن ل زانكۆیێ دهێنه ئه‌نجامدان.
ئه‌ڤ روینشتنه بۆ پتر هه‌ماهه‌نگیێ بۆ د ناڤبه‌را رێڤه‌به‌ریا راگه‌هاندنێ و راگه‌هاندنا كۆلیژ و سه‌نته‌رێن زانكۆیێ و د دانوستاندنه‌كا ڤه‌كرى دا راگه‌هاندنكاران گازنده و ئاریشێن خۆ گه‌هاندنه هاریكارێ سه‌رۆكێ زانكۆیا دهۆك بۆ كاروبارێن كارگێرى و دارایى د. حه‌جى موسا و هه‌روه‌سا بێوار موسا رێڤه‌به‌رێ راگه‌هاندنێ و ب هویرى ل سه‌ر كێماسیێن راگه‌هاندنێ راوه‌ستیان و د. حه‌جى دیاركر كو یا دشیان دابیت بۆ راگه‌هاندنا زانكۆیێ دێ هێته كرن داكو بشێن ئه‌ركێ خۆ بێى كێماسى ئه‌نجام بده‌ن، رێڤه‌به‌رێ راگه‌هاندنا زانكۆیێ ژى سوپاسیا دكتۆرى كر بۆ خه‌مخۆریا وى و دویفچوونا وى ل كارێ راگه‌هاندنێ و دیاركر كو ب پشته‌ڤانیا وان دێ شێن كارێن باشتر و به‌رهه‌مدارتر ل زانكۆیێ ئه‌نجام ده‌ن.