ب بەرهەفبوونا سەرۆكێ زانكۆیا دهۆك پ.د. مسلح محەمەد سەعید دهوكی و قایممقامێ قەزا شێخان سەردار یەحیا عەبدالعزیز و كومەكا سیاستمەدار و جالاكڤانێن مەدنێ، روونشتنەكا ڤەكری ژلایێ سەنتەرێ خواندنێن ئاشتیێ و جارەسەركرنا ململانێ ل زانكۆیا دهۆك ل هولا 2 یا سەنتەرێ رەوشەنبیری و جڤاكی ل زانكۆیێ هاتە پرێڤەبرن لسەر "هەڤگرتنا جڤاكی دناڤبەرا ئاوارە و جڤاكێ میهڤاندار ل قەزا شێخان".
پ.د. مسلح محەمەد سەعید دهۆكی سەرۆكێ زانكۆیا دهۆك گۆت: ڤێ روونشتنی گرنگیەكا هەرە مەزن هەیە كۆ شەرێ دژی تیرۆرێ بەردەوامە سەرارایی سەركەفتنێن پێشمەرگەیێ كوردستانێ ب سەركردایەتیا سەرۆك (مەسعود بارزانی) تۆماركرین، لەوا بڤێ سەروەریێ ئەم ل كوردستانێ كار دكەین بۆ بهێزكرنا پێكڤە ژیانێ و هەڤگرتنا جڤاكی دناڤا هەموو لایەن و نەتەوە و ئایناندا.
سەرۆكێ زانكۆیا دهۆك گۆت ژی: زانكۆیا دهۆك چەندین پرۆژەیێن دیتر بۆ هەمان بابەت هەنە، جونكە ڤی بابەتێ گرنگیەكا هەرە مەزن بۆ جڤاكێ مە هەیە و ئەڤێ راپرسیێ چەندین لایەنێن هەستیار دیار و دەست نیشان كرینە، لەوا ئەم پێدڤی پێداچوو و رێكێن زانستی نە بۆ بهێزكرن پەیوەندیان.
قایممقامێ قەزا شێخان سەردار یەحیا گۆت:ئەز دەست خۆشیێ ل زانكۆیا دهۆك دكەم بۆ هەلسەنگاندنا زانستی یا ژلایێ وان ڤە بۆ جڤاكێ دەڤەرا شێخان هاتیەكرن، كۆ ب سەرۆكایەتی سەرۆك مەسعود بارزانی كار بۆ پێكڤە ژیانێ ل هەرێما كوردستانێ و ب تایبەت دەڤەرا شێخان دئێتەكرن، كۆ ژ كەفندا دۆژمنی هەولا هندێ دكەت كۆ پێكڤە ژیانێ لدەڤەرێ لاواز بكەت، بەلێ حكومەتا هەرێما كوردستانێ رێگری ل پێشلكرنا هەر كارەكی كریە كۆ پێكڤە ژیانێ ل هەرێما كوردستانێ تێكبدەت.
قایممقامێ قەزا شێخان گۆت ژی: دشەرێ دژی تیرۆرێ دا ئاوارە هاتنە كوردستانێ و ب تایبەت دەڤەرا شێخان، لێ پێكڤە ژیان هاتنە پاراستن و تا پێشمەرگەیی قەهرەمان دەڤەرێن داگیركری ئازادكرین و نوكە ژی هەمی تائیفە و ئایین رێ و رەسمێن خۆیێن ئاینی ب ئازادینە دگێرن و هەمی لایەن پشكدار دبن.
دهەمان دەمدا كورتیەك لسەر راپورت و راپرسیا تیمێ سەنتەرێ خواندنێن ئاشتیێ و جارەسەركرنا ململانێ لدۆر هەڤگرتنا جڤاكی ل شێخان ژلایێ مامۆستایێ زانكۆیێ خدر دوملی ڤە هاتە بەحسكرن.
ل دووماهیێ ژی دان و ستاندن لسەر بابەتی هاتە كرن و پێشنیارێن پشكدار بوویان هاتنە وەرگرتن.
راگەهاندنا زانكۆیا دهۆك: هەلز عەلی سەلیم