ب بەرهەڤببونا د. ئیسماعیل بێشكچی و سەرۆكێ زانكۆیا دهۆك و مامۆستا و چەندین قۆتابیان، لژێر چاڤدێریا سەرۆكێ زانكۆیا دهۆك (پ.د. مسلح محەمەد سەعید دهۆكی) سەنتەرێ بێشكچی بۆ ڤەكۆلینێن مرۆڤایەتی رابوو ب ئەنجامدانا كورەكی بناڤ و نیشانێ (بێشكچی و نڤیسنێن وی لدۆر دۆزا كوردی)، كۆ سێ پەنەل بخۆڤە دگرتن ئەو ژی (ئیسماعیل بێشكچی ژیان و بەرهەم)ژلایێ م. خالد سادینی ڤە هاتە پێشكشكرن، دیسان (نڤیسنێن بێشكچی و دۆزا مللەتێ كوردستانا باكور، سیستەمێ حۆكمرانیێ ل ئەنادولا رۆژهەلات وەك نموونە) ژلایێ د. عبدالفتاح بوتانی ڤە هاتە گۆتن، تەوەرێ دووماهیێ لسەر (بێشكچی و پارتا كرێكارێن كوردستانێ) ژلایێ م. ئیبراهیم مەحموود ڤە هاتە گۆتن.
لدەسپێكێ سەرۆكێ زانكۆیا دهۆك پ.د. مسلح دهۆكی گۆت: زانكۆیا دهۆك یا شانازە ب مێهڤانداریا كەسایەتیا ناڤەدار (د. ئیسماعیل بێشكچی)، كەسایەتیەكا نیزیكی مللەتێ كورد و شارەزاییەكا پر لسەر دیرۆك و كەلتورێ مللەتێ مە هەیی، دڤێت رێزگرتن ل خەبات و مەندیبوونا وی بهێتە گرتن.
سەرۆكێ زانكۆیا دهۆك گۆت ژی: بێشكچی ب خام و ب بۆچوونێن خویێن زێرین پەیاما ئاشتیێ ل رۆژهەلاتا ناڤین بەلاڤ كریە، لەوا ئەڤرۆ خزمەتكرنا وی ئەركێ مەیە.
د. نەشوان شكری رێڤەبەرێ سەنتەرێ بیشكچی ل زانكۆیا دهۆك گۆت: ئەڤ چالاكیە لسەر ژیان و بەرهەمێ د.ئیسماعیل بیشكچی یە، كۆ ڤی بیرمەندێ ب رەگەز تورك ب چەندین سالا بەرەڤانی ژ دۆزا مللەتێ كورد كریە و نیزیكی 37 پەرتۆكا لسەر مللەتێ كورد نڤیسینە و باوەرم كێم نڤیسەرێن كورد شیا بێن ڤێ خزمەتێ بكەن، لەوا مە ژی حەز كر بیشكچی بۆ خەلكێ خو بدەینە نیاسین.
د. نەشوان شكری گۆت ژی: سەنتەرێ مە ب هەماهەنگەهی دگەل رێڤەبەریا پێزانین و زانیاریان ل دهۆكێ، رابووینە ناڤكرنا جادەیەكێ ب ناڤێ بیشكچی، ل پرۆژەیێن داهاتی مە لبەرە هەمی پەرتۆكێن وی وەرگرین بۆ زمانێ كوردی و عەرەبی.
د. عبدالفتاح بوتانی مامۆستایێ زانكۆیا دهۆك لدۆر پێشكشكرنا سمینارا خو گۆت: ئەڤ سمینارە لسەر پەرتۆكەكا د. ئیسماعیل بێشكجی یە، كۆ ئەڤ پەرتۆكە ژ 300 لاپەران پێك دئێت و تێدا بەحسی 18 ولایەتێن كوردستانێ دكەت ژلایێ ئابۆری و كومەلایەتی و سیاسی و رامیاری ڤە.
راگەهاندنا زانكۆیا دهۆك: هەلز عەلی سەلیم