زانكۆیا دھۆك پێنگاڤەكا ناوازەبە بەرەڤ پێشكەڤتن و گەشەكرنا پارێزگەھا دھۆكێ و ھەرێما كوردستانا عیراقێ، ب درێژاھیا ٣١ سالا زانكۆیا دھۆك سەلماندیە كو ناڤەندەكا پەروەردەیی و پێشەنگە و ب شێوەیەكێ كاریگەر پشكداری د ئاڤاكرن و گەشەپێدانا دەڤەرێ دا كریە. دەرچوونا پتری ٥٤ ھزار قوتابیا د ماوێ د ٣١ سالێن خەباتا بەردەوام د گورەپانا فێركرنێ دا رەنگڤەدانا پابەندبوونا بھێزە رۆلێ گرنگ یێ زانكۆیا د گەھشتن ب ئارمانجێن فێركرن و ئاڤاكرنا تاكێن جڤاك دھۆك نیشان ددەت.
ل رۆژا دووشەمبی رێكەڤتی ٦ـی چریا دووێ ٢٠٢٣، زانكۆیا دھۆك د رێورەسمەكێ ژ ھەژی دا، ئاھەنگا دەرچوونێ بۆ قوتابیێن گەرا ٢٨ـێ یا سالا خواندنێ ٢٠٢٢ – ٢٠٢٣ گێرا. ئەڤ ھەلكەڤتە ب ئامادەبوونا سەرۆكێ حكومەتا ھەرێما كوردستانێ رێزدار مەسرور بارزانی و نوینەرێ ھەرێما كوردستانێ، دلشاد شەھاب و وەزیرێن حكومەتا ھەرێما كوردستانێ و ئەندامێن پەرلەمانێ و بەرپرس و نوینەرێن سازیێن حزبی و حكومی و سەرۆكێن زانكۆیێن كوردستانێ مالبات و كەسوكارێن دەرچوویا و ستافێ زانكۆیا دھۆك ھاتە ئەنجامدان.
ل دەستپێكێ پەیڤەك ژ لایێ پارێزگارێ دھۆكێ ڤە ھاتە پێشكێشكرن، ناڤبری د پەیڤا خۆدا ئاماژە ب رۆلێ گرنگێ زانكۆیا دھۆك پێشڤەبرنا پرۆسێسا فێركرنێ ل پارێزگەھا دھۆكێ دا و دیاركر كو زانكۆیا دھۆك سەرەكانیا ھەمی زانكۆیێن دی یێن پارێزگەھا دھۆكێ یە كو ب خۆشحالیڤە د نوكەدا پارێزگەھا دھۆكێ خودان حەفت زانكۆیە.
ل دویڤ دا، سەرۆكێ زانكۆیا دھۆك د. داود سلێمان ئەتروشی پەیڤەك پێشكێشكر، د پەیڤا خۆدا پیرۆزباھی ل قوتابیێن دەرچوویێن گەرا ٢٨ـێ كر و ئەڤ رۆژە ب گەھشتن ب وێستگەھەكا نوی ژ ژیانا قوتابیا ھەژمارت، كو دێ بنە تاكێن كارا و ئاڤاكەر د جڤاكی دا. دیسان سەرۆكێ زانكۆیێ داخاز ژ دەرچوویا كر ھەمی ئامرازێن بەردەست بكاربینن بۆ زێدەكرنا شیانێن خۆ ب تایبەتی تەكنۆلۆژیایێ ژبەركو فێربوون و ب دەستڤەئینانا زانینێ پرۆسێسەكا بەردەوامە و ب دویماھی ھاتنا قوناغا زانكۆیێ ب دویماھی ناھێت.
دیسان سەرۆكێ زانكۆیێ ئاماژە ب دەستكەڤتێن زانكۆیا دھۆك دا ب تایبەتی د سالا بووری دا كو دانانا پلانا ستراتیژی یا زانكۆیا دھۆك ئێك ژ ئەوان دەستكەڤتێن گرنگ بوو كو پێنگاڤەكا بێ وینەیە دناڤ زانكۆیێن ھەرێما كوردستانێ دا. ل دویماھیێ ژی سەرۆكێ زانكۆیێ سوپاسیا ھەر كەس و لایەنەكێ كر یێ ھاریكار و پشكدر د بەردەوامیدان ب پرۆسێسا فێركرنێ و پەرەپێدانا زانست و زانینێ دا دیسان ھیڤیا سەركەڤتنێ بۆ ھەمی دەرچوویا خواست.
ل دویڤ دا پەیڤەك ژ لایێ سەرۆكێ حكومەتا ھەرێما كوردستانێ، رێزدار مەسرور بارزانی ڤە ھاتە پێشكێشكرن، د پەیڤا خۆدا سەرۆكێ حكومەتێ پیرۆزباھی ل قوتابیا كر و ھیڤی خواست قوتابیێن دەرچووی د پاشەرۆژێ دا ببنە كەسێن زانا و دانا و داھێنەر كو خزمەتا گەل و وەلاتێ خۆ بكەن ب رەنگەكی كو مللەت ھەمی شانازیێ پێ بكەت. د بەردەوامیا پەیڤا خۆ دا سەرۆكێ حكومەتا ھەرێما كوردستانێ گوت "زانكۆیا دھۆك د بارودۆخەكێ سەخت دا ھاتیە دامەزراندن و ب خۆ راگری و ماندی بوونا مامۆستایێن ڤێ زانكۆیێ شیایە رۆژ ب رۆژ بەرەڤ پێشڤە بچیت، جھێ خۆشحالیێ یە كو ئەڤرۆ زانكۆیا دھۆك ئێكە ژ زانكۆیێن گرنگ و باش ل ھەرێما كوردستانێ كو ھەتا نوكە ب ھزارا دەرچوویێن وێ ھەنە، كو پشكەك ژ وان كادر و رێڤەبەر و بەرپرسێن بەرچاڤن و د بیاڤێن جودا دا خزمەتێ دكەن". ل دویڤ دا رێزدار مەسرور بارزانی ئاماژە ب رەوشا دەڤەرێ و رۆژھەلاتا ناڤین و پێشھاتێن ھەرێمی دا و داخازا چارەسەركرنا ئالوزیا ب رێكێن ئاشتیانە كر، دیسان باس ل پەیوەندیێن د ناڤبەرا ھەرێما كوردستانێ و حكومەتا فیدرالا عیراقێ كر و دیاركر كو ھەولێن رژد ئەنجامداینە داكو ئاریشێن دناڤبەرا ھەولێر و بەغدا چارەسەر ببن و دیاركر كو دەست ژ مافێن رەوا یێن گەلێ كوردستانێ نابەردەت و دوپاتكر كو دێ حكومەت یا بەردەوام بیت د ھەولێن خۆدا بۆ دەستڤەئینانا ھەمی مافێن دەستوری یێن خەلكێ ھەرێما كوردستانێ.
ھەژی ئاماژەدانێ یە، د ڤێ ئاهه‌نگێ دا ٤٥٠٧ قوتابی ب ٦٩ بسپۆریا ژ ١٨ کۆلیژێن زانکۆیا دهۆک بوونە خودان باوه‌رنامێن به‌كالوریوسێ.
راگەھاندنا زانكۆیا دھۆك؛ ١٣ـی چریا دووێ ٢٠٢٣
نڤێسین: ماھر طاھر كێستەیی
فوتۆ: عەلی بانکی، هەرمان جانگیر