ل رۆژا پێنج شەمبی ل رێکەفتی ٩ی گولانێ ل هۆلا کۆنفرانسان ل زانکۆیا دهۆک وب ئامادەبوونا د. داوود سلێمان ئەتروشی، سەرۆکێ زانکۆیا دهۆکێ، و د. ڤیان سلێمان، جێگرا سەرۆکێ مەکتەبا رێکخستنا پارتی دیموکراتی کوردستان ل پارێزگەها دهوکێ، و د. راندال رۆدس، سەرۆکێ زانکۆیا ئەمریکی ل کوردستانێ، وڕێڤینگ مزووری، نوینەرێ قونسۆلخانا ئەمریکی ل هەولێرێ، و پەیڤدارێن سەرەکی کۆ ب رێکا ئونلاین بەشداری کۆربەندی بوون، ئوزرا زەیا، بریکارا وەزارەتا ئاسایشا سڤیل، دیموکراسیەت و مافێن مرۆڤی، و ئەلێکساندرا هێرسزفێلد، هەلگرا باوەرناما دکتۆرایێ د فەلسەفێ دا و نڤیسەرا دەستپێشخەریا "جیهانا ئارەزومەندیا ئافرەتان" و بەرهەمهێنەرا داهێنەر و رێڤەبەرا ئێکەمین "لۆتکا جیهانیا ئافرەتان" یا کۆ ژ لایێ سازیا pocket project ڤە هاتە ڕێکخستن، هەروەسا، ئەندام پەرلەمان و هژمارەکا راگر ۆ ماموستایێن زانکۆیێ، سەنتەرێ خواندنێن یەکسانی یا جێندەری ل زانکۆیا دهوک ب هەڤکاری دگەل کوژیێ ئەمریکی کوربەندێ ئافرەتا ئەکادیمیا سەرکردە ئەنجام دا.
ل دەستپێکێ، د.داوود سلێمان ئەتروشی بخێرهاتنا هەمی ئامادەبوویان کر و باس ل رەوشا ئافرەتێ کر و ئاماژە ب هندێ دا کو حکومەتا هەرێما کوردستانێ گرنگیەکا تایبەت دایە ئافرەتێ و رەوشا ئافرەتێ و بەردەوام کۆنفرانس هاتینە ئەنجام دان و یاسا و رێنمایێن دەرکرین بۆ پشتەڤانیا ئافرەتێ.
ژ لایەکێ دی ڤە، ئاماژە ب هندێ دا کۆ زانکۆیا دهۆک ل بەری چەند سالا د جڤاتا زانکویێ دا بتنێ ئێک ئافرەت هەبوویە ،بەلێ نوکە ژ سەرجەمێ(٢٢) ئەندامێن جڤاتا زانکۆیێ (٥) ئەندام ئافرەتن و رۆلەکێ گرنگ یێ هەی د دانا بریاران دا.
هەروەسا، باس ل وێ چەندێ کر کو ل ڤان نێزیکان دێ سەنتەرەکێ خولێن تایبەت بۆ پێگەهاندنا ئافرەتان ل کۆلیژا کارگێری و ئابوری هێتە ڤەکرن. ل دوماهیێ دەست خۆشی ل سەنتەرێ یەکسانی یا جێندەری کر بۆ رێکخستنا ڤان جۆرە کوربەندان بۆ پشتەڤانیا ئافرەتێ.
د. دلین سەردار زوهدی، رێڤەبەرا سەنتەرێ خواندنێن یەکسانی یا جێندەری دیارکر کو ئەڤە ئێکەمین دیدارە ب ڤی جوری دهێتە سازکرن و گوت ژی مەرەم ژ رێکخستنا ڤی کۆربەندی ئەوە کو رۆلێ ئافرەتێ د چوارچۆڤێ ئەکادیمی دا بەرچاڤ بهێتە وەرگرتن کو ئافرەت شویندەستێت وێ د دیارن د هەمی جڤاکان دا. هەروەسا، گۆت ژی کۆ ئافرەت ل هەرێما کوردستانێ بویە نمۆنا ئافرەتێن سەرکەفتی ل سەر ئاستێ هەرێمێ و ئاستێ نیڤ دەولەتی ژی.
ژ لایەکێ دی ڤە، روینشتنەکا گەنگەشێ هاتە رێکخستن ل دۆر (رۆلێ ئافرەتا ئەکادیمیا سەرکردە) کۆ پێک هاتبوو ژ د. ڤیان سلێمان، و د. چۆمان هەردی، رێڤەبەرا سەنتەرێ خواندنێن جێندەری و پەرەپێدانێ ل زانکۆیا ئەمریکی ل ئیراقێ، سلێمانی و د. سۆزان عومەر رەسوول، راگرا کۆلیژا دەرمانسازی ل زانکۆیا دهوک.
هەروەسا، د.شیراز ئیبراهیم، رێڤەبەرا سەنتەرێ خواندنێن راهێنانا پێداگۆجی و پەرەپێدانا ئەکادیمی ل زانکۆیا لبنانی یا فەرەنسی، گەنگەشە کر ل دور رەوشا ئافرەتێ و ئەو بەربەستێن د بنە رێگر بەرامبەر ئافرەتێ د ناڤ خێزانی و دناڤا جڤاکی دا، هەروەسا باس ل پێگەهێ ئافرەتێ کر د ناڤ دام و دەزگەهێن ئەکادیمی دا هەروەسا گوت هەر وەلاتەکێ دڤێت پێش بکەڤیت دڤێت گرنگیێ ب رۆلێ ئافرەتێ بدەت ل دوماهیا روینشتنێ ژی دەرگەهێ دانوستاندنێ هاتە ڤەکرن دناڤبەرا ئەندامێن روینشتنێ و ئامادەبوویان.
ل دوماهیا کوربەندی، سێ ئافرەتێن سەرکردێن ئەکادیمی هاتنە خەلاتکرن ژ لایێ سەرۆکێ زانکۆیێ ڤە. د.ئۆدیت عۆدیشۆ ئاسی، وەك ئێکەم راگرا ئافرەت ل زانکۆیا دهۆک، د.فەوزیە یونس فەتاح، ئێکەم پرۆفیسورا ئافرەت ل زانکۆیا دهۆک، و د. ئاری عادل، ئێکەمین قوتابیا ئافرەتا ئێکەم ل زانکۆیا دهۆک وەک رێزگرتنەک بۆ رۆلێ وان یێ بەرچاڤ د چەند سالێن خزمەتکرنا زانکۆیا دهۆک دا.
راگەهاندنا زانکۆیا دهۆک، ١٠ی گولانا ٢٠٢٤
بارین محەمەد
وێنە: هەرمان جانگیر