ئەڤرۆ ڕێککەڤتی ٢ـێ نیسانا ٢٠٢٤ـێ، رۆژا جیهانی یا ئۆتیزمێ ژلایێ کۆلیژا زانستێن مرۆڤایەتى و کۆلیژا پەروەردا بنیات، ب ئامادەبوونا د. داود سلێمان ئەتروشى سەرۆکێ زانکۆیێ و د. لقمان هادى هاریکارێ سەرۆکێ زانکۆیێ، و بەرپرسێن حزبى و حکومى و رێکخراوێن حکومى و نەحکومى، ب چەندین چالاکیێن جودا رۆژا جیهانى یا ئۆتیزمێ ل زانکۆیا دهۆک هاتە ساخکرن،
د. سەعید خودێدە، ڕاگرێ کۆلیژا زانستێن مرۆڤایەتیئ د پەیڤەکێدا ڕاگەهاند، هیڤی دکەین گەلەک گرنگیێ ب ئەڤێ ڕۆژێ بهێتە دان و هەر ئێك ژ لایێ خۆ ڤە هاریکاریا سەنتەرێن ئۆتیزمێ ل پارێگەها دهۆکێ بکەن.
د. وارژین یاسین تایبەتمەندا نەخۆشیێن دەروونی باس ل نیشانێن نەخۆشیا ئۆتیزمێ کر و دیارکر، دوو نیشانێن سەرەکی هەنە کو بزانی ئەو کەس خودان نەخۆشیە، ژ وان لاوازی د پەیوەندیێن جڤاکی دا و یا دی رەفتارێن دووبارە ل دەف زارۆکی هەبن، هەروەسا نەخۆشیا ئۆتیزمێ ل دەف کۆرا پترە ژ کچکا، بەلێ ل دەف کچکا ئەڤ ئێشە دژوارترە.
مامۆستا فورات سالح، شیرەتکارێ دەروونی باس ل چەوانییا سەرەدەریکرنا دایك و بابا ل گەل نەخۆشیین ئۆتیزمێکر و گۆت ژی، دڤێت خێزان هاریکار بیت، سەنتەر ب تنئ نە جهئ جارەسەریێ یە پیدڤییە خێزان ژی د هاریکار بن.
رۆلێ جڤاکی د باشترکرنا نەخۆشیێن ئۆتیزمێ دا، جڤاکناس د. سەمیا سەعید دیاردکەت، دڤێت جڤاک هاریکار بن ل گەل سەرەدەریکرنا نەخۆشین ئۆتیزمێ و پیدڤییە خۆلێن تایبەت بۆ دایك و بابێن وان بهێنە ڤەکرن، هەر دەمێ نیشانێن نەخۆشیێ ل دەف زارۆکان دیاربوون خێزان هەر زوی بهێنە ئاگەهدارکرن و چارەسەریێ بۆ وەرگرن، ڤەکۆلەرێبن جڤاکی ژی د ئەڤی بیاڤی دا کاربکەن کا دئ چەوا رەفتارێ ل گەل ئەڤان نەخۆشان کەن و پێدڤیە نەخۆشێن ئۆتیزمێ تێکەلی جڤاکی بهێنەکرن.
هەروەسا پشکا پەروەردا تایبەت ل کۆلیژا پەروەردا بنیات، هەر ل دۆر ئەڤێ رۆژێ چالاکیەک رێکخستبوو، د دەسپێکێدا دیار تاهر مامۆستایێ پشکا پەروەردا بنیات، باس ل پرۆژەیێن زانکۆیا دهۆک کر ژ بۆ زێدەتر ئەکادیمیکرنا ستافێ پشکا پەروەردا تایبەت ب تایبەتى ب رێکا وان پرۆژەیێن هەڤشکێن زانکۆیا دهۆک و وەلاتێ ئەلمانیا، ل دویف دا باس ل هەمئاهەنگیا د ناڤبەرا سەمیانێن زارۆکێن ئۆتیزمێ و ستافێ ئەکادیمى یێ پشکا پەروەردا تایبەت یا کۆلیژا پەروەردا بنیات کر،
ل دویف دا، د. داود سلێمان سەرۆکێ زانکۆیا دهۆک، د پەیڤەکێ دا سوپاسیا هەمى وان لایەنێن حکومى و نەحکومى یێن پشکدار دگەل زانکۆیا دهۆک کر ژ بۆ پتر خزمەتکرنا نەخۆشێن ئۆتیزمێ کر، ئامادەیا زانکۆیا دهۆک بۆ هەر کار و پرۆژەکێ هەپشک دیارکر.
ل دویماهیێ ژى، پێشانگەهەکا تایبەت کۆ ژ لایێ سەنتەر و زارۆکێن ئۆتیزمێ ڤە هاتبوو بەرهەڤکرن هاتە ڤەکرن.
هەژى گۆتنێ یە، کو ئوتیزم تێکچوونەکا رەفتاری یە و نیشانێن وێ دیاردکەن ل هەر سێ سالێن پێشەکی یێن تەمەنى و کارتێکرنا نەرێنی ل زورترین لایەنێن پێرابوونێن کەسایەتی دکەت، هەروەسا کۆمەلا گشتی یا نەتەوەیێن ئێکگرتی، ل رێکەڤتی ٢٠٠٧/٣/٢٦ـێ، ٢ـێ نیسانێ وەکو رۆژا جیهانی یا ئۆتیزمێ دەستنیشانکرەیە، ب مەرەما وێ چەندێ کو ئەڤ رۆژە ببیتە رۆژا جیهانی یا پەرەپێدانا نەخۆشیا ئۆتیزمێ.
بۆ دیتنا وێنەیا سەرەدانا لینکێ ل خوارێ بکە:
https://drive.google.com/drive/folders/100RsHKr1k3CkBnvN3iWcVAox4_TkO7sa?usp=sharing
ڕاگەهاندنا زانکۆیا دهۆك؛ ٢ـێ نیسانا ٢٠٢٤ـێ
راپۆرت: رۆندک فاضل و تەڤژین الیاس
وێنە: محەمەد بێسکى، عەلى بانکى، جەلال دوسکى