ئەڤرۆ ڕێکەڤتی ٢ـێ نیسانا ٢٠٢٤ـێ، رۆژا جیهانی یا ئۆتیزمێ ژلایێ کۆلیژا زانستێن مرۆڤایەتى و کۆلیژا پەروەردا بنیات، ب ئامادەبوونا د. داود سلێمان ئەتروشى سەرۆکێ زانکۆیێ و د. لقمان هادى حەسەن، هاریکارێ سەرۆکێ زانکۆیێ، ب چەندین چالاکیێن جودا رۆژا جیهانى یا ئۆتیزمێ ل زانکۆیا دهۆک هاتە ساخکرن.

د. سەعید خودێدە، ڕاگرێ کۆلیژا زانستێن مرۆڤایەتیئ د پەیڤەکێ دا راگەهاند: "هیڤیدکەین گەلەک گرنگیێ ب ئەڤێ ڕۆژێ بهێتەدان و هەر ئێك ژ لایێ خۆ ڤە هاریکاریا سەنتەرێن ئۆتیزمێ ل پارێگەها دهۆکێ بکەن."

د. وارژین یاسین، تایبەتمەندا نەخۆشیێن دەروونی، باس ل نیشانێن نەخۆشیا ئۆتیزمێ کر و دیارکر "دوو نیشانێن سەرەکی هەنە کو بزانی ئەو کەس خودان نەخۆشیە، ژ وان لاوازی د پەیوەندیێن جڤاکی دا و رەفتارێن دووبارە ل دەف زارۆکی هەبن".

مامۆستا فورات سالح، شیرەتکارێ دەروونی باس ل چەوانییا سەرەدەریکرنا دایکوبابا ل گەل نەخۆشیین ئۆتیزمێ کر و گۆت: پێدڤیە خێزان هاریکار بیت، سەنتەر ب تنئ نە جهئ چارەسەریێ یە پیدڤیە خێزان ژی د هاریکار بن.

ل دۆر رۆلێ جڤاکی د باشترکرنا نەخۆشیێن ئۆتیزمێ دا، جڤاکناس سەمیا سەعید دیاردکەت، پێدڤیە جڤاک هاریکار بیت ل گەل سەرەدەریکرنا نەخۆشین ئۆتیزمێ و پیدڤیە خۆلێن تایبەت بۆ دایك و بابێن وان بهێنە ڤەکرن، هەر دەمێ نیشانێن نەخۆشیێ ل دەف زارۆکان دیاربوون، خێزان هەر زوی بهێنە ئاگەهدارکرن و چارەسەریێ بۆ وەرگرن، ڤەکۆلەرێن جڤاکی ژی د ئەڤی بیاڤی دا کاربکەن کا دئ چەوا رەفتارێ ل گەل ئەڤان نەخۆشان کەن و پێدڤیە نەخۆشێن ئۆتیزمێ تێکەلی جڤاکی بهێنەکرن.

هەروەسا پشکا پەروەردا تایبەت ل کۆلیژا پەروەردا بنیات، هەر ل دۆر ئەڤێ رۆژێ چالاکیەک رێکخستبوو، د دەسپێکێدا دیار تاهر مامۆستایێ پشکا پەروەردا بنیات، باس ل پرۆژەیێن زانکۆیا دهۆک کر ژ بۆ زێدەتر ئەکادیمیکرنا ستافێ پشکا پەروەردا تایبەت ب تایبەتى ب رێکا وان پرۆژەیێن هەڤشکێن زانکۆیا دهۆک و وەلاتێ ئەلمانیا، ل دویف دا باس ل هەمئاهەنگیا د ناڤبەرا سەمیانێن زارۆکێن ئۆتیزمێ و ستافێ ئەکادیمى یێ پشکا پەروەردا تایبەت یا کۆلیژا پەروەردا بنیات کر،

ل دویڤ دا، د. داود سلێمان ئەتروشی سەرۆکێ زانکۆیا دهۆک، د پەیڤەکێ دا سوپاسیا هەمى وان لایەنێن حکومى و نەحکومى یێن پشکدار دگەل زانکۆیا دهۆک کر ژ بۆ پتر خزمەتکرنا نەخۆشێن ئۆتیزمێ کر، ئامادەیا زانکۆیا دهۆک بۆ هەر کار و پرۆژەکێ هەپشک دیارکر.

ل دویماهیێ ژى، پێشانگەهەکا تایبەت کۆ ژ لایێ سەنتەر و زارۆکێن ئۆتیزمێ ڤە هاتبوو بەرهەڤکرن هاتە ڤەکرن.

هەژى گۆتنێ یە، کو ئوتیزم تێکچوونەکا رەفتاری یە و نیشانێن وێ دیاردکەن ل هەر سێ سالێن پێشەکی یێن تەمەنى و کارتێکرنا نەرێنی ل زورترین لایەنێن پێرابوونێن کەسایەتی دکەت، هەروەسا کۆمەلا گشتی یا نەتەوەیێن ئێکگرتی، ل رێکەڤتی ٢٠٠٧/٣/٢٦ـێ، ٢ـێ نیسانێ وەکو رۆژا جیهانی یا ئۆتیزمێ دەستنیشانکرەیە، ب مەرەما وێ چەندێ کو ئەڤ رۆژە ببیتە رۆژا جیهانی یا پەرەپێدانا نەخۆشیا ئۆتیزمێ.

بۆ دیتنا وێنەیا سەرەدانا لینکێ ل خوارێ بکە:

https://drive.google.com/drive/folders/100RsHKr1k3CkBnvN3iWcVAox4_TkO7sa?usp=sharing

ڕاگەهاندنا زانکۆیا دهۆك؛ ٢ـێ نیسانا ٢٠٢٤ـێ

راپۆرت: رۆندک فاضل و تەڤژین الیاس

وێنە: محەمەد بێسکى، عەلى بانکى، جەلال دوسکى