تیما Vis moot یا كولیژا یاسایێ ل زانكۆیا دهۆك وەکو دادوەر پشكداری پێشبركیا دادڤانیا ململانەیێن بازرگانی یێن نێڤدەولەتی بوو. ئەڤ پشکداریە لسەر داخوازا زانكۆیا ئەمریكی ل بەغدا بوو. تیما زانكۆیا دهۆك ژ چوار قوتابیێن كولیژا یاسایێ پێكهاتبوو و ب ئامادەبوونا وەزیرێ داد یێ عیراقێ و چەندین كەسایەتێن دی و یاساناسێن عێراقی و بیانی پێشبرکی ل بارەگایێ زانکۆیا ئەمریکی ل بەغدا هاتە ئەنجامدان و پشتی تیما زانکۆیا دهۆک کارێ دادوەریێ د ڤێ پێشبرکیێ دا کری، ژلایێ سەرۆكێ زانكۆیا ئەمریكی ڤە هاتنە خەلاتكرن.
دهێتە زانین بزاڤ دهێنە کرن Vis moot ببیتە پێگوهۆرەکێ دەزگەهێن دادوەریا گشتی د بوارێ چارەسەرکرنا هەڤرکیێن بازرگانی دا لسەر ئاستێ نێڤدەولەتی و ل جهێ پەنابرنێ بۆ ڤان دەزگەهان، پشتبەستن لسەر Vis moot بهێتە کرن وەکو دادوەریەکا تایبەت بۆ چارەسەرکرنا ڤان جۆرە هەڤرکیان.
هەژی ئاماژێ یە سالا بۆری هەمان تیم ژ زانکۆیا دهۆک پشکداری د پێشبرکیا ناڤبری دا کربوو و لسەر ئاستێ عیراقێ پلا دووێ بدەستخۆڤە ئینا بوو، ژبەر ڤێ پلەیا بدەستڤەئینای، پشکداری د پێشبرکیا رۆژهەلاتا ناڤین یا Vis moot دا کربوو کو ل وەلاتێ بەحرێنێ هاتبوو ئەنجامدان و ژبەر بەلاڤبوونا کۆڤید ١٩، ب ئاوایەکێ ئونلاین هاتبوو ئەنجامدان. لەورا تیمێ زانکۆیا دهۆک وەکو شارەزا ژ لایێ زانکۆیا ئەمریکی یا بەغدا ڤە هاتنە داخوازکرن و کارێ دادوەریێ د پێشبرکیێ دا کر بۆ هەلسەنگاندن و بریاردانێ لسەر وان کەیسێن بۆ پێشبرکیێ ژ لایێ تیمێن پشکدار ڤە هاتینە پێشکێشکرن، کو بابەتێ پێشبرکیا ئەڤ سالە لدۆر هەڤرکیێن بازرگانیا نەفت و گازێ بوو.
هەژی خویاکرنێ یە Vis moot واتە دیبەتا (ڤیس)ی، کو ناسناڤێ دانەرێ هزرا ڤێ دیبەیتێ وێلەم ڤێس Willem Visی بوویە کو بسپۆرەکێ هۆلەندیێ ڤی بواری بوویە. Vis moot ل سالا ١٩٩٣ێ ل ڤییەنا یا پایتەختێ ئاوستریا و هەڤکیفا وێ یا ئاسیایی ل سالا ٢٠٠٤ێ ل هۆنگ کۆنگ هاتینە دامەزراندن. ئارمانجا سەرەکی ژێ پشتەڤانیا ڤەکۆلینێن گرێدای چارەسەرکرنا هەڤرکیێن بازرگانیا نێڤدەولەتی و راهێنانا قوتابیێن پشکێن یاسایێ یە د ڤی بواری دا، کو پتر ژ ٤٠٠ زانکۆیان ژ پتر ژ ١٠٠ وەلاتان تێدا پشکدارن.