سەرۆكێ زانكۆیا دهۆك پرۆفیسۆر د. مسلح دهۆكی پشكداری د كۆنفرانسێ نێڤدەولەتی یێ ئێكەتیا زانكۆیا جیهانی (IAU) ل رۆژێن (18 و 19/10/2017) و هەروەسا كۆمبوونا بۆردێ سەرپەرشتیار یێ زانكۆیێن جیهانێ ل رۆژێن (15 و 16 و 17/10/2017) ل باژێری (ئەكرە ل وەلاتێ غانا ل كیشوەرێ ئەفریقیا) كر.
پرۆفیسۆر د. مسلح دهۆكی كو ئەندامە ل بۆردێ سەرپەرشتیار یێ ئێكەتیا زانكۆیێن جیهانێ دیار كر كو پتر ژ 400 سەرۆكێن زانكۆیان پشكداری د ڤی كۆنفرانسی دا كربوو، گۆت ژی بۆردێ سەرپەرشتیا ژ (31) ئەندامان پێك دهێت و ئەو وەكو سەرۆكێ زانكۆیا دهۆك ئەندامە دڤی بۆردی دا، ل سێ رۆژێن بەراهیێ كۆمبوونا خۆ ل دۆر ستراتیژیا خواندنا بلند و چاونیا ب رێڤەچوونا وێ و چ بهێتە كرن بۆ پتر بەرەف پێش برنا خواندنا بلند ئەنجام دا.
سەرۆكێ زانكۆیا دهۆك هەروەسا گۆت ئەڤ كۆنفرانسە ل ژێر سەرپەرشتیا بۆردێ سەرپەرشتیار یێ ئێكەتیا زانكۆیێن جیهانێ بوو، هەروەسا ل پەراوێزا ڤی كۆنفرانسی ژی ل گەل چەند سەرۆكێن زانكۆیێن جیهانی كۆمبوون ئەنجام دان ژ وان ژی ل گەل سەرۆكێ زانكۆیا دبلن یا ئیرلەندی و هەروەسا ل گەل سەرۆكێن چەند زانكۆیێن دیتر دانوستاندن كرینە بۆ ئەنجامدانا رێككەفتنێن زانستی ل گەل وان زانكۆیان د بیاڤێ خواندنا بلند و ئالوگورا زانستی و ڤەكرنا پشكێن هەڤپشك د ناڤبەرا زانكۆیا دهۆك و وان زانكۆیان دا، هەروەسا سەرۆكێ وێ زانكۆیا غانی ژی ئەوا مێڤانداریا ڤی كۆنفرانسی كری بەرهەڤیا زانكۆیا خۆ دیاركر كو ل گەل زانكۆیا دهۆك رێككەفتنەكا زانستی ئەنجام بدەن د بیاڤێ خواندنا بلند دا.