رۆژا ئێکشەمب، رێکەڤتی ١٤ـی کانوونا ئێکێ ٢٠٢٤ـێ، ل کوژیێ ئەمریکی ل زانکۆیا دهۆک، ب ئامادەبوونا د. لقمان هادی حەسەن هاریکارێ سەرۆکێ زانکۆیا دهۆک بۆ کاروبارێن زانستی و خواندنا بلند و د. نزار ئەمین محەمەد رێڤەبەرێ پەیوەندیا ل زانکۆیا دهۆک و لیوا نەبەز صەلاح سەدیق رێڤەبەرێ چاکسازیا ل وەزارەتا پێشمەرگەی و زاک بازی بەرپرسێ رێکخروا (The Spirit of America )، زانکۆیا دهۆک خولەکا بهێزکرنا زمانێ ئنگلیزی بۆ فەرماندار و کارمەندێن وەزارەتا پێشمەرگەیی یا حکومەتا هەرێما کوردستانێ ڤەکر.
د دەسپێکا دا، د. لقمان هادی حەسەن هاریکارێ سەرۆکێ زانکۆیێ، دیارکر؛، ئەم وەکو زانکۆیا دهۆک خزمەتکرنا هێزێن پێشمەرگەی ب ئەرکێ خۆ دزانینن، هیڤی خوازین بشێین ب رێکا ئەڤێ خولێ خزمەتەکا بچوک پێشکێشی بەشەک ژ فەرماندار و کارمەندێن وەزارەتا پێشمەرگەی بکەین، و د داهاتی دا کارێن هەڤپشکێن زێدەتر ئەنجامبدەین ژ پێخمەت زێدەتر خزمەتکرنا کوردستانێ.
پاشی، لیوا نەبەز صەلاح سەدیق رێڤەبەرێ چاکسازیا ل وەزارەتا پێشمەرگەی؛ سوپاسیا زانکۆیا دهۆک کر ژ بوو ئەنجامدانا ئەڤێ خولێ بو وەزارەتا پێشمەرگەی کو ئێکەم خولا فێربوونا زمانێ ئنگلیزیە ژ لایێ زانکۆیا دهۆک ل پارێزگەها دهۆک بۆ هێزێن پێشمەرگەیی دهێتەڤەکرن، دیارکر: رۆلێ زانکۆیا دهۆک بەرچاڤە دخزمەتکرنا دجڤاکی دا د بوارێن جودا دا.
هەژی ئاماژەدانێ یە، خولا زمانێ ئنگلیزی ژلایێ رێڤەبەریا پەیوەندیان یا زانکۆیا دهۆک و ب سەرپەرشتیا قونسولخانەیا ئەمریکی ل هەولێرێ و ب هەڤپشکی و پالپشیا دارایی یا رێکخراوا The Spirit of America، ب پشکداریا ٣٠ فەرماندار و کارمەندێن وەزارەتا پێشمەرگەی بۆ دەمێ ٤ هەیڤان ژ لایێ ماموستایێن کولیژا زمان ل زانکۆیا دهۆک دێ هێتەبرێڤەبرن.
راگەهاندنا زانکۆیا دهۆک؛ ١٤ـی کانوونا ئێکێ ٢٠٢٤ـێ
راپورت: فاتما مەحمود
فۆتو: محمەد عبدالکریم