قونسلێ گشتی یێ وەلاتێ توركیا ل هەرێما كوردستانێ (Mehmet Akif inam) ل رۆژا 9/8/2017 سەرەدانا زانكۆیا دهۆك كر و ل سەنتەرێ رەوشەنبیری و جڤاكی یێ زانكۆیێ ژ لایێ سەرۆكێ زانكۆیا دهۆك پ. د. مسلح دهۆكی ڤە پێشوازی لێ هاتە كرن.
د دیدارەكی دا سەرۆكێ زانكۆیا دهۆك و قونسلێ گشتی یێ وەلاتێ توركیا ل هەرێما كوردستانێ بەحسێ پەیوەندیێن ئەكادیمی و زانستی د ناڤبەرا زانكۆیا دهۆك و زانكۆ و ناڤەندێن زانستی و ئەكادیمی یێن وەلاتێ توركیا دا كر.
د كۆنگرەكێ رۆژنامەڤانی دا پ. د. مسلح دهۆكی دیاركر كو زانكۆیا دهۆك پەیوەندیێن ل گەل جڤاتا خواندنا بلند یا توركی هەین و دووماهی كۆنگرێ وان یێ زانستی یێ نێڤدەولەتی تێدا پشكدار ببوون، گۆت ژی د وی كۆنگرەی دا بەرنامێ مەولانا یێ وەرگرتنا قوتابیان و دانا زەمالێن حواندنێ بۆ زانكۆیێن وەلاتێن ئیسلامی هاتە راگەهاندن و زانكۆیا دهۆك دێ د وی بەرنامەی دا ژی یا پشكدار بیت.
سەرۆكێ زانكۆیا دهۆك هەر د كۆنگرێ رۆژنامەڤانی دا دیاركر كو زانكۆیا دهۆك بابەتێ ڤەكرنا پشكا زمانێ توركی ل گەل قونسلێ توركیا ل هەرێمێ بەحس كریە و قونسلێ توركیا ژی بەرهەڤیا خۆ دیاركریە كو دێ د هاریكار بن بۆ ڤەكرنا ڤێ پشكێ ل زانكۆیا دهۆك چ ژلایێ دابین كرنا بابەتێن خواندنێ بیت چ ژی ژلایێ پەیداكرنا مامۆستایان بیت.
د كۆنگرێ رۆژنامەڤانی دا قونسلێ گشتی یێ وەلاتێ توركیا ل هەرێما كوردستانێ (Mehmet Akif inam) بەحسێ وێ چەندێ كر كو زانكۆیا دهۆك و دەڤەرا دهۆكێ ب گشتی بۆ وان گرنگیا خۆ یا هەی چونكو دهۆك دەرگەهێ هەرێما كوردستانێ یە ل گەل وەلاتێ توركیا، گۆت ژی زانكۆیا دهۆك ژ زانكۆیێن كەڤنێن هەرێما كوردستانێ یە و مە دڤێت گرنگیێ پێ بدەین ژلایێ پەرەپێدانا زانستی و ئەكادیمی ڤە.
هەر د ڤێ سەرەدانا خۆ دا قونسلێ گشتی یێ وەلاتێ توركیا چەند پەرتووكێن زانستی كرنە دیاری بۆ زانكۆیا دهۆك و سەرۆكێ زانكۆیێ ژی لوگویێ زانكۆیا دهۆك پێشكێشی قونسلی كر.