سەرۆکێ زانکۆیا دهۆک هێلا ڤەگوهاستنا ل ناڤ کەمپێ بکارئینا
Sept. 12, 2022, 12:18 a.m.

ئەڤڕۆ رێکەڤتی ١١/٩/٢٠٢٢، د. داود سلێمان ئەتروشی سەرۆکێ زانکۆیا دهۆک، بۆ ژ نێزیک هایداربوون لسەر پلانا نوی یا ترافیکێ ل کەمپا سەرەکی یا زانکۆیێ، دگەل ئەندامێن لژنا رێکخستنا ترافیکی یا کەمپا زانکۆیا دهۆک و راگرێ کولیژا پلاندانانا جهەکی و نوینەرێ قوتابیان سەردانا کەمپا زانکۆیێ کر.

جهێ ئاماژە پێکرنێ یە سەرۆکێ زانکۆیێ دگەل قوتابیان ب پاسێ گەریانەک د ناڤ کەمپا زانکۆیێ داکر، هەروەسا دگەل قوتابی و خودانێن پاسان لسەر ئەڤێ پلانا نوی یا زانکۆیا دهۆک گۆتوبێژ کرن.

د سەرەدانا خۆ دا بۆ کەمپا زانکویێ، سەرۆکێ زانکۆیا دهۆک راگەهاند "مە زانکۆ ژ ئاریشەکا گەلەک مەزن رزگار کر و پێدڤیە خۆ دگەل پلانێن نوی بگونجینین ژبەرکو د سەردەمێ داهاتی دا هەمی لایەک (زانکۆ، قوتابی و خودانێن پاس و تەکسیان) ژ ئەڤێ پلانا نوی یا زانکۆیا دهۆک دێ یا مفادار بن".

ژلایەکێ دی ڤە، د. دلشاد عبدولحەلیم، راگرێ کولیژا پلاندانانا جهەکی ب تێروتەسەلی باس ل ڤێ پلانا نوی یا زانکۆیا دهۆک کر و گۆت: "پشتی کۆمبوونا چڤاتا زانکۆیا دهۆک لسەر پلانا ترافیکی دناڤ کەمپا زانکۆیێ دا، بریار هاتەدان کو تەکسی نەچنە دناڤ کەمپا زانکۆیێ دا، پلان هاتیە دارێژتن کو گۆرەپانەکا تایبەت ژ دەرڤەی کەمپا زانکۆیێ بهێتە دروستکرن و د نوکە دا ئەو گۆرەپان د قووناغا دویماهیێ یا دورستکرنێ دایە، هەرکەسێ سەردانا زانکۆیێ بکەت دێ ل وێ گۆرەپانێ ژ تەکسی هێتە خوار و پاس ئامادەنە بۆ هەر جهەکێ وی بڤێت د ناڤ کەمپا زانکۆیێ دا بگەهینیتێ".

هەروەسا هێلا پاسێن ناڤا کەمپا زانکۆیێ لسەر سێ هێلان هاتیە دابەشکرن :

هێلا رەنگێ پرتەقالی، ژ دەرگەهێ مالتایێ بۆ فلکا کولیژا زمانان و ڤەدگەریتەڤە هەمان جهی. هەروەسا هێلا رەنگێ شین، ژ دەرگەهێ زرکا بۆ کولیژا تەندروستی و تا کولیژا زانست و ڤەدگەریتە ڤە هەمان خالا دەستپێکی. دیسان هێلا رەنگی مۆر ژ دەرگەهێ پشکێن ناڤخۆییێن کچان دەستپێدکەت و دچیتە زۆربەیا جهان ل ناڤ کەمپا زانکۆیێ.بەلێ دەمێ ڤێ هێلێ ژ دەمژمێر 08:5 تاکو 10:00ـێ سپێدێ یە.

هەروەسا بریار هاتیە دان تاکو دەمژمێر 09:00ـێ سپێدێ هەر پێنچ خولەکان جارەکێ پاس هاتنوچوونێ بکەن بۆ وان خالێن دەستنیشانکری، پشتی 09:30، دەمێ هاتنوچوونێ ببیتە 10خولەک ، پشتی دەمژمێر 11:00 ببیتە 15خولەک، هەروەسا ل دەمژمێر 01:00 تاکو 03:00 دووبارە دەمێ هاتنوچوونا پاسان دێ بیتە 10 خولەک، ل ئێڤاران ژی هاتنوچوونا پاسان دێ یا بەردەوام بیت،.