ب هەلکەڤتا ٦٩ سالیا دامەزراندنا ئێکەتیا قوتابیێن کوردستانێ، ئەڤرۆ ل سەنتەرێ کونفرانسان ل زانکۆیا دهۆک و ب ئامادەبوونا د. عەلی تەتەر پارێزگارێ دهۆکێ و د. داوود سلێمان ئەترووشی سەرۆکێ زانکۆیا دهۆک و هژمارەکا پەرلەمانتار و سەرۆکێن زانکۆیێن پارێزگەهێ و سکرتێرێ گشتیێ ئێکەتیا قوتابیێن کوردستانێ و هژمارەکا قایمقامێن پارێزگەها دهۆکێ و نوینەرێن حزبی و حکوومی و هژمارە زۆرا قوتابیان، مەکتەبا سکرتاریەتا ئێکەتیا قوتابیێن کوردستانێ کەرنەڤالەک بۆ لقێن دهۆک و نەینەوا سازکر.
کەرنەڤالێ ب پێشانگەهەکا زانستی و هۆنەری و کەلتۆری دەستپێکر، کو هژمارەکا بەرهەم و داهێنانێن قوتابیان ژ لقێن دهۆک، زانکۆ و پەیمانگەهێن دهۆک، مووسل، زاخۆ، ئامێدی، ئاکرێ، بەردەرەش، شنگال و شێخان دەستپێکر. پاشی و د رێورەسمێن کەرنەڤالێ دا، نێچیرڤان حسێن، سکرتێرێ (ی.ق.ک.) پەیڤەک پێشکێشکر و تێدا پیرۆزباهیێن مەکتەبا سکرتاریەتا (ی.ق.ک.) ئاراستەی سەرۆک بارزانی و هەمی قوتابیان کرن و داخوازا پشتەڤانیا حکوومەتێ کر، ب تایبەتی د بوارێ خواندنا تەکنیکی و پیشەیی دا. پاشی پەیڤا مەکتەبا سیاسیا پارتی دیمۆکراتی کوردستان ژ لایێ بەرپرسا دەستەیا رێکخراوێن جەماوەری و پیشەیی، خانم ئەڤین هرۆری ڤە هاتە پێشکێشکرن و وێرای پیرۆزباهیان، باس ل وێ یەکێ کر کو ئێکەتیا قوتابیێن کوردستانێ بۆ خزمەتکرنا هەمی قوتابیێن کوردستانێ و بێی جوداهی هاتیە دامەزراندن و شیایە چەندین کادرێن شۆرەشگێر و خودان شیان و شارەزایی و بلیمەت بەرهەمبینیت و داخوازا بەردەوامیا نویبوون و بەردەوامیێ بۆ کر.
د کەرنەڤالێ دا، ٦ قوتابیێن بەهرەمەندێن خودان پێداویستیێن تایبەت هاتنە خەلاتکرن و پاشی ستران و دیلانێن فۆلکلۆریێن کوردی ب رێکا گرۆپێ ئاسۆس هاتنە ساخڤەکرن و کەرنەڤال ب کۆنسێرتەکا هۆنەری بدویماهی هات