بهەلكەفتا رۆژا جیهانی یا خودان پێدڤیێن تایبەت پشكا پەروەردا تایبەت ل كۆلیژا پەروەردا بنیات ل زانكۆیا دهۆك رێورەسمەك ل رۆژا 3/12/2018 ل هۆلا پێشمەرگە ل ئاڤاهیێ كۆلیژێ سازكر.
سەرۆكێ پشكا پەروەردا تایبەت د. چاچان جومعە د پەیڤەكی دا بەحسێ گرنگیا پشكا پەروەردا تایبەت و رۆژا جیهانی یا خودان پێدڤیێن تایبەت كر و سوپاسیا سەرۆكاتیا زانكۆیا دهۆك كر كو گرنگیێ ددەنە ڤێ پشكێ.
سەرۆكێ زانكۆیا دهۆك پ. د. مصلح دهۆكی د پەیڤەكی دا بەحسێ ئارمانج ژ دیاركرنا ڤێ رۆژێ كر و گۆت نەتەوێن ئێكگرتی ل سالا 1992 رۆژا 3ی كانوینا ئێكێ ژ هەمی سالەكی دیاركریە بۆ رۆژا جیهانی یا خودان پێدڤیێن تایبەت داكو پشتەڤانیا خودان پێدڤیێن تایبەت بهێتە كرن و پتر جڤاك و رێكخراو و ناڤەندێن ئەكادیمی ئاگەه ژ پێدڤیێن وان هەبیت و پێدڤیێن وان بهێنە گەرەنتی كرن.
پ. د. مصلح دهۆكی هەروەسا گۆت زانكۆیا دهۆك هەردەم یا د ناڤا جڤاكی دا و ل دویف پێدڤیا جڤاكی پشكێن زانستی ڤەدكەت، ل سالا 2013 ب هەڤكاریا زانكۆیا ئولدمبێرگ یا ئەلمانی مە شیا پشكەكا زانستی ب ناڤێ پشكا (پەروەردا تایبەت) ڤەكەین و سوپاس بۆ خودێ ل سالا بۆری ئێكەم گەرا قوتابیان ژ ڤێ پشكێ دەرچوون و دێ خزمەتا جڤاكی و ب تایبەت خودان پێدڤیێن تایبەت كەن، هەروەسا بەحسێ وێ چەندێ كر كو پەرلەمانێ كوردستانێ ل سالا 2011 یاسایەكا تایبەت دەرێخست ب ناڤێ (یاسایا ماف و ئمتیازاتێن كێم ئەندام و خودان پێدڤیێن تایبەت ل هەرێما كوردستانێ) كو ب یاسایا هژمار 22 یا سالا 2011 دهێتە نیاسین، دڤێ یاسایێ دا چەندین ماف و ئمتیازات بۆ كێم ئەندام و خودان پێدڤیێن تایبەت هاتینە بەحس كرن، ژ وان ژی د مادێ نەهێ دا ژ ڤێ یاسایێ بەحسێ مافێ پەروەردەكرن و فێركرنێ دكەت بۆ ڤێ تەخا جڤاكی كو دڤێت هەروەكو كەسێن سروشتی ژ مافێ خواندن و فێركرنێ نەهێنە بێ بەهر كرن.
د. تاهر دەروێش بابەتەك ل دۆر خودان پێدڤیێن تایبەت پێشكێش كر و مەبەست ژ دیاركرنا ڤێ رۆژێ بۆ ڤێ تەخا جڤاكی بەحس كرن، ل دیف دا كورتە فلمەك ب هەلكەفتا ڤێ رۆژێ هاتبوو بەرهەڤ كرن هاتە نیشادان.