راگەاندنا زانکۆیا دهۆک؛ ٢٩ـی چریا دووێ ٢٠٢٢
د ڤەكۆلینەكا ماستەرێ دا كو ژلایێ رۆژ غازی رشید، قوتابیا خواندنا بلند ل پشكا كۆمەلناسی ل كۆلیژا زانستێن مرۆڤایەتی ل زانكۆیا دهۆك هاتیە ئەنجامدان ل دۆر پابەندبوونا جڤاكی ب رێنمایێن ساخلەمی ل رویبرویبوونا پەتایا كۆرۆنایێ ب نێرینا مامۆستایێن زانكۆیا دهۆك، ڤەكۆلەر گەهشتیە وی ئەنجامی كو ئاستێ پابەندبوونا جڤاكی ب نێرینا مامۆستایان یا بلند بوو.
د ڤێ ڤەكۆلینێ دا ئەو ژی هاتیە كو د ماوێ پەتایا كۆرۆنایێ COVID-19 دا سەرانسەری جیهانێ، حکومەتان چەندین جۆرێن دەستێوەردانێن نەدەرمانی بجهئینان، و بزاڤا سنۆرداركرنا بەلاڤبوونا ڤی ڤایرۆسی دكر، ژ وان ژی؛ قەدەغەکرنا هاتنوچوونێ و داخستنا كاروبار و قوتابخانە و جهێن ئاینی و گەلەك جهێن دی و پابەندبوونا جڤاكی ب ڤان رێنمایان كاریگەریەكا بەرچاڤ ل سەر رێژا تووشبوون و مرنێ هەبوو.
گرنگیا جیاوازیا بۆچوونێن ستافێ مامۆستایێن زانكۆیا دهۆك ل دۆر پابەندبوونا جڤاكی یا خەلكێ هەرێما كوردستانێ ل دویڤ گۆراوێن دیمۆگرافی، تەمەن، باوەرنامە، ناسناڤێ زانستی، رەگەز و بسپۆری، بۆ سالا خاندنێ ٢٠٢١-٢٠٢٢ بخۆڤە گرتیە و هژمارا وان ١٠٠٣ مامۆستا بوون ل هەر ١٩ كۆلیژێن زانكۆیا دهۆك، و ب رەنگەكێ هەرەمەكی هاتینە هەلبژارتن، و ئەنجام ب ڤی رەنگی بوون:
1ـ ئاستێ پابەندبوونا جڤاکی ب نێرینا ئەندامێن ستافی یا بلند بوو.
2ـ جیاوازیەكا بەرچاڤ هەیە ب دیتنا سامپلێ ڤەكۆلینێ سەبارەت ئێك ژ رەهەندان ئەو ژی ل گۆر گۆراوێ تەمەنی.
3ـ ل گوری گۆراوێ بسپۆریێ، جوداهیێن بەرچاڤ د رەهەندەكی دەستنیشانكری دا هەنە.
4ـ جوداهیا بەرچاڤ ب دیتنا سامپلێ ڤەكۆلینێ سەبارەت پابەندبوونا جڤاكی نینە.
ئەڤ ڤەكۆلینە ب سەرپەرشتیا د. چاچان جمعە محەمەد بوو ژ زانكۆیا دهۆك، كۆلیژا زانستێن مرۆڤایەتی.