ئەڤرۆ رێکەڤتی ٢٠٢٢/٢/٢١، ئەکادیمیا کوردی پەرتووکا مامۆستایێ کولیژا زمانان ل زانکۆیا دهۆک د. مەسعوود جەمیل ب ناڤونیشانێ (رێبەرێ كێش و سەروایێن سترانا دیلانكییا كرمانجی) بەلاڤکر. ئەڤ پەرتووکە پارچەیەکا مەزنا سترانێن فۆلکلۆریێن کوردی ڤەدکۆلیت و وەکو رێبەرەک بۆ مامۆستا و قوتابیێن ڤی بواری دێ هێتە بکارئینان.
نڤێسەرێ ڤێ پەرتووکێ د. مەسعوود جەمیل، وەکو مامۆستایەکێ زانکۆیا دهۆک دیارکر کو سترانێن دیلانکی ژ ١٠ دەڤەرێن کوردستانێ پتر هاتینە وەرگرتن و ژ لایێ کێش و سەروایێ ڤە هاتینە ڤەکۆلین و گۆت: " لدویڤ پەرتووكێن بەردەست، مە 2018 سترانێن دیلانكی ژ شازدە پەرتووكان وەرگرتینە، ستران یێن دەڤەرێن (بادینان، هەكاری، بۆتان، سلیڤان، مۆش، شرناخ، خەرزان، باتمان، هەوێل و ڕۆژئاڤایێ كوردستانێ)نە، ئانكو سترانێن هژمارەكا دەڤەرێن كوردینە یێن ب كرمانجییا سەری دئاخڤن".
هەروەسا مامۆستایێ زانکۆیا دهۆک دا دیارکرن کو ئەڤ پەرتووکە هەولەکە بۆ پارازتنا سترانا دیلانکییا کوردی ژ بەرزەبوونێ، و دا خویاکرن: " دەمێ فۆرم و كێشێن سترانا دیلانكی دهێنە دەستنیشانكرن و چەسپاندن، ، ئەگەر چەند پەیڤ بهێنە گوهۆرین یان پێكگوهۆرین؛ سەلیقە و ریتما سترانێ دێ هەروەكی خۆ مینیت و هوسا سترانا كوردی دێ ژ بەرزەبوون و نەمانێ هێتە پارازتن".
هەژی گۆتنێ یە کو ئەڤ پەرتووکە ژ دوو پشکان پێکدهێت. د پشکا ئێکێ دا سترانا دیلانکی ژ لایێ تیۆری ڤە ب کورتی هاتیە باسکرن و هەروەسا کێشا سترانا دیلانکی هاتیە دەستنیشانکرن و شرۆڤەکرن. پشکا دووێ ژی یا تایبەتە ب سەروایا سترانا دیلانکییا کوردی ڤە و پشتی سەروا ژ لایێ تیۆری ڤە هاتیە سالۆخدان و شرۆڤەکرن، ب ئاوایەکێ هویر و ب ئامار هەر ٢٠١٨ سترانێن هەلبژارتی ژ ڤی لایەنی ڤە هاتینە شرۆڤەکەن. لەورا ئەڤ پەرتووکە یا دەروازەیی یە و وەکو رێبەرەک بۆ خواندەڤان و ڤەکۆلەرێن ڤی بواری دێ رۆلەکێ مەزن گێریت.