ل رۆژا 1/2/2021 ل هۆلا كۆنفرانسان ل زانكۆیا دهۆك و ل ژێر چاڤدێریا پارێزگارێ دهۆكێ د. عەلی تەتەر و ب ئامادەبونا شارەزایێن بیاڤێ ئابووری یێن كەرتێ گشتی و تایبەت پەنەلەك ل دۆرگەشەپێدانا ئابووری و رێیێن بدەستڤەئینانێ ل پارێزگەها دهۆكێ هاتە گێران.
جێگرێ پارێزگارێ دهۆكێ ماج سید سالح د پەیڤەكی دا گرنگیا سازكرنا ڤان جۆرە چالاكیێن ئابووری بەحس كر و گۆت ئابوورێ دەڤەرێ ب رێكخستنا ڤان چالاكی و ڤەكۆلینێن زانستی دێ هێتە پێشخستن و دەست خوشی ل رێكخەرێن پەنەلی كر و خواست راسپاردێن ژێ دەردكەڤن ب رەنگەكێ پراكتیكی بهێنە بجهئینان.
سەروكێ زانكویا دهۆك د پەیڤا خۆدا گۆت گەشەپێدان ستوینا سەرەكی یا بزاڤ و وەرار و پێشڤەچوونا مرۆڤی یە ژ هەمی رویەكی ڤە، كریارەكا بەردەوام یا پێشكەفتنێ یە، چ ژ لایێ ئابوری و جڤاكی ڤە بیت، چ ژی ژ لایێ داهینان و ئاڤاكرنا مرۆڤی بخۆ بیت، چونكو ئاڤاكرنا مرۆڤی وەكو تاكە كەس باشترین گەنجینا مرۆڤایەتیێ یە، ئەگەر مرۆڤ ل سەر شەنگستەكێ راست و ساخلەم هاتە ئاڤاكرن دێ كەسەكێ بەرهەم دار و مێشك ڤەكری و داهێنەر بیت د هەمی بیاڤێن ژیانێ دا.
هەروەسا ئاماژە دا وێ چەندێ كو زانكۆیا دهۆك هەر ژ دامەزراندنا وێ و هەتا ئەڤرۆ بزاڤێن وێ د بەردەوامن ژ بۆ ئاڤاكرنا تاكە كەسی، كو ئەو كەسێ ژ زانكۆیێ دەردچیت كەسەكێ ئاڤاكری و خودان شیان بیت، كەسەك بیت یێ پشكدار بیت د ئاڤاكرنا جڤاكی و هەمی سەكتەرێن دیتر یێن ژیانێ، كو هەتا نوكە پتر ژ سیه هزار گەنجێن ڤی وەلاتی ژ زانكۆیا دهۆك دەرچووینە و ئەڤەژی مەزنترین خزمەتا گەشەپێدانێ یە زانكۆیێ پێشكێشی جڤاكی بگشتی و ڤێ دەڤەرێ ب تایبەتی دكەت.
ل دویف دا عەبولرەحمان جەعفەر خودانێ پێرو گرۆپ و رێكخەرێ پەنەلی پرێزنتێشنەك ب داتا و ئامارا ل دۆر چاوانیا پێشخستنا سەكتەرێ ئابووری ژ هەمی رویەكی ڤە پێشكێش كر.
پاشی د. محەمەد شوكری سەرۆكێ دەستەیا وەبەرهێنانێ ل هەرێما كوردستانێ ب بابەتەكی پشكدار بوو و رۆنكرن دانە سەر بەرنامێن كابینا نەهێ یا حكومەتا هەرێما كوردستانێ و رێنما و یاسایێن دەستەیا وەبەرهێنانێ و چاوانیا هاندانا وەبەرهێنەران ژ بۆ گەشەپێدانا ئابووری ل كوردستانێ ب گشتی و سنۆرێ پارێزگەها دهۆكێ ب تایبەتی، ل دویف دا چەند پەنەلێن دی یێن ئابووری هاتنە پێشكێش كرن و دانوستاندن ل دۆر ناڤەروكا بابەتێن وان هاتنە كرن.