كۆلیژا زانستێن سیاسی ل زانكۆیا دهۆك ب هەڤكاری دگەل كۆلیژێن زانستێن سیاسی ل زانكۆیێن سلێمانی، سەلاحەددین، سوران سیمپۆزیومەكا زانستی ل رۆژا چارشەمبی 29/9/2021 ل هۆلا كونفرانسان ل زانكۆیا دهۆك ل ژێر ناڤێ (هەلبژارتنێن 2021 ێ یێن پەرلەمانێ عیراقێ: دەرفەت و پرسگرێك) ب پشكداریا نوینەرێن لایەنێن سیاسی ل هەرێما كوردستانێ ساز كر.
ئەڤ سیمپۆزیوما زانستی كو ب هەلكەفتا هەلبژارتنێن پەرلەمانێ عیراقێ بوو، سەرۆكێ زانكۆیا دهۆك، د. داود ئەتروشی، د پەیڤەكی دا بەحسێ گرنگیا گێرانا ڤان جۆرە هەڤگەهشتنان كر، و گۆت ئەو حكومەتا پشتی ڤان هەلبژارتنان دهێتە پێك ئینان پێدڤیە ڤەكۆلینێن زانستی بكەتە ژێدەر بۆ چارەكرنا ئاریشێن روی ب روی عیراقێ دبن.
ل دویف دا رێكخەرێ سیمپۆزیومێ د. هەوار نێروەی راگرێ كۆلیژا زانستێن سیاسی ل زانكۆیا دهۆك د پەیڤەكی دا ئاماژە دا ئەنجامدانا ڤێ سیمپۆزیومێ و بەحسێ رەوشا عیراقێ كر و گۆت پشتی هەر هەلبژارتنەكی عیراقی تووشی هەڤركیەكی بوویە، و ئاماژە دا سێ سینارویان بۆ پشتی هەلبژارتنان، ئەو رەوشا نوكە هەی دێ وەكو خۆ مینیت، یان دێ هەڤدژی پەیدا بن بدژی ئەمریكا و هەڤپەیمانێن وێ ل عیراقێ، یان ژی دێ عیراقێ رادەستی هێزێن ملیشیات بیت.
د روینشتنا دەستپێكێ دا كو یا تایبەت بوو ب لایەنێن سیاسی ڤە هەر ئێك ژ د. جەعفەر ئێمینكی ژ پارتی دیموكراتی كوردستان، و سەعدی ئەحمەد پیرە، ژ ئێكەتی نشتیمانی كوردستان، و ستەم كامل ژ بزاڤا گۆران، و خەلیل ابراهیم ژ یەكگرتوی ئیسلامی كوردستان تێدا د پشكدار بوون، و دیتنا لایەنێن خۆ بۆ هەلبژارتنان و گرنگیا ڤان هەلبژارتنان بۆ پاشەرۆژا عیراقێ و هەرێما كوردستانێ دیاركرن.
د ڤێ سیمپۆزیومێ دا سێ پەنەلێن زانستی دێ هێنە گەنگەشە كرن، ئێك ل دۆر رەوشا سیاسی یا هەرێما كوردستانێ و عیراقێ، پەنەلێ دووێ ژی ل دۆر خاندنەكا ئەكادیمی بۆ هەلبژارتنێن عیراقێ، و پەنەلێ دووماهیێ ژی دێ رەهندێن هەرێمایەتی و نێڤدەولەتی و ئاستەنگ و پێشبینی هێنە بەحس كرن، كو د هەر پەنەلەكی ژ ڤان دا چار ڤەكۆلینێن زانستی هێنە گەنگەشە كرن.
ئەڤ سیمپۆزیومە بۆ دەمێ ئێك رۆژە و پشتی ب دووماهی دهێت دێ راسپارد و ئەنجام هێنە دیاركرن.