ب مەرەما بهێزکرنا هەڤکاری و هەماهەنگیێ د ناڤبەرا زانکۆیا دهۆک و رێڤەبەریا گشتی یا پەروەردا دهۆکێ دا، ئەڤرۆ رێکەڤتی ١١/٩/٢٠٢٢ شاندەکێ زانکۆیا دهۆک ب سەرۆکاتیا د. داود سلێمان ئەتروشی سەرۆکێ زانکۆیا دهۆک و دگەلدا هەردوو هاریکارێن سەرۆکێ زانکۆیێ د. ئەحمەد محەمەد سالح و د. لوقمان هادی حەسەن و هژمارەکا بسپۆرێن پەروەردەیی یێن زانکۆیا دهۆک دگەل بریاردەرێن پەروەردەیی ل رێڤەبەریا ناڤبری کۆمبوو.
د کۆمبوونێ دا، رێڤەبەرێ گشتیێ پەروەردا پارێزگەها دهۆکێ، عومەر عەلی تاها، ب گەرمی پێشوازی ل شاندێ زانکۆیا دهۆک کر و ب ئامادەبوونا رێڤەبەرێن سەرپەرشتیاریێ و رێڤەبەرێن پەروەردەیێن قەزایێن پارێزگەهێ، دانوستاندن لدۆر سێ تەوەرێن سەرەکی هاتە کرن، ئەوژی؛ دابینکرنا دەلیڤەیێن تمامکرنا خواندنێ ل زانکۆیا دهۆک بۆ مامۆستایێن رێڤەبەریا پەروەردێ ب مەرەما بلندکرنا ئاستێ زانستی، دەستنیشانکرنا هندەک قوتابخانا ژ لایێ پەروەردێ ڤە کو ببنە قوتابخانێن هەڤال و سەرپەرشتیێ لێبکەت و پێشڤەببەت و هەروەسا هندەک بابەتێن گرێدای مەشق و راهێنانێ.
د. داود ئەتروشی د کۆمبوونێ دا خویاکر، خواندنا بلند و پەروەردە دوو کەرتێن هەری نێزیکن ژ ئێک و پێدڤیە پەیوەندیێن ڤان هەردوو کەرتا چ سنوور نەبن، سەرۆکێ زانکۆیێ ئەوژی راگەهداند "ئێک ژ پێشینەیێن گرنگێن زانکۆیا دهۆک کولیژێن پەروەردەیینە، ئەڤە ژی ب مەرەما بلندکرنا کوالتیا مامۆستایێ دەرچوویێ زانکۆیا دهۆک، ئەڤ یەکە ژی دبیتە ئەگەرێ پێشڤەبرنا ئاستێ پەروەردەیی، ئەڤ هەماهەنگی و پرۆژێن هەڤپشک دێ پتر ڤێ ئارمانجێ بجهئینن".
ژ لایێ خۆ ڤە رێڤەبەرێ گشتیێ پەروەردا دهۆکێ خۆشحالیا خۆ ب دەستپێێشخەریا زانکۆیا دهۆک دەربری و بەرهەڤیا رێڤەبەریا خۆ دیارکر بۆ هەر هەڤکاریەکێ و راگەهاند "کێشا سەرەکی د پرۆسێسا پەروەردەیی دا مامۆستایە، ب بلندترکرنا کوالتیا مامۆستای، ئاریشێن پەروەردێ کێمتر لێدهێن، لەورا د وێ باوەریێ داینە ئەڤ هەماهەنگی و نێزکبوونە دێ گەلەک گۆرانکاریێن ئەرێنی لدویڤ خۆ هێلیت".
هەر د کۆمبوونێ دا مامۆستا و رێڤەبەر و بسپۆرێن ئامادەبووی دانوستاندنێن تێروتەسەل لدۆر تەوەرێن سەرەکیێن کۆمبوونێ کرن و هژمارەکا پێشنیاران هاتنە گەنگەشەکرن و باس ل چەوانیا بەردەوامیدانێ ب ڤان پەیوەندیان هاتە کرن.