ب مەرەما دروستکرنا پەیوەندیێن زانستی لسەر ئاستێ بسپۆریا بایۆلۆجی، سەرۆکێ زانکۆیا دهۆک د. داوود سلێمان ئەترووشی و هەروەسا د. ئەحمەد محەمەد سالح هاریکارێ سەرۆکێ زانکۆیێ و ب ئامادەبوونا هژمارەکا بسپۆرێن بوارێ بایۆلۆجی ل زانکۆیا دهۆک، کۆمبوونەک دگەل شاندەکێ بسپۆرێن زانکۆیا یاگیلۆنیان یا پۆلەندی کۆمبوو، شاندێ ناڤبری پێکهاتیبوو ژ د. گرزێگۆرز دۆبین، د. کریستۆڤ پێرج و د. ئانا زارنا و دگەل رێکخەرێ ڤێ کۆمبوونێ د. عەبدولکەریم یاسین بسپۆرێ بایۆلۆجی ل زانکۆیا سەلاحەدین.
د. داوود سلێمان ئەترووشی پشتی ب خێرهاتنێ، باس ل ژێرخانا زانکۆیا دهۆک د بوارێ بسپۆریا بایۆلۆجی دا کر و ئاماژە دا کولیژ و پشکێن پەیوەندیدار ب ڤێ بسپۆریێ ڤە و گرنگیدا دەلیڤەیێن بهێزکرنا هەڤکاری و هەماهەنگیێ دگەل زانکۆیا یاگیلۆنیان یا پۆلەندی، هەروەسا دیارکر کو د پلانا زانکۆیا دهۆک دایە سەرەدانا زانکۆیا ناڤبری بکەن ب مەرەما پتر لێکنێزیکنوون و تێکگەهشتنێ بۆ ئەنجامدانا پرۆژێن هەڤپشک.
ژ لایێ خۆ ڤە شاندێ ناڤبری شرۆڤەکرنەکا تێروتەسەل دا کەتوارێ ڤێ بسپۆریێ ل زانکۆیا وان و باس ل هەڤکاریێ د بوارێ تاقیگەهـ و پێکگوهارتنا قوتابی و بسپۆر و راهێنەرێن د ڤی بواری دا و دیارکر د شیاندایە زانکۆیا دهۆک بەرنامەیێن پۆست دکتۆرایێ دگەل زانکۆیا وان هەبن.
ژ لایێ خۆ ڤە د. ئەحمەد محەمەد سالح وەکو بسپۆر د بوارێ بایۆلۆجی دا ئاماژەدا وێ یەکێ کو دشیاندایە ئەم داتایان د بوارێن جودا یێن بایۆلۆجی دا کۆمبکەین و تەکنۆلۆجیا وان بکاربینین بۆ شرۆڤەکرنا ڤان داتایان، هەروەسا باس ل گرنگیا ڤەکۆلینێن هەڤپشک د ناڤبەرا هەردوو زانکۆیان دا کر.
دیسان بسپۆرێن بوارێ بایۆلۆجی ل زانکۆیا دهۆک دگەل شاندێ بسپۆرێن پۆلەندی دانوستاندن ئەنجامدان و کەتوارێ ڤی بوارێ زانستی ل زانکۆیا دهۆک شرۆڤەکر و دەلیڤەیێن پتر پێشڤەبرنێ هاتنە باسکرن.
هەژی ئاماژێ یە زانکۆیا دهۆک بەردەوام د بزاڤێ دایە لسەر بنەمایێ بسپۆریێن جودا هەماهەنگی و هەڤکاری و پرۆژێن هەڤپشک دگەل زانکۆیێن جیهانێ ئەنجامبدەت، ب مەرەما پتر پێشڤەبرنا کارێ ئەکادیمی ل زانکۆیا دهۆک. زانکۆیا یاگیلۆنیان ژی ئێکە پێشکەڤتیترین زانکۆیێن پۆلەندی و هەروەسا کەڤنترین زانکۆیە ل پۆلەندا کو ل سالا ١٣٦٤ێ هاتیە دروستکرن.