ل رۆژا 2-5-2016 پرۆفیسور د. دزول كیفلی عەبدولرەزاق سەرۆكێ ئێكەتیا زانكۆیێن جیهانێ IAU سەرەدانا زانكۆیا دهۆك كر و ژلایێ پروفیسور د.مسلح دهۆكی سەرۆكێ زانكۆیا دهۆك پێشوازی لی هاتە كرن.
د رونشتنەكێ دا ب ئامادەبوناجڤاتا زانكۆیا دهۆك بەحسێ چاوانیا مفا وەرگرتنیً ژ ئەندامەتیا زانكۆیا د ئێكەتیا زانكۆیێن جیهانێ و پتر هەڤكاریكرنا دناڤبەرا هەردوولایان دا هاتە كرن هەروەسا بەردەوامی دان و پیًشخستنا پروگورامێن هەڤپشك دگەل زانكۆیا دهۆك هاتنە بەحسكرن.
د كونگرەكێ رۆژنامەڤانی دا پروفیسور د.مسلح دهۆكی گوت سەرەدانا سەرۆكێ ئێكەتیا زانكۆیێن جیهانێ بۆ هەرێما كوردستانێ و زانكۆیا دهۆك بو جارا ئێكێ وێ چەندێ دیار دكەت كو باوەری یا ب ئاست و بارەدوخێ زانكۆیا دهۆك هەی كو دێ بێتە پالدەرەك بۆ بەرەڤ پێشڤەبرنا ئاستێ ئەكادمی دناڤبەرا زانكۆیا دهۆك و ئێكەتیا زانكۆیێن جیهانێ.
پرۆفیسۆر د. مسلح دهۆكی هەروەسا گۆت پشتی سەرۆكێ ئێكەتیا زانكۆیێن جیهانێ گەریانەك دناڤ كەمپێ زانكۆیێ كری و ئاستێ زانكۆیا دهۆك دیتی بۆ مە دیاركر حەزدكەت كونفرانسی بهێت یێ ئێكەتیا ناڤبری ئەوی دێ ل سالا 2019 یان 2020 هێتە گێران ل زانكۆیا دهۆك بیت و ئەڤە بخو دەسكەفتە كێ مەزنە.
سەرۆكێ ئێكەتیا زانكۆیێن جیهانێ پرۆفیسور د. دزول كیفلی عەبدولرەزاق سوپاسیا سەرۆكێ زانكۆیێ پرۆفیسۆر د. مسلح دهۆكی كر بۆ روخساندنا ڤێ دەلیڤێ كو سەرەدانا زانكۆیا دهۆك و هەرێما كوردستانێ كری و گوت زانكۆیا دهۆك وەك هەر زانكۆیەكا جیهانێ یا سەردانا وێ دكەن بۆ دیاركرنا كاریگەریا وێ ل سەر جڤاكێ وی دەڤەرا لێ و باش پشنیاركرنا چاوانیا پێشڤەبرنا وێ ژ بەر ڤێ چەندێ ئەندامەتیا زانكۆیا دهۆك گەلەك یا گرنگە دناڤ ئێكەتیا زانكۆیێن جیهانێ دا.
دهێتە زانین كو بتر ژ 600 زانكۆیان ئەندامن د ئێكەتیا زانكۆیێن جیهانێ دا ژ 120 وەلاتان و ئەڤ ئێكەتیە یا گریدایە ب رێكخراوا یونسكو ڤە.