ل رۆژا 17/12 كو دبیتە رۆژا ئالایێ كوردستانێ ل هەمی كۆلیژێن زانكۆیا دهۆك رێورەسم ب ڤێ هەلكەفتێ هاتنە ئەنجام دان و ئاهەنگ بۆ قوتابیان هاتنە سازكرن و ئالا هاتنە بلند كرن، ل ناڤەندا قوتابیان ژی ب ئامادەبوونا سەرۆكێ زانكۆیێ ئاهەنگەك ب ڤێ هەلكەفتێ هاتە ئەنجام دان.
سەرۆكێ زانكۆیا دهۆك پ. د. مصلح دهۆكی ل ئاهەنگا ناڤەندا قوتابیان د پەیڤەكی دا گۆت ساخكرنا رۆژا ئالایێ كوردستانێ بیرئانینە ل پیرۆزیێن نەتەوەی و نشتیمان پەروەریێ و بەرگریا ژ وەلاتی دهێتە كرن، چونكو ئالایێ كوردستانێ سمبۆلا بەرخودان و خەباتا مللەتێ كوردە، نیشانا هەڤگرتن و ناسناما مللەتێ مەیە، هەروەسا ساخكرنا ڤێ رۆژێ ساخكرنا پارستنا ناسناما مللەتێ مەیە و دانە نیاسینا دوزا گەلێ مەیە بۆ هەمی جیهانێ.
هەروەسا گۆت مللەتێن خودان شارستانیەت پارستنا كلتۆر و مێژۆ و سمبۆل و زمان و ناسناما خۆ دكەن، و رێزێ ل پیرۆزیێن خۆ دگرن، لەورا ساخكرنا ڤێ رۆژێ ژی رێزگرتنە بۆ خوینا وان شەهیدێن ل بن سیبەرا ڤی ئالایێ پیرۆز شەهید بووین و رحا خۆ كرینە قوربانی بۆ ئاخا وەلاتێ خۆ و نەهێلاین دەستێن چەپەل دەست درێژیێ بكەنە سەر ئاخا وەلاتێ وان.
ئاماژە دا وێ چەندێ ژی كو ئەم وەكو زانكۆیا دهۆك ب ئەركێ خۆ دزانین كو بەری هەر لایەنەكی ڤان رۆژێن هوسا رێزێ لێ بگرین و ب چالاكیێن جودا جودا وان پەیاما بگەهینین ئەوێن كو پێدڤیە ل سەر مە د ڤان هەلكەفتان دا بهێنە گەهاندن و ب رەنگەكێ زانستی و ئەكادیمی بگەهنە جڤاكی.
هەر ل ئاهەنگا ناڤەندا قوتابیان كۆنسێرتەكا هونەری ژ لایێ گرۆپێ مۆزیكێ زانكۆیا دهۆك ڤە هاتە كرن ب پشكداریا چەند مامۆستا و قوتابیێن زانكۆیێ.