ب ئامادەبوونا سەرۆکێ زانکۆیا دهۆک، د. داوود ئەترووشی، کولیژا پزیشکی ل زانکۆیا دهۆک ب هەڤکاری دگەل کولیژا شاهانە یا پزیشکا ل بریتانیا و ب پشتەڤانیا کۆمەلا نیڤدەولەتیا رەقبوونا دەمارێن خوینێ، کۆربەندەک لدۆر ئێشا شەکرێ، رەقبوونا دەمارێن خوینێ و سەربارکێن دەمارێن هویرێن خوینێ ئەنجامدا. ئەڤ کۆربەندە، ئەوێ ئەڤرۆ رێکەڤتی ٣/٣/٢٠٢٢ ل سەنتەرێ کۆنفرانسان ل زانکۆیا دهۆک، ب بەرهەڤبوونا د. ئەحمەد محەمەد سالح، هاریکارێ سەرۆکێ زانکۆیا دهۆک، د. نازم سلێمان، سەرۆکێ زانکۆیا زاخۆ و د. ئەفراسیاب مووسا، رێڤەبەرێ گشتیێ ساخلەمیێ ل پارێزگەها دهۆکێ هاتیە سازکرن، نویکرنا کۆربەندێن پێشین بوو، بۆ شیرەتکار و مەشقکریێن بوارێ پزیشکی.
د ڤێ کۆربەندێ دا، کو ئەڤە سێیەم جارە زانکۆیا دهۆک ئەنجامددەت، دوو نۆشدارێن نیڤدەولەتی یێن ناڤدار لدۆر بابەتێن کۆربەندی سمینار پێشکێشکرن، ئەوژی د. هندرین سۆران، وەکو پرۆفیسۆرەکێ کورد ل سازیا نەخۆشخانەیێن زانکۆیا مانچستەر یا ناڤەندی ل بریتانیا و دیسان د. ریاض مالک، کو خەلکێ وەلاتێ قەتەرە و ل زانکۆیا پاکستان یا پزیشکی کاردکەت، هەردوو دکتۆرێن ناڤبری تایبەتمەندێن ئێشا شەکری، چەوری و رەقبوونا دەمارێن خوینێنە.
راگرێ کولیژا پزیشکی ل زانکۆیا دهۆک د. دلدار حاجی، لدۆر بابەتێن ڤێ کۆربەندی دیارکر "هەردوو دکتۆرێن پەنالیست نویترین پێشڤەچوونێن پزیشکی دەربارەی ئێشا شەکرێ، رەقبوونا دەمارێن خوینێ و سەربارکێن دەمارێن هویرێن خوینێ ل سەرانسەری جیهانێ، بۆ قوتابی و فەرمانبەرێن پزیشکی شرۆڤەکرن". هەروەسا هەر ئەڤرۆ روینشتنەکا دی یا پشتی نیڤرۆ بۆ نێزیکی ٣٠ قوتابیێن خواندنا بلند لدۆر هەمان بابەت هاتە ئەنجامدان.
هەژی ئاماژێ یە کو ئەڤە سێیەم جارە زانکۆیا دهۆک ڤی کۆربەندی سازدکەت، ئێکەم جار ل سالا ٢٠١٧ێ و جارا دووێ ژی ل ٢٠١٩ێ بوو. لدۆر بوها و گرنگیا ڤی کۆربەندی و هەڤپشکێن زانکۆیا دهۆک، د. دلدار حاجی دیارکر "سەرکەڤتنەکا مەزنە بۆ زانکۆیا دهۆک کو هەماهەنگی دگەل کولیژا شاهانە یا پزیشکان ل بریتانیا، وەکو ئێک ژ ناڤدارترین زانکۆیێن جیهانێ، هەبیت و ئەم بشێین پێکڤە وەکو هەڤپشک ڤان جۆرێن خرڤەبوونا ئەنجامبدەین، ئەڤ هەماهەنگیە دێ بەردەوام بیت".
دهێتە زانین ئەڤ کۆربەندە ژ لایێ ١٦ کومپانیێن پزیشکی یێن جیهانی ڤە دهێتە پشتەڤانیکرن و ستافێ پزیشکی ژ جهێن جودایێن کوردستانێ لێ ئامادەبوون، وەکو؛ هەولێر، سلێمانی، دهۆک و زاخۆ.