دهۆک، کوردستان؛ ٢ـی نیسانێ ٢٠٢٤
ب مەرەما پتر هایداربوونێ ل دۆر پرۆژە و بەرنامێن هەڤپشک ل ناڤبەرا زانکۆیا دهۆک و وەلاتێ ئەمریکا و بهێزترکرنا هەڤکاری و هەماهەنگیێ، ئەڤرۆ رێکەڤتی٢ـی نیسانێ ٢٠٢٤، شاندەکێ قونسلخانەیا گشتیا ئەمریکا ل هەولێرێ، ب سەرۆکاتیا دەگ مۆڕۆ، بەرپرسێ کاروبارێن گشتی ل قونسلخانەیا گشتی یا ئەمریکا، گەهشتە زانکۆیا دهۆک و ژ لایێ د. داود سلێمان ئەتروشی ڤە، سەرۆکێ زانکۆیا دهۆک هاتە پێشوازیکرن.
د روینشتنەکێ دا ل کوژیێ ئەمریکی ل زانکۆیا دهۆک، و ب ئامادەبوونا ستافەکێ نڤیسینگەها پەیوەندیێن ناڤدەولەتی، د. داود ئەتروشی ب گەرمی پێشوازیا شاندێ مێڤان کر و کار و پرۆژێن زانکۆیا دهۆک بۆ دانە نیاسین و باس ل پەیوەندیێن ناڤدەولەتیێن فراوان یێن زانکۆیا دهۆک کر، کو زانکۆیا دهۆک د ڤی بواری دا وەکو پێشەنگ ل دەڤەرێ دهێتە نیاسین. هەروەسا هەر ئێک ژ د. ئەحمەد خەیرەددین عەلی، رێڤەبەرێ سەنتەرێ پەرەپێدانا کاری و مامۆستا دلین سەردار زوهدی، رێڤەبەرا سەنتەرێ خواندنێن یەكسانی یا جێندەری ل زانکۆیا دهۆک باس ل هژمارەکا پرۆژە و پلانێن گرێدای بیاڤێن کارێ وان کرن و دانوستاندن ل دۆر هاڤکاری و هەماهەنگیێ د بیاڤێن جودا دا کرن.
ژ لایێ خۆ ڤە، بەرپرسێ کاروبارێن گشتی ل قونسلخانەیا گشتی یا ئەمریکا ل هەولێرێ پەسنا کار پرۆژێن سەرکەڤتی یێن زانکۆیا دهۆک کر و دیارکر کو کوژیێ ئەمریکی ل زانکۆیا دهۆک چالاکانە کاردکەت و ئەزمۆنەکا سەرکەڤتی تۆمارکریە و دەستخۆشی ل ستافێ وێ کر بۆ کار و چالاکیێن د چارچۆڤێ ڤی کوژی دا ئەنجامدەت.
ل دویڤ دا شاندێ قونسلخانەیا گشتی یا ئەمریکی ل هەولێرێ روینشتنەک ل گەل هژمارەکا خۆبەخشێن د چارچۆڤێ کوژیێ ئەمریکی دا کاردکەن ئەنجامدا و تێدا دانوستاند ل دۆر بابەتێن جودا ئەنجامدان و دەستخۆشی ل وان کر بۆ کار و خزمەتێن وان.
راگەهاندنا زانکۆیا دهۆک
عسمەت خابوور
وێنەگرتن: محەمەد عەبدولکەریم