ئەنجامێن پرۆژەیێ جاككرنا شیانێن نافخویی بۆ دروستكرنا ئاشتیێ ل دهۆكێ و مووسل ل زانكۆیا دهۆك هاتنە راگەهاندن
ب بەرهەفبوونا ه. سەرۆكێ زانكۆیێ بۆ كارۆبارێن كارگیری د.حەجی موسا و قائممقامێ دهۆكێ جەهوەر ئاكرەیی و كومەكا رەوشەنبیر و جالاكڤانێن مەدەنی، سەنتەرێ ئاشتی و جارەسەریا ململانێ ل زانكۆیا دهۆك، ئەنجامێن پرۆژەیێ جاككرنا شیانێن نافخویی بۆ دروستكرنا ئاشتیێ و هەڤگرێدانا جڤاكی دناڤبەرا جڤاكی مێهڤاندار و ئاوارە ل هەر دوو پارێزگەهێن دهۆك و مووسل ل هولا سەنتەرێ رەوشەنبیری و جڤاكی ل زانكۆیا دهۆك راگەهاندن.
ه. سەرۆكێ زانكۆیێ بۆ كارۆبارێن كارگیری د.حەجی موسا گۆت: سوپاسیا زانكۆیا نیویورك یا ئەمریكی دكەم ژبۆ هەماهەنگیا وێ دگەل زانكۆیا دهۆك ژبۆ ئەنجامدانا ڤی پروژەیی، كۆ سەركەفتنەكا مەزن ب دەستخو ڤە ئینایە و شیایە پێزانین باش لسەر رەوشا ئاوارەیان ل هەر دوو پارێزگەهێن دهۆك و مووسل بدەستخوڤە بینیت و رێكێن جارەسەریێ بۆ هەر ئاریشەكێ دەست نیشان بكەت، دهەمان دەمدا خالەكا هەرە گرنگ تێدا دیار بوویە ئەو ژی تێكهەلیا خەلكێ ئاوارە دگەل خەلكێ دەڤەرێ و هوسا پێكڤە ژیان بەرقەرار دبیت.
ه. سەرۆكێ زانكۆیێ بۆ كارۆبارێن كارگیری گۆت ژی: گەلەكا گرنگە هەماهەنگی دناڤبەرا دەزگەهێن حكومی یێن پەیوەندیدار و جڤاكی و زانكۆیێ دا هەبیت ژبۆ جارەسەركرنا هەر ئاریشەكا دكەفتە درێكا پێكڤە ژیانێدا ل پارێزگەها دهۆكێ، ل دووماهیێ ژی گەلەك سۆپاسدارێن پێشمەرگەیێ قەهرەمانین یێن سنورێن كوردستانێ ب خوینا خو دەست نیشان كرین و دەڤەرێن دەرڤەیی هەرێمێ ئیناینە دباوەشا هەرێما كوردستانێدا.
ئەڤ پرۆژەیە ژلایێ سەنتەرێ ئاشتی و ململانێ ل زانكۆیا دهۆك و ب هەماهەنگی دگەل سەنتەرێ نیڤدولەتی ل زانكۆیا نیویورك و پێشتەڤانیا بەرنامەیێ نەتەوەیێن ئێكگرتی بۆ ئاڤاكرنێ هاتیە بجهئینان و ژلایێ مامۆستایێ زانكۆیا دهۆك (خدر دوملی) ڤە ئەڤ روونشتنە هاتە پرێڤەبرن.