د.بێشكچی: چ مەترسی ل سەر ریفراندومێ‌ نینن و دڤێت كوردستان یا رژد بیت ل سەر ئەنجامدانا وێ‌
Sept. 17, 2017, 8:53 p.m.

دكتور ئیسماعیل بێشكچی:
چ مەترسی ل سەر ریفراندومێ‌ نینن و دڤێت كوردستان یا رژد بیت ل سەر ئەنجامدانا وێ‌
دكتور ئیسماعیل بێشكچی نڤیسەرێ‌ تورك و دوستێ‌ گەلێ‌ كورد د كورەكی دا ل رۆژا 14/9/2017 ل ناڤەندا قوتابیان ل زانكۆیا دهۆك دیاركر كو چ مەترسی ل سەر ئەنجامدانا ریفراندومێ‌ نینن و دڤێت هەرێما كوردستانێ‌ یا رژد بیت ل سەر ئەنجامدانا وێ‌. 
بێشكچی هەروەسا دیاركر كو دڤێت بەری نوكە ب تایبەتی ل سەدێ‌ بۆری كوردان دەولەتا خۆ هەبا و ئەڤ دەولەتبوونە گەلەك هاتە پاشخستن بەلێ‌ نوكە ژی دەمە كو ریفراندۆم بۆ دەولەتبوونێ‌ بهێتە كرن و كورد دەولەتا خۆ ب راگەهینن، هەروەسا دڤێت خەلكێ‌ كوردستانێ‌ ژی ب ورەكا مەزن ڤە قەستا سەر سندوقێن دەنگدانێ‌ بكەن و بێژن بەلێ‌ بۆ ریفراندومێ‌. 
دكتور ئیسماعیل بێشكچی د پشكەكا دیتر یا پەیڤا خۆدا گوت دڤێت حزب و لایەنێن كوردستانێ‌ ناكوكیێن خۆ یێن نافخۆی بدەنە لایەكی و د هاریكار بن بۆ ڤێ‌ پرۆسێ‌ داكو ب ئەنجامێ‌ خۆ بگەهیت، هەروەسا دیاركر كو جڤاكێ‌ نێڤدەولەتی و وەلاتێن جیهانێ‌ ژی ئەوێن نوكە دژایەتیا ریفراندۆمێ‌ دكەن دەمێ‌ بۆ كەتوارەك دێ‌ سەرەدەریێ‌ ل گەل كەن، چونكو بۆ فیدرالیێ‌ ژی هەر هندەك ژ ڤان وەلاتان بوون دبوونە رێگر و نوكە یێ‌ سەرەدەریێ‌ ل گەل دكەن. 
سەرۆكێ‌ زانكۆیا دهۆك پرۆفیسۆر د. مسلح دهۆكی د پەیڤەكی دا گۆت ئەو رژێمێن هەتا نوكە دەستهەلات ل مە كرین هەمیا زولم و ستەم یێن ل ڤی مللەتی كرین و چ جاران نەهێلایە بگەهینە هیڤیێن خۆ، ئەگەر جارەكی دەلیڤەك ژی پەیدا ببیت یا هاتیە ژ ناڤ برن و ئەو كەسێن ب ڤان شۆرەشان ژی رابووین هەولا كوشتن و گرتنا وان یا هاتیە دان، تەنانەت ئەگەر دوستەكێ‌ گەلێ‌ كورد ژی بەحسێ‌ دوزا كوردی كر بیت یێ‌ هاتیە ئەشكەنجە دان و زیندان كرن، نموونە ژی ل سەر ڤێ‌ گۆتنا مە دوستێ‌ دێرینێ‌ گەلێ‌ كورد (د. ئیسماعیل بێشكچی) كو ب خۆشحالی ڤە ئەڤرۆ مێڤانێ‌ زانكۆیا دهۆكە، كو سەرا بەرەڤانی كرنا وی ژ دوزا گەلێ‌ كورد چەندین سالێن ژیانا خۆ د زیندانان ڤە دەرباز كرینە و هەتا نوكە ژی هەر پشتەڤانێ‌ ڤێ‌ دوزا مە یا رەوایە، ژ بەر ڤێ‌ تێكوشین و بزاڤێن وی یێن بەردەوام د پشتەڤانی كرنا دوزا كوردی د چاڤێن هەر كوردەكی دا رێزا خۆ یا تایبەت یا هەی.
پرۆفیسۆر د. مسلح دهۆكی ئەو ژی دیاركر كو وەكو زانكۆیا دهۆك ب ئەركێ‌ خۆ زانیە سەنتەرەكێ‌ ڤەكۆلینان ب ناڤێ‌ (سەنتەرێ‌ بێشكچی بۆ ڤەكۆلینێن مرۆڤاتیێ‌) ڤەكریە، چونكو بێشكچی نە ب تنێ‌ دوستەكێ‌ مەیە وەكو هەمی دوستێن دیتر یێن گەلێ‌ كورد بەلكو ئەم وی ب ئێك ژ خۆ دزانین وەكو زانایەكێ‌ ڤی گەلی، ئەم هوسا سەرەدەریێ‌ دگەل دكەین، نموونەك ژی ل سەر ڤێ‌ گۆتنا خۆ ئینا و گۆت بێشكچی دەمێ‌ گەهشتیە فروكەخانێ‌ ئەو پۆلیسێ‌ پاسپۆرتان كونترۆل دكەت دەمێ‌ پاسپۆرتا بێشكچی چوویە بەر دەستێن وی چونكو وی بەری نوكە بێشكچی نەدیت بوو و ب تنێ‌ ناڤ و خەباتا وی گوه لێ‌ بوویە ئێكسەر ژ پێش بێشكچی ڤە رابوو ڤە و سلاڤەكا سەربازی بۆ بێشكچی كر، ئەڤە نیشانا وێ‌ چەندێ‌ یە كو ئەڤ سەرەدەیا ل گەل جەنابێ‌ وی دهێتە كرن جەنابێ‌ وی كەسەكێ‌ مەزنە د چاڤێن هەر كوردەكی دا و وی بخۆ ئەڤ جهە یێ‌ ددلێ‌ هەر كوردەكی دا چێكری.
سەرۆكێ‌ زانكۆیا دهۆك هەروەسا گۆت یا گرنگ ئەوە ئەم هەمی پشتەڤانێن ریفراندومێ‌ بین و هەر ئێك ژ مە ژلایێ‌ خۆ ڤە هاندەرێ‌ خەلكی بیت بەرەف سندوقێن دەنگدانێ‌ ڤە بچن و بێژن بەلێ‌ بۆ ریفراندۆمێ‌ بەلێ‌ بۆ دەولەت بوونێ‌ بەلێ‌ بۆ سەرخوەبوونێ‌، چونكو ب تنێ‌ سەرخوەبوون دێ‌ بیتە رێیەك كو جارەكا دی ئەڤ جینۆساید و دەردەسەریێن ب سەر گەلێ‌ مە دا هاتین دووبارە نەبنە ڤە، سەرخوەبوون دێ‌ بیتە رێگر جارەكا دی رژێمێن دكتاتۆر چەكێن خۆ یێن كیمایی ب مە تاقی نەكەنە ڤە، ب تنێ‌ سەرخوەبوون دێ‌ برینێن مە یێن هندە سالان سارێژ كەتە ڤە، لەورا بەلێ‌ و هزار جارا بەلێ‌ بۆ ریفراندۆم و سەرخوەبوونێ‌.
ئەڤ روینشتنە سەنتەرێ‌ بێشكچی بۆ ڤەكۆلینێن مرۆڤاتیێ‌ ل زانكۆیا دهۆك بۆ دكتور ئیسماعیل بێشكچی رێكخستبوو، كو دكتور ئیسماعیل بێشكچی هەتا نوكە پتر ژ دەه پەرتووكان ل دۆر دوزا گەلێ‌ كورد نڤیسینە و سەرا ڤان نڤیسینێن خۆ چەندین جاران ل توركیا هاتیە زیندان كرن.