یانا رەوشەنبیریا كۆلیژا زانستێن مرۆڤایەتی ل زانكۆیا دهۆك ب هەڤكاری ل گەل دەزگەهێ نالبەند یێ چاپ و وەشانێ ل دهۆكێ ل رۆژا 13/4/2017 ب هەلكەفتا بیرەوەریێن ئەنفالێن ڕەش رێورەسمەك ل ناڤەندا قوتابیان سازكرن.
د ڤی رێورەسمی دا كو هاریكارێ سەرۆكێ زانكۆیا دهۆك بۆ كاروبارێن قوتابیان د. مێڤان عارف یێ ئامادەبوو، راگرێ كۆلیژا زانستێن مرۆڤایەتی د. كەرەڤان ئامێدێ د پەیڤەكی دا دیاركر كو ئەڤ رێورەسمە ب هەلكەفتا یادا ئەنفالێن رەشە چونكو نابیت ئەم ببینە ئێخسیرێن مێژوویێ بەلكو دڤێت هەردەم مفایی ژێ ببینین داكو ئەڤ كارەسات و نەخۆشیە دوبارە نەبنەڤە.
ل دویف دا پەنەلەك بۆ هەردوو مامۆستایێن كۆلیژا زانستێن مرۆڤایەتی د. سالم جاسم و سوزان ناسر مستەفا هاتە سازكرن و تێدا ئەگەر و فاكتەرێن ئەنفال و جینوساید كرنا گەلێ كورد و قووناغ و هەوێن ئەنفالكرنا كوردستانێ هاتنە بەحس كرن و سوزان ناسر گۆت ل رۆژا 14 نیسانا سالا 1988 ل دەڤەرا گەرمیان 20 هزار كەس هاتنە ئەنفال كرن لەورا ئەڤ رۆژە بۆ بیرئینانا كارەساتێن ئەنفالان هاتیە دیاركرن، ئەو چەند ژی بەحس كر كو ئەڤ هەوێن ئەنفالان ئەوێن حكومەتا بەعسا روخیایی ب دژی گەلێ كورد ئەنجام دایی ژلایێ حكومەتا بەحسا وی دەمی ڤە پلانەكا مەزن بۆ هاتبوو دارشتن و ئەڤ هەوێن ئەنفالان بۆ هەشت قووناغان دابەشكربوون.
پشتی ڤی پەنەلی چەند هەلبەستەك ژ لایێ قادر قەچاغ ڤە هاتنە خواندن و ل دویف دا شانوگەریەك ل دۆر ئەنفالان هاتە نیشادان.