ئەڤرۆ رێکەڤتی ١٧ـی چریا دووێ ٢٠٢٣ و ل سەرۆکاتیا زانکۆیا دهۆک، د. داود سلێمان ئەتروشی پێشوازی ل شاندەکێ زانکۆیا مووسل، ب سەرۆکاتیا د. وەحید رەمۆ هاریکارێ سەرۆکێ زانکۆیا مووسل، کر. د روینشتنەکێ دا ب ئامادەبوونا د. دلشاد عەبدولجەبار حەلیم هاریکارێ سەرۆکێ زانکۆیا دهۆک، دانوستاندن ل دۆر فراوانکرنا و بهێزترکرنا هەماهەنگی و هەڤکاریێ د ناڤبەرا زانکۆیا دهۆک و زانکۆیا مووسل دا هاتنەکرن.
د ڤێ روینشتنێ دا سەرۆکێ زانکۆیا دهۆک خۆشحالیا خۆ ب ڤێ سەرەدانێ دەربڕی و دیارکر "پەیوەندیێن زانکۆیا دهۆک و زانکۆیا مووسل دیرۆکینە، گەلەک بوار هەنە دشێین هەڤکاریەکا بهێزتر و پرۆژێن نوی یێن هەڤپشک دگەل زانکۆیا مووسل ئەنجامبدەین، داکو پتر خزمەتا پرۆسێسا ئەکادیمی و قوتابیێن هەردوو زانکۆیا بکەین".
ژ لایێ خۆ ڤە هاریکارێ سەرۆکێ زانکۆیا مووسل سوپاسیا سەرۆکێ زانکۆیا دهۆک کر بۆ پێشوازیا گەرم و خویاکر "مە پەیوەندیێن نێزیک دگەل زانکۆیا دهۆک هەنە و دشێین ڤێ نێزیکبوونێ بۆ بەرژەوەندیا هەردوو زانکۆیا و خەلکێ دەڤەرێ بکاربینین، پشتراستم ئەم ب هەڤرا دشێین گەلەک پرۆژێن هەڤپشک ئەنجامبدەین و د گەلەک بواران دا هەماهەنگی و هەڤکاریێ بکەین".
هەژی ئاماژێ یە زانکۆیا مووسل ل سالا ١٩٦٧ـێ هاتیە دامەزراندن و ژ ٢٣ کولیژان پێکدهێت و نێزیکی ٥٢ هزار قوتابیان لێ دخوینن. نوکە ژی سێ کولیژێن زانکۆیا دهۆک هەماهەنگی و هەڤکاری دگەل کولیژێن زانکۆیا مووسل هەیە، ئەوژی کولیژێن زانستێن ئەندازیاریا چاندنێ، ڤێتێرنەری و زانست، و پلان هەنە ئەڤ هەماهەنگیە بهێتە فراوانکرن.
عسمەت خابوور و فاتیما مەحموود
راگەهاندنا زانکۆیا دهۆک؛ ١٧ـی کانوینا دووێ ٢٠٢٣