ل رێكەڤتی ٣ـی نیسانێ ٢٠٢٣، شاندەكێ دەستەیا ئەلمانی یا لێكگوھۆرینا ئەكادیمی DAAD كو ژ د. كریستیان ھولشورستر سەرۆكێ پشكا بەرنامێن سكۆلەرشیپ ل نیڤا باشۆری ژ روویێ ئەردی و كریستیان سترووا، سەرۆكێ پشكا لێكگوھۆرینا زانینێ و ئەنتەرنێتێ پێكھاتبوو، سەرەدانا سەنتەرێ چارەسەریا دەروونی و تراومایێ ل زانكۆیا دھۆك كر. ئارمانجا سەرەدانێ دویڤچوونا پرۆژێن ژلایێ DAAD دھێنە پالپشتیكرن و بھێزكرنا ھەڤكاریێ ل گەل زانكۆیا دھۆك بوو.
شاندێ ناڤبری ژلایێ ھەرئێك ژ د. لوقمان ھادی ھاریكارێ سەرۆكێ زانكۆیێ بۆ كاروبارێن زانستی و د. رەند حەمۆدی رێڤەبەرا نڤێسینگەھا پەیوەندیێن نێڤدەولەتی ل زانكۆیا دھۆك و د. بھار سلێمان جێگرا سەرۆكێ پەیمانگەھا چارەسەریا دەروونی و تراومایێ ھاتە پێشوازیكرن و سوپاسیا DAAD كر بۆ پالپشتیكرنا وان یا بەردەوام.
ل دەستپێكێ د. لقمان ھادی كورتیەك دەربارەی زانكۆیا دھۆك و دیرۆكا وێ و چالاكیێن وێ بۆ شاندی پێشكێشكر، دیسان د. رەند حەمۆدی باس ل ھەڤكاریا نێڤدەولەتی ل گەل زانكۆیا دھۆك كر و گۆت "من دڤێت مفای ژ ئەڤێ دەلیڤێ وەربگرم داكو ب ناڤێ زانكۆیا دھۆك سوپاسیا وە بكەم. DAAD ب پێشكێشكرنا پالپشتیان وێنەیێ زانكۆیا مە گوھارتیە، د دەمێ نوكە دا مە ١٠ پرۆژە ھەنە كو ژلایێ DAAD ڤە دھێنە پالپشتیكرن". دیسان د بەردەوامیا ئاخڤتنا خۆ دا د. رەند گۆت " DAAD پالپشتێ سەرەكیە د سێ پرۆژێن زانكۆیا دھۆك دا و بەردەوام شانازیێ پێ دبەت، ئەوژی پرۆژێ پرۆگرامێ خواندنا بەكالوریۆسێ یێ ھەڤپشك د پلاندانانا جھی دا ل گەل زانكۆیا TU Dortmund، كو ل سالا ٢٠٠٧ـێ دەستپێكریە ب ئارمانجا بەرھەڤكرنا ئەندازیارێن پلاندانانا جھی د ئاستەكێ بەرزدا ئەوژی ل دویڤ پێدڤیا ھەرێما كوردستانێ بۆ ڤی بسپۆریا گرنگ و پاراستنا گەشەپێدانا بەردەوام. پرۆژێ دووێ ئەندازیاریا بایۆميدیکالە كو بەرنامێ خواندنا بەكالۆریۆسێ یە ژ لایێ زانكۆیا Technische Hochschule Mittelhessen یا زانستێن پراكتیكی ڤە ھاتیە پێشكێشكرن، ب رێكا ئەڤی بەرنامەی قوتابی دشێن بۆ ماوێ ٣ سال و نیڤان ل زانكۆیا دھۆك بخوینن و ٦ ھەیڤان بۆ مەشقدانێ ل ئەلمانیا بخوینن. پرۆژێ دویماھیێ پەیمانگەھا چارەسەریا دەروونی و چارەسەریا تراومایێ IPP یە كو ل سالا ٢٠١٤ـێ ھاتیە دانان، ماوێ ئەڤی بەرنامەی سێ سالن بۆ باوەرناما ماستەرێ د چارەسەریا دەروونی و چارەسەریا تراومایێ دا، ئارمانج ژێ فێركرن و مەشقدانا قوتابیێن ماستەرێ یە بۆ پالپشتیكرنا خزمەتێن ساخلەمیا عەقلی ب ئارمانجێن روھن و درێژخایەن.
ل دویڤ دا، د. بھارێ باس ل پەیمانگەها چارەسەریا دەروونی و چارەسەریا تراومایێ IPP كر و سوپاسیا DAAD كر بۆ درێژكرنا ماوێ گرێبەستی ل گەل زانكۆیا دھۆك ھەتا سالا ٢٠٢٦ـێ. ھەروەسا م. ئیبراھیم نیشاندانەك دەربارەی چالاكیێن سەنتەرێ ناڤبری ھەر ژ دەستپێكا دامەزراندنێ و ھەتا نوكە پێشكێشكر. م. ئیبراھیم د نیشاندانا خۆ دا دیارکر "ھەتا نوکە ٤٩ قوتابی ژ سەنتەرێ چارەسەریا دەروونی و چارەسەریا تراومایێ IPP دەرچووینە و ل كلینیكا ڤێ پەیمانگەهێ وپشكا ساخلەمیێ و كەرتێ تایبەت و زانكۆیا دھۆك ب خۆ كاردكەن.
شاندێ DAAD خۆشحالیا خۆ بۆ دەستكەڤتێن باش یێن پرۆژێن ناڤبری دەربری و د. كریستیان ھولشورستر گۆت "گەنگەشا دەستكەڤتێن بەرچاڤ یێن پرۆژێ IPP ل پەرلەمانێ ئەلمانیادا ھاتیە كرن، لەورا ل دویڤ سیاسەتا وەلاتێ ئەلمانیا، ئەڤ پەیمانگەهە یا گرنگە".
ل دویماھیا كۆمبوونێ شاندێ ناڤبری گەنگەشا بەردەوامیدانا پرۆژێ IPP ل زانكۆیا دھۆكێ كر پشتی ب دویماھی ھاتنا ماوێ گرێبەستی ل سالا ٢٠٢٦ـێ. ژ لایێ خۆ ڤە، د. لقمان ھادی دیاركر کو زانكۆیا دھۆك بابەتێ بەردەوامیدانا پرۆژێ ناڤبری ب رژدی وەردگریت، لەورا ئەو وەسا دبینیت كو یا فەرە ھندەك فەرمانبەرێن زانكۆیێ بھێنە بەرھەڤكرن بۆ بدەستڤەئینانا باوەرناما دكتۆرایێ بۆ بەردەوامیدانێ ب بەرنامەی پشتی گرێبەست ب دویماھی دھێت. پاشی شاندێ ناڤبری بەرھەڤیا خۆ دیاركر كو دێ ل گەل زانكۆیا دھۆك كاركەن بۆ دانا دەلیڤێ بۆ قوتابیا ب مەرەما بدەستڤەئینانا دەلیڤا خواندنێ ل وەلاتێ ئەلمانیا د بوارێ چارەسەریا دەروونی و چارەسەریا تراومایێ.
راگەھاندنا زانكۆیا دھۆك؛ ٣ـی نیسانێ ٢٠٢٣
راپۆرت: فرمێسك حەسۆ
وەرگێران: ماھر كێستەیی
فۆتۆ: حسێن تتمی