ل رۆژا 7/12/2021 ل هۆلا گرتی یا كۆلیژا پەروەردا جەستەیی و زانستێن وەرزشی ل زانكۆیا دهۆك، تیما زانكۆیا دهۆك ب ناسناڤێ قارەمانیا فۆتسالا زانكۆیێن پارێزگەها دهۆكێ هاتە خەلاتكرن، پشتی د یاریكرنا دووماهیێ دا ل سەر تیما زانكۆیا زاخۆ سەركەفتی.
سەرۆكێ زانكۆیا دهۆك، د. داود سلێمان ئەتروشی، و سەرۆكێ زانكۆیا زاخۆ و نینەرێن زانكۆیێن پارێزگەها دهۆكێ و راگرێن كۆلیژان و مامۆستا و قوتابیێن هەردوو زانكۆیێن دهۆك و زاخۆ ل یاریا دووماهیێ ئامادەببوون.
د. فەلاح سەعدون رێڤەبەرێ وەرزشا زانكۆیا دهۆك گۆت ئەڤ قارەمانیە ب پشكداریا شەش زانكویێن پارێزگەها دهۆكێ هاتە رێكخستن، ئەوژی زانكویێن دهۆك، جیهان، زاخۆ، زانكۆیا ئەمریكی ل كوردستانێ، پۆلیتەكنیكا دهۆك و نەورۆز، كو نێزیكی دوو حەفتیانە مژیلی دڤی قارەمانیێ نە، دگەل قارەمانیا شەترەنچ وتەپا سەر مێزێ.
رێڤەبەرێ وەرزشا زانكۆیا دهۆك هەروەسا گۆت مەرەم ب ڤەكرنا ڤان جۆرە قارەمانیان، جارەكا دی وەرزشێ دناڤا زانكۆیان دا ساخكەینەڤە، و دێ ئەڤ قارەمانیە دبەردەوام بن، و سالا بهێت دێ یاریێن ڤۆلیبۆل و باسكت بۆلێ ژی هەبن، و دبیت ڤان جۆرە قارەمانیان ل سەر ئاستێ پارێزگەهان ژی ڤەكەن.
قارەمانیا زانكۆیێن پارێزگەها دهوك ب سەرپەرشتیا رێڤەبەریا وەرزشا زانكۆیا دهۆك و ب هەڤكاری دگەل ئەكادیمیا زانكۆ و كۆمپانیا مراس یا سپۆنسەر ب پشكداریا شەش زانكۆیان د هەرسێ قارەمانیێن فۆتسال و شەترەنچ و تەپا سەرمێزێ هاتنە رێكخستن.