شاندەكێ رێكخراوا كار یا نێڤدەولەتی، ب سەرۆكاتیا بەرپرسێ پرۆگرامێن كارئێخستنا چر، بشار سمارنە، ل رۆژا 5/12/2021 سەرەدانا زانكۆیا دهۆك كرن، و ژلایی سەرۆكێ زانكۆیێ، د. داود سلیمان ئەتروشی، ڤە هاتنە پێشوازی كرن، ئەڤ سەرەدانە دچارچوڤێ پرۆژێ ئاسو دایە، یێ پێشخستنا ئاسویێن جڤاكێن مێڤاندار یێن ئاواران و ئاواران بخۆ، یێن رێكخراوا كار یا نێڤدەولەتی.
د روینشتنەكی دا ب ئامادەبوونا هاریكارێ سەرۆكێ زانكۆیێ بۆ كاروبارێن كارگێری و دارایی د. ئەحمەد محەمەد صالح و رێڤەبەرا پەیوەندیان ل زانكۆیێ د. رەند حەمودی، گەنگەشە ل سەر ناڤەروكا پرۆژە هاتە كرن، كو ئێكەم پرۆژێ ڤێ رێكخراوێ یە ل زانكویا دهۆك دهێتە ئەنجام دان، ب چاندنا هژمارەكا داروباری ل كەمپێ زانكۆیێ، 30 كەس دڤی پرۆژەی دا دێ كاركەن و پرانیا وان دەرچوویێن زانكۆیا دهۆكن و 30% رەگەزێ مێ تێدا پشكدارن، و هەر ل رۆژا 5/12/2021 پشتی وەرگرتنا رازەمەندیێ پرۆژە دەستپێكر.
دیسا ل نێزیك دێ هژمارەكا روینشتنان ئەنجام دەن دگەل سەنتەرێ پێشخستنا كاری و خودان كاران بۆ دەستنیشانكرنا پێدڤیێن بازارێ كاری ژبۆ راهێنان پێ كرنێ ب دەرچوو و قوتابیێن زانكۆیێ بۆ بدەستڤەئینانا شیانێن پیشەیی و كاری، و هژمارەكا پرۆژێن دیتر ل پاشەرۆژێ بۆ پێشڤەبرنا شیان و پیشەیان ل دویف پێدڤیێن بازارێ كاری دێ ئەنجامدەن.
سەرۆكێ زانكۆیا دهۆك پالپشتیا ڤێ هزرێ كر و هاندانا وان كر پرۆژێن خۆ بینە زانكۆیا دهۆك چونكو زانكۆیێ سەربۆرێن دڤی بیاڤی دا هەین، و زانكۆ دشێت مامۆستا ژ بسپۆریێن جودا جودا و پێدڤیێن تەكنیكی و جهێ دابین بكەت بۆ راهێنانێن پیشەیی، و دێ هاندان بیت بۆ پرۆژێ پێشخستنا مەنهجێ راهێنانا پیشەیی ل زانكۆیێ، و سەرۆكێ زانكۆیێ پێشنیار كر دیدار هەبن دناڤبەرا بازارێ كاری و خودان كاران و بەرپرسێن زانكۆیێ بۆ گەنگەشەكرنا هویركاریێن ڤێ دەستپێشخەریێ.