سەرۆكێ زانكۆیا دهۆك، د. داود سلیمان ئەتروشی ل رۆژا 31/10/2021 د پەیڤەكی دا ل سالڤەگەرا 29 یا دامەزراندنا زانكۆیا دهۆك گۆت "ئەزێ گەشبینم بۆ ئایندێ زانكۆیا دهۆك".
د پەیڤا خۆدا سەرۆكێ زانكۆیا دهۆك، ئاماژە دا كو پێدڤیە زانكۆیێ رۆژەك هەبیت داكو هەر سال د وێ رۆژێ دا سەحكەنە كارێ خۆیێ پێشتر، بەلێ ئەڤە بۆ جارا ئێكێ یە سالڤەگەرا دامەزراندنا زانكۆیێ دهێتە كرن، لەورا دێ د ڤێ سالڤەگەرێ دا بەحسێ دەسپێكا زانكۆیێ و هەتا نوكە كەین، ئاشكرا ژی كر كو سالانە ئەڤ رۆژە دێ زانكۆیا دهۆك هەبیت بۆ هەلسەنگاندنا كارێن خۆ و ئەو كەسێن كارێن باش بۆ زانكۆیێ كری بهێنە دیاركرن.
د. داود سلیمان ئەتروشی، هەروەسا گۆت" زانكۆیا دهۆك د ڤان 29 سالان دا د چەندین قووناغان دا دەرباز بوویە، بەلێ شیایە ل سەر ئاستەنگان زال ببیت و بگەهیتە قووناغا ئەڤرۆ، و داخاز ژ وەزارەتا خاندنا بلند كر كو سەربەخۆیا زانكۆیا دهۆك بدەنێ داكو پتر بشێت پێنگاڤان بەرەف پێش بهاڤێژیت".
نوینەرێ وەزیرێ خاندنا بلند و ڤەكۆلینێن زانستی، د. سەباح ئیبراهیم وەیس، شیرەتكارێ وەزیرێ خاندنا بلند گۆت" د پلانا چاكسازیێ یا حكومەتا هەرێما كوردستانێ دا گرنگیەكا زێدەتر دا وەرگرتنا قوتابیان و ڤەكۆلینێن زانستی و د پلانا وەزارەتێ دا یە پتر گرنگی ب سەنتەرێن ڤەكۆلینان بهێتە دان".
نوینەرێ پارێزگارێ دهۆك، ماجد سەید سالح، د پەیڤەكی دا گۆت" هەمی خەلكێ دهۆكێ شانازیێ ب زانكۆیا دهۆك دبەت، چونكو ئەڤ زانكۆیە ژ ڤەرێژ و ئەنجامێ وان دەستكەفتایە یێ خەلكێ كوردستانێ بگشتی و ڤێ دەڤەرێ ب تایبەتی خەبات ژبۆ كری".
پشتی ڤان هەرسێ پەیڤان پەنەلەك هاتە برێڤە برن ژ لایێ" د. ئاماج عەبدوللا سەعید" شیرەتكارێ وەزیرێ خاندنا بلند و ب پشكداریا هەر ئێك ژ، د. عسمەت محەمەد خالد، د. داود سلیمان ئەتروشی، د. مسلح مستەفا، د. رەند حمودی، و بەرێز موئەیەد تەیب.
د. عسمەت محەمەد خالد، ئێكەم سەرۆكێ زانكۆیا دهۆك گۆت" پێدڤیە زانكۆ پێداچوونەكی دبیاڤێ زانستی دا بكەت، و خۆ نەگریت هەتا وەزارەتا خاندنا بلند رێنمایان دەربێخیت، و سەحكەنێ زانكۆیێ پێدڤی ب چ تشتی یە ئەو بهێتە كرن".
بەرێز موئەیەد تەیب، گۆت "ل زانكۆیان نەخشێ پاشەرۆژا مللەتان لێ دهێتە كێشان، لەورا زانكۆیان گرنگیا خۆیا هەی بۆ جڤاكی، و خەلك ناچیت بێژیتە زانكۆیێ وەرە ڤی كاری بۆ مە بكە، دڤێت دەستپێشخەری ژ زانكۆیێ بیت كا چ دشێت پێشكێش بكەت و شیانێن چ هەنە وی پێشكێش بكەت".
د. مسلح مستەفا، سەرۆكێ بەرێ یێ زانكۆیا سوران دڤی پەنەلی دا گۆت" پێدڤیە زانكۆ خۆ نەكەنە ئێخسیرێت قەیرانان، بلا د قەیرانان دا دەرفەتان پەیدا بكەن بۆ ئافراندن و پێشخستنێ، هەروەسا دیاركر كو ئێك ژ ئامرازێن سەرەكی یێن سەركەفتنێ ئەوە بریار بێ ترس بهێنە دان".
د. رەند حەمودی، پێشنیاركر كو مامۆستایێن زانكۆیێ سەردان هەبن بۆ دەرڤەی وەلاتی بۆ دیتنا كەلتۆرێن جودا و چێكرنا پەیوەندیێن زانستی دگەل زانكۆ و ناڤەندێن ئەكادیمی یێن جیهانی، داكو هەر مامۆستایەك ژلایێ خۆڤە دەرگەهەك بیت بۆ چێكرنا تێكهەلیان بۆ زانكۆیێ.
هەر ب هەلكەفتا سالڤەگەرا 29 یا دامەزراندنا زانكۆیا دهۆك ئاهەنگەكا موزیكێ و پێشانگەهەكا شێوەكاری ل ناڤەندا قوتابیان هاتنە برێڤە برن، ب پشكداریا مامۆستا و قوتابیێن زانكۆیا دهۆك.