ل رۆژا 29/10/2019 ل ئاڤاهیێ كۆلیژا پزیشكیا ددان كلینیكەكا نوی هاتە ڤەكرن ب ئامادەبوونا سەرۆكێ زانكۆیا دهۆك پ. د. مصلح دهۆكی و جەوهەر عەزیز قایمقامێ قەزا دهۆكێ دگەل هاریكارێن سەرۆكێ زانكۆیێ.
پ. د. مصلح دهۆكی سەرۆكێ زانكۆیا دهۆك بۆ مالپەرێ زانكۆ گۆت ئەڤرۆ مە لابورا پزیشكیا ددانان ل زانكۆیا دهۆك ڤەكر كو لابورەكا نویە و پتری 20 كورسیكێن نوی یێن ئەمریكی هاتینە كرین ژ وان 17 كورسی ژ داهاتیێ زانكویێ و 3 ژی ژلایێ رێكخراوا جی ئای زێت هاتینە كرین و ئەڤ لابورە دێ گەلەك خزمەتا خەلكێ دهۆكێ كەت ژبەركو رۆژانە پتری 300 كەس ژ خەلكێ دهۆكێ بێ بەرامبەر دێ لێ هێنە چارەسەركرن.
سەرۆكێ زانكۆیا دهۆك خویا ژی كر كۆلیژا بزیشكیا ددانان ژ كۆلیژێن باشە ل سەرانسەری عیراقێ ژلایێ ئامیرێن زانستی و كادری و پێداویستیان ڤە و ئینانا ڤان 20 كورسیان دێ بیتە دەرفەتەك پتر قوتابی بشێت ئاستێ خۆ یێ پراكتیكی پێش بێخیت.
راگرا كۆلیژا پزیشكیا ددانان ل زانكۆیا دهۆك د. بهار جەعفەر سلێڤانەی زانیاریێن زێدەتر دان و گۆت ئەڤە كلینیكا سیێ یە دهێتە ڤەكرن ل كۆلیژا پزیشكیا ددانان ل زانكۆیا دهۆك بەری نوكە مە هندەك كلینیكێن دی ڤەكربوون ژلایێ پارێزگارێ دهۆكێ ڤە هاتبوونە دابین كرن هەروەسا رێڤەبەرێ ساخلەمیا دهۆكێ و نوكە ژی ب هاریكاریا سەرۆكێ زانكۆیێ پ. د. مصلح دهۆكی 17 كورسی هاتینە كرین ئەڤ بیست كورسیكە دێ گەلەك هاریكاریا خەلكێ دهۆكێ كەن بۆ چارەسەریا نەخۆشیێن دەڤ و ددانان.