A forum about Anfal genocide at UoD

ل یادا 31 سالیا ئەنفالان، سەنتەرێ لێكۆلینێن جینوسایدێ ب هەڤكاری دگەل سەنتەرێ بێشكچی بۆ ڤەكۆلینێن مرۆڤایەتی ل زانكۆیا دهۆك كۆربەندەك ل ژێر ناڤێ (ئەنفال ـ بیرەوەری، بیردانك و ئازار) ل رۆژا 24/2/2019 ل سەنتەرێ رەوشەنبیری و جڤاكی یێ زانكۆیا دهۆك ئەنجام دان.

د ڤی كۆربەندی دا سەرۆكێ‌ زانكۆیا دهۆك پ. د. مصلح دهۆكی و هژمارەكا ڤەكۆلەر و رەوشەنبیر و چالاكڤان و مامۆستا و قوتابیێن زانكۆیا دهۆك د بەرهەڤ بوون، ل دەسپێكێ‌ سەرۆكێ‌ زانكۆیا دهۆك د پەیڤەكی دا گۆت ئەنفال، ئەو ناڤ بوو یێ‌ كو رژێما بەعسا گوربەگورا ژناڤچوویی دانایە سەر كریارێن خۆ یێن هوڤانە بدژی گەلێ‌ كوردستانێ‌، كو د ڤان كریاران دا ژناڤبرنا بكۆم ل دەڤەرێن جودا جودا یێن كوردستانێ‌ ب رەنگەكێ‌ ئاشكرا دەست پێ‌ كری، هەر چەندە بەری هنگی ژی ل ژێر ناڤێن دیتر و ب بەهانەیێن دیتر ئەڤ كریارێن وان یێن هوڤانە هەر هەبووینە. 

گۆت ژی كاڤل كرنا پتر ژ دوو هزار گوندان، و گرتن و بن ئاخكرن و بێ‌ سەروشین كرنا پتر ژ 182 هزار كەسان، نە كریارەكا هندا بچیكە كو ب تنێ‌ ب تاوان بهێتە هژمارتن، لەورا ئەڤ كەیسە پێدڤیە ب وێ‌ چەندێ‌ یە پتر كار بۆ بهێتە كرن و ل ناڤەندێن نێڤدەولەتی پتر بهێتە نیاسین و هەمی بەلگە و دكیۆمێنت و نڤیسار و فەرمانێن گرێدایی ڤی كەیسی ب رەنگەكێ‌ زانستی بهێنە كۆم كرن، لەورا زانكۆیا دهۆك سەنتەرەك ب ناڤێ‌ (سەنتەرێ‌ لێكۆلینێن جینوسایدێ‌) دامەزراندیە كو كار ل سەر ڤان جۆرە كەیسان بكەت و بەلگەیێن پێدڤی بۆ هەر كەیسەكی ب رەنگەكێ‌ زانستی كۆم كەت و كار ل سەر بكەت.

 رێڤەبەرێ سەنتەرێ لێكۆلینێن جینوسایدێ ل زانكۆیا دهۆك د. سالم جاسم پەنەلەك برێڤەبر و تێدا سێ‌ ڤەكۆلین هاتنە پێشكێش كرن یا ئێكێ‌ ژلایێ‌ مافپەروەر عەقید عەبدوللا جەعفەر ل دۆر كۆمكۆژیا گوندێ كۆرێمێ ژ لایێ یاسایی و چاوانیا رویدانا وێ و راپۆرتێن سەر هاتینە نڤیسین بەحس كرن، هەروەسا سەرنڤیسەرێ‌ گوڤارا ئەنفالستان   عومەر محەمەد بەحسێ‌ كۆمكۆژیا گوندێ كۆرێمێ و هەڤبەریا وێ د گەل چەند كۆمكۆژیێن دی ل كوردستانێ كر، هەروەسا سمكو سابر چالاكڤان ژ گەرمیان بابەتەك ل دۆر رۆلێ میدیایێ و ئەنفالان پێشكێش كر.

هەر د كۆربەندی دا چەند كەسێن رزگاربوویێن ڤێ‌ كۆمكۆژیێ‌ دیتن و بیرهاتنێن خۆ ل دۆر كۆمكۆژیێ بەرچاڤ كرن، پاشی دەرگەهێ دانوستاندنێ‌ و ئاراستەكرنا پسیاران هاتە ڤەكرن وبەرسڤ ل سەر هاتنە دان.