Genocide Center

پێناسا سەنتەرێ ڤەکولینێن جینوسایدێ:

سەنتەرێ ڤەکولینێن جینوسایدێ گرانیا خو دئێخیتە سەر وان جینوساید و قرکرنێن د دیروکێ دا ل دژی کوردان هاتینە کرن و دێ پێکولێ کەت هەمی بەلگەیێن پەیوەندی ب جینوسایدێن کوردان ڤە هەین کۆمبکەت و دێ ل دویڤچوون و لێکولینێن تیوری، زانستی وئەکادیمی ل سەر ڤێ مژارێ ئەنجام دەت و دێ ب سازدانا کونفرەنسان و ئەنجامدانا لێکولینان پتر روناهیێ ئێخیتە سەر ڤان گەلکوژیان.

جینوسایدا کوردێن ئێزدی ل شنگالێ بۆ مە جارەکا دی گەلەک ب ڕونی خویا کر کا مژارا جینوسایدێ وەک بابەتەکێ ئەکادێمی و زانستی چەند یا گرنگ و پێتڤی یە. کورد وەک نەتەوە د دیروکێ دا گەلەک جاران کەتینە بەر پێلێن فەرمانێن قرکرنێ و ژناڤبرنێ.

"عملیات الانفال" گوپیتکا سیاسەتا قرکرنێ و ژناڤبرنێ یا دەولەتا عیراقێ بوو ل هەمبەری کوردان. لەوما ژی مژارا ئەنفال – جینوساید بەری هەر تشتی پرسەکا نەتەوەیی یە و پەیوەندییەکا خورت یا ب دیروکێ، سیاسەتێ، یاسایێ و جڤاکێ ڤە هەی. ئەرکێ سەنتەرێ مە ئەوە کو ب زانستی و ئەکادێمی لێکولین و لدویڤچوونان د پروسا جینوسایدکرنا کوردان ب مێتودێن زانستی پێناسە بکەت و ب رێکێن ئەکادێمی پتر روناهیێ بێخیتە سەر هەمی لایەنێن سیاسەتا گەلکوژییا کوردان، چونکی پروسا ئەنفالکرنا کوردان و جینوسایدا شنگالێ پەیوەندی ب چارەنڤیسێ کوردان وەک نەتەوە ڤە هەبوو و هێژ هەیە و رەهەندێن پر سەمتی ل پاش خو هێلاینە و هێژ کارتێکرنێن وێ یێن خورت ل سەر سیاسەت، جڤاک و ئابورییێ کوردستانێ هەنە.