زانكۆیا دهۆك ب هەڤكاری دگەل زانكۆیا ئەربیل یا نێڤدەولەتی و ب هەڤكاریا نوینەراتیا حكومەتا هەرێما كوردستانێ ل فەرەنسا كۆربەندەك ل دۆر (جینوساید و كورد ـ دیتن و بۆچوون) ل پەیمانگەها (پروتستانت بۆ تیولۆژی) ل پاریس ل رۆژا 28/6/2019 ئەنجام دان.
د ڤی كۆربەندی دا كۆ هژمارەكا مامۆستا و ڤەكۆلەران بەرهەڤ ببوون، سەرۆكێ زانكۆیا دهۆك پ. د. مصلح دهۆكی د پەیڤەكی دا گۆت كورد و جینوساید دوو تێگەهن، كو نە ب حەزا مە ئەڤ هەردوو تێگەهە گەهشتینە ئێك، بەلكو ژ بەر پێگەهێ كوردستانێ یێ ستراتیژی و قەدەرا كوردان و دەولەمەندیا سروشت و جۆگرافی و ئاڤ و ئاخا كوردستانێ هەردەم ل سەر دەستێن رژێمێن حوكمدارێن دەڤەرێ هاتینە قركرن و ئەنفال و جینوساید و كیمیا باران كرن و خەلكێ مە هەمی رەنگێن ستەم و دەردەسەریێ دیتینە.
سەرۆكێ زانكۆیا دهۆك هەروەسا گۆت بابەتێ دانەنیاسینا جینوسایدان پێدڤیە پتر كار بۆ بهێتە كرن و ل ناڤەندێن نێڤدەولەتی پتر بهێتە نیاسین و هەمی بەلگە و دكیۆمێنت و نڤیسار و فەرمانێن گرێدایی هەر كەیسەكی ب رەنگەكێ زانستی بهێنە كۆم كرن، بەلگەیێن پێدڤی بۆ هەر كەیسەكی ب رەنگەكێ زانستی كار ل سەر بهێتە كرن.
هەژی گۆتنێ یە زانكۆیا دهۆك ل سالا 2018 كۆنفرانسەكێ نێڤدەولەتی ل دۆر جینوساید و تراومایێ و ل 2019 ژی كۆنفرانسەكێ زانستی یێ نێڤدەولەتی د ڤی بیاڤی دا ئەنجام دا بوو.