د چوارچوڤێ پشكداریكرنا زانكۆیا دھۆك د كۆنفرانسێ سیێ یێ "سەرۆكێن زانكۆیێن عەرەبی و رۆسی" دا، یێ ل زانكۆیا شاریقە ل وەلاتێ ئیماراتێ ھاتیە ئەنجامدان، زانكۆیا دھۆك دوو رێكەڤتن د بوارێ ھەڤكاریا ئەكادیمی و ڤەكۆلینێن زانستی ل گەل زانكۆیا زانكۆیا شاریقە و زانكۆیا خورفكان یێن ئیماراتی ئیمزاكرن.
كۆنفراس بۆ ماوێ دوو رۆژا، ژ ٣١ـی گولانێ تا ١ـی خزیرانێ ٢٠٢٣ بەردەوام بوو، كو ژلایێ زانكۆیا شاریقە یا ئیماراتی ھاتبوو رێكخستن و ژلایێ شێخ سولتان بن ئەحمەد ئەلقاسمی، جێگرێ فەرماندارێ شاریقە و سەرۆكێ زانكۆیا شاریقە ھاتە برێڤەبرن، د ئەڤی كۆنفرانسی دا پتری ٦٠ زانكۆیێن رۆسی و پتر ژ ١٥٠ سەرۆك و نوینەرێن زانكۆیا ژ ٢١ وەلاتێن عەرەبی پشكدار ببوون. د. داود سلێمان ئەترۆشی، سەرۆكێ زانكۆیا دھۆك دانوستاندنێن باش ل دۆر ھەڤكاریا ئەكادیمی ل گەل ھەر ئێك ژ رێڤەبەرێ زانكۆیا شاریقە د. ئەحمەد مەجول ئەلنوعەیمی و رێڤەبەرێ زانكۆیا خورفكان د. ئەحمەد ئەلشەماع ئەنجامدان، دیسان دەربارەی پشكداریا زانكۆیا دھۆك د كۆنفرانسێ سیێ یێ سەرۆكێن زانكۆیێن عەرەبی و رۆسی دا د. داود ئەتروشی دیاركر، زێدەباری ئیمزاكرنا دوو رێكەڤتنا ل گەل دوو زانكۆیێن ئیماراتی، زانكۆیا دھۆك شیا پەیوەندیێن باش ل گەل ھندەك زانكۆیێن رۆسی پێكبینیت.
هەر د ڤێ سەرەدانێ دا بۆ وەلاتێ ئێماراتێ، سەرۆکێ زانکۆیا دهۆک ژ لایێ قونسلێ گشتیێ عیراقێ ل دوبەی، ئاماد عەبدولحەمید محەمەد ڤە هاتە پێشوازیکرن، د روینشتنەکێ دا دانوستاندن ل دۆر رەوشا خواندنا بلند ل هەرێما کوردستانێ و هەروەسا ل دوبەی هاتە کرن و گرنگیا هەڤکاری و هەماهەنگیێ ل گەل سازیێن ئەکادیمی یێن ناڤدەولەتی هاتە باسکرن ب مەرەما باشترکرنا رەوشا خواندنا بلند ل کوردستانێ.
ئارمانجا كۆنفرانسی باشكرنا پەیوەندیا د ناڤبەرا زانكۆیێن عەرەبی و رۆسی دا بوو، دەرئەنجام ژی نێزیكی ٥٠ رێكەڤتنا د ناڤبەرا زانكۆیێن عەرەبی و زانكۆیێن رۆسی دا ھاتنە ئیمزاکرن، د كۆنفرانسی دا باس ل بەرزكرنا ئاستێ خواندنا بلند و ڤەكۆلینێن زانستی ب رێكا ھەڤپشكیا زانكۆیێن عەرەبی ل گەل زانكۆیێن جیھانی، زێدەباری دانانا ستراتیژیەتان بۆ لێكگوھرینا زانینێ د ناڤبەرا زانكۆیا دا د بوارێن زانستیێن جودا دا. دیسان لێكگوھۆرینا قوتابیان، ھەڤپشكی د بەرنامێن فێركرنێ و پرۆژێن ڤەكۆلینێن زانستی دا. ئەڤ كۆنفرانسە وەكو پرەكا هەڤكاریێ یە دناڤبەرا زانكۆیێن عەرەبی و زانكۆیێن رۆسی دا.
ھەژی ئاماژەدانێ یە كو ئێكەتیا زانكۆیێن عەرەبی، كو زانكۆیا دھۆك تێدا ئەندامە، ژ لایێ كۆمەلا وەلاتێن عەرەبی ڤە ھاتیە پێكئینان، ل سالا ١٩٦١ـێ ئێكەم كۆنفراسێ خۆ ل بنگازی ئەنجامدایە، نوكە ژی ٥٤ زانكۆ ژ ٢١ وەلاتێن عەرەبی تێدا ئەندامن. ئارمانجا وێ یا سەرەكی پالپشتیكرن و ھەماھەنگیا ھەولێن زانكۆیێن عەرەبی یە بۆ بەرھەڤكرنا نفشەکێ کو شیانێن خزكەتكرنێ هەبن. دیسان كۆنفراسێ سەرۆكێن زانكۆیێن عەرەبی و رۆسی ل ١٥ـی گولانا ٢٠١٧ـێ، ب ناڤێ ئێكەتیا سەرۆكێن زانكۆیێن رۆسی و عەرەبی ھاتیە پێكئینان، كۆنفراسێ سەرۆكێن زانكۆیێن عەرەبی و رۆسی ژ لایێ ئەمیندارێ گشتی یێ ئێكەتیا زانكۆیێن عەرەبی عومەر عزات سەلامە و سەرۆكێ زانكۆیا لومونوسوف موسكو یا رۆسی فیكتۆر سادوفنیتشی ھاتە برێڤەبرن.
راگەھاندنازانكۆیا دھۆك؛ ١١ـی خزیرانێ ٢٠٢٣
راپۆرت: ماھر كێستەیی