رۆژا سێشەمبی رێکەڤتی ١١ـی تیرمەهێ ٢٠٢٣، ب ئامادەبوونا شاندێ وەزارەتا خواندنێن بلند و ڤەکۆلینێن زانستی، ب سەرۆکاتیا وەزیرێ خواندنا بلند، پارێزگارێ دهۆکێ، سەرۆکێن زانکۆیا دهۆک و زانکۆیا پۆلیتەکنیکیا دهۆک و زانكۆیا سۆران، هژمارەکا ستافێ هەردوو زانکۆیا و کەسایەتی و کاربدەستێن دەڤەرێ، د رێورەسمەكێ تایبەت دا، دامەزراندنا زانکۆیا ئاکرێ بۆ زانستێن کرداری هاتە راگەهاندن.

د. داود سلێمان ئەتروشی، سەرۆكێ زانكۆیا دھۆك، خۆشیالیا خۆ دەربارەی دامەزراندنا زانكۆیا ئاكرێ بۆ زانستێن كرداری دەربری و ب ناڤێ زانكۆیا دھۆك پیرۆزباھی ئاراستەی خەلكێ دەڤەرا ئاكرێ كرن و گۆت "ھیڤی خوازین زانكۆیا ئاكرێ بۆ زانستێن كرداری ببیتە رۆگەھەكا پرشنگدارا زانست و زانینێ بۆ ھەرێما كوردستانێ و ب تایبەتی بۆ دەڤەرا ئاكرێ". هەروەسا سەرۆكێ زانكۆیێ دیاركر كو زانكۆیا ئاكرێ بۆ زانستێن كرداری ئێكەمین زانكۆیە ل كوردستانێ ل ژێر ناڤێ زانستێن كرداری، كو شێوازەكێ نوی یێ زانكۆیانە ل وەلاتێن پێشكەڤتی، بێ گومان مل ب ملی زانكۆیێن دی یێن كوردستانێ، نە ب تنێ دێ خزمەتا دەڤەرا ئاكرێ كەت، بەلكو دێ خزمەتا تەڤایا ھەرێما كوردستانێ كەت.

دیسان سەرۆكێ زانكۆیێ دیاركر كو زانكۆیا دھۆك خۆ سەربلند دبینیت كو كولیژەكا وێ یا سەرەكی و گرنگ، ئەوژی كولیژا پەروەردە – ئاكرێ یە، دێ بیتە بنیات و شەنگستەكێ سەرەكی و كارا بۆ زانكۆیا ئاكرێ بۆ زانستێن كرداری و گۆت "ئەڤ چەندە جھێ دلخۆشیا مەیە كو وەك دیاریەك پێشكێشی ئەڤێ زانكۆیا نوی و خەلكێ دەڤەرا ئاكرێ بكەین، زانكۆیا دھۆك بەردەوام گرنگی ب دەڤەرا ئاكرێ دایە ژ پێخەمەت خزمەتكرن و پێشئێخستنا پرۆسێسا خواندنا بلند ل ڤێ دەڤەرێ".

ل دویڤ دا سەرۆكێ زانكۆیا دھۆك رۆلێ سەرۆكێ حكومەتا ھەرێما كوردستانێ رێزدار مەسرور بارزانی و وەزیرێ خواندنا بلند و ڤەكۆلینێن زانستی د. ئارام محەمەد قادر و پارێزگارێ دھۆكێ د. عەلی تەتەر و زانا و رەوشەنبیر و ئەکادیمی و ڤەكۆلەر و خەلكێ دەڤەرێ بەرز نرخاند، كو ھەولێن وان بووینە ھێڤێنێ دامەزراندنا زانكۆیا ئاكرێ بۆ زانستێن كرداری و سوپاسیا ئەوان كەسایەتیان كر یێن پشكدار و ھاریكار د دامەزراندنا ڤێ زانكۆیێ دا.

ل دویماھی سەرۆكێ زانكۆیا دھۆك بەرھەڤیا زانكۆیا دھۆك دیاركر بۆ پشتەڤانی و ھاریكاریێ د دامەزراندنا زانكۆیا ئاكرێ بۆ زانستێن كرداری و راگەھاند، و دیارکر کو زانكۆیا دھۆك دێ گوژمێ ١٠٠ ملیۆن دیناران وەك دیاری بۆ زانكۆیا ئاكرێ بۆ زانستێن كرداری پێشكێشكەت و پیرۆزباھی ئاراستەی خەلكێ دەڤەرا ئاكرێ كرن بۆ ڤی دەستكەڤتێ زانستی و ئەكادیمی.

ھەر د ئەڤی رێورەسمی دا، گۆتار ژلایێ وەزیرێ خواندنا بلند و ڤەكۆلینێن زانستی د. ئارام محەمەد قادر و پارێزگارێ دھۆكێ د. عەلی تەتەر، سەرۆكا زانكۆیا پولیتەكنیكا دھۆك د. ئاری عادل عەبدولقادر و راگرێ پەیمانگەھا تەكنیكی بەردەرەش د. سمیر محۆ جمیل ڤە ھاتنە پێشكێشكرن و د گۆتارێن خۆدا تیشك ئێخستنە سەر ڤی دەستكەڤتێ گرنگ بۆ خەلكێ كوردستانێ ب شێوەیەكێ گشتی و خەلكێ دەڤەرا ئاكرێ ب شێوەیەكێ تایبەت و ئامادەییێن خۆ بۆ پالپشتیكرن و سەرخستنا زانكۆیا ئاكرێ بۆ زانستێن كرداری دەربرین.

ھەژی ئاماژێ یە زانكۆیا دھۆك ل دەستپێكا دامەزراندنا ئێكەم كولیژ ل ئاكرێ، كولیژا پەروەردا بنیات ل سالا ٢٠٠٩ـێ دامەزراند، كو ٢٠٩ قوتابی ھەبوون، ل دویڤ دا بوویە فاكولتی و پاشی بوویە كولیژا پەروەردە – ئاكرێ و د نوكە دا ٣٠٠٠ قوتابیا بخۆڤەدگریت و ژ حەفت پشكێن زانستی پێكدھێت و ستافێ وێ یێ ئەكادیمی پتری ٧٠ مامۆستایان بخۆڤەدگریت.

زانكۆیا دھۆك:

زانكۆیا دھۆك، زانكۆیەكا حكومی یە ل باژێرێ دھۆكێ، ب دویراتیا ١٥٠ كیلومەترا ژ باكورێ رۆژئاڤا ھەولێرێ – پایتەختێ ھەرێما كوردستانا عیراقێ. باژێرێ دھۆكێ دكەڤیتە د گەلیەكێ جواندا دەوروبەرێن وی چیایێن بلندن. كەمپا زانكۆیێ دەڤەرەكا كەسك یا مەزنە ل لایێ رۆژئاڤا باژێری و دیمەنەكێ جوان بەرامبەر باژێرێ دھۆكێ و سرۆشتێ دەوروبەر ھەیە. زانكۆیا دھۆك ل چریا ئێكێ ١٩٩٢ ھاتیە دامەزراندن. ب دوو كولیژا ب تنێ دەستپێكریە بۆ دابینكرنا داخوازیا دەڤەرێ ژ دەرچوویێن بسپۆر. نوكە زانكۆیا دھۆك ژ ١٩ كولیژا پێكدھێت كو ٦٨ پشكێن زانستی بخۆڤەدگریت و پتر ژ ٢٣٠٠٠ قوتابی ل زانكۆیا دھۆك دخوینن و نێزیکی ٥٠٠٠ كادرێ ئەكادیمی و كارگێری ھەیە. قوتابیێن زانكۆیا دھۆك د ناڤ باشترین جڤاكێن ئەكادیمی ل دەڤەرێ دخوینن، د بوارێن جودا دا وەكو چاندن، پزیشكی، پزیشكی فیتێرنەری، تەلارسازی، ئەندازیاری، زانستێن مرۆڤایەتی، زمان، پەروەردا بنەرەت، ئابوور و پلاندانانا شار و هەرێمان. زانكۆیا دھۆك ھەڤپشكیەكا بھێز ھەیە ب رێكا پەیوەندیێن خۆ ل گەل چەندین سازیێن خواندنا بلند و سەنتەرێن ڤەكۆلینان ل سەرانسەری جیھانێ وەكو: زانكۆیا پردۆ، زانكۆیا ئیندیانا IU، زانكۆیا نیۆیۆرك NYU، زانكۆیا نۆتردام ND، زانكۆیا ئەركنساس ل لیتل رۆك UA، زانكۆیا بریدج ووتر ل ویلایەتێن ئێكگرتی یێن ئەمریكا، زانكۆیا وارسۆ ل پۆلەندا، زانكۆیا گلاسگۆ ل ئسكوتلەندا، زانكۆیا توینتی ل ھۆلەندا، زانكۆیا لایبزیگ، زانكۆیا لیك، زانكۆیا ئولدنبۆرگ، زانكۆیا فیشتا، زانكۆیا فلینسبۆرگ، زانكۆیا دۆرتموند TU، زانكۆیا THM ل ئەلمانیا، زانكۆیا توسیكا، زانكۆیا پاڤیا، زانكۆیا ساپینزا ل ئیتالیا، زانكۆیا دیۆستۆ، زانكۆیا بەرشەلۆنا و زانكۆیا گرانادا UGR ل ئسپانیا، زانكۆیا لوند ل سوید، زانكۆیا ساسكس ل بەریتانیا، زانكۆیا تامبیری ل فنلەندا، زانكۆیا شاریقە و زانكۆیا خورفكان ل ئیمارات، و چەندین زانكۆیێن دی. دیسان زانكۆیا دھۆك ئەندامەكا چالاكە ل ئێكەتیا نێڤدەولەتی یا زانكۆیان IAU و ئێكەتیا زانكۆیێن دەریا ناڤەراست UNIMED و ئێكەتیا زانكۆیێن عەرەبی AARU.

راگەهاندنا زانکۆیا دهۆک؛ ١٣ـی تیرمەهێ ٢٠٢٣

راپۆرت: ماھر كێستەیی

فۆتۆ: حسێن تتمی