لژێر درویشمێ (زانایێن مە ناسناما گەلێ مەنە)، کولیژا پەروەردە-ئاکرێ یا زانکۆیا دهۆک و ب چاڤدێریا د. داوود سلێمان ئەترووشی سەرۆکێ زانکۆیا دهۆک و ب سەرپەرشتیا د. کەریم کەکۆ راگرێ کولیژا ناڤبری، کۆنفرانسەکێ زانستی ب ناڤێ (شێخ تاهرێ شۆشی: ژیان و بەرهەم) ل رێکەڤتی٢-٣/٢/٢٠٢٢ هاتە ئەنجامدان.
د رێورەسمێن دەستپێکرنا کۆنفرانسی دا، کو ل هۆلا کۆنفرانسان ل ئاکرێ برێڤەچوو، د. کەریم کەکو سەرۆکێ کۆنفرانسی پەیڤا خۆ پێشکێشکر، لدویڤ دا د. مێڤان عارف هاریکار و نوینەرێ سەرۆکێ زانکۆیا دهۆک، پەیڤا زانکۆیا دهۆک پێشکێشکر، پاشی د. مەکنوون محەمەد تاهر سەرۆکێ لیژنا رێکخستنێ، لدۆر قوناغ و هویرکاریێن رێکخستنا کۆنفرانسی پەیڤا خۆ پێشکێشکر. هەروەسا پەیڤەک ژ پێش بنەمالا شێخ تاهرێ شۆشی ڤە هاتە پێشکێشکرن. ل دویماهیا رێورەسمێن دەستپێکرنێ، فلمەکێ دوکیۆمێنتەری لدۆر ژیانا شێخ تاهرێ شۆشی هاتە نمایشکرن.
د کۆنفرانسی دا، ٢٣ ڤەکۆلینێن زانستی د چارچۆڤێ ٣ پەنەلان دا لدۆر رۆل و بەرهەمێن شێخ تاهرێ شۆشی د بوارێن زانستی، ئاینی، ئەدەبی، زمانی، جڤاکی و سیاسی دا ژ لایێ ڤەکۆلەرێن پشکدار ڤە هاتنە پێشکێشکرن.
پشتی هەمی ڤەکۆلین هاتینە پێشکێشکرن، کۆمەکا راسپاردان هاتنە ئاراستەکرن و پاشی باوەرنامێن رێزلێنانێ بۆ ڤەکۆلەرێن پشکدار هاتنە پێشکێشکرن.
ل دویماهیا کۆنفرانسی، پشکدارێن کۆنفرانسی سەرانەک گوندێ شۆشێ و تەکیایا شێخ تاهرێ شۆشی ئەنجامدا.