مامۆستا و سەرۆك پشكا زمانێ عەرەبی ل كۆلیژا پەروەردا بنیات یا زانكۆیا دھۆك، د. جوان محەمەد محەمەد مەھدی ئەلموفتی ب ڤەكۆلینەكێ ل ژێر ناڤونیشانێ "كاریگەریا بكارئینانا گێرانا رۆلا د دەستڤەئینانا رەھوانیێن دیالۆگێ د بابەتێ دانوستاندنێ دا - باژێرێ رێزمانێ وەك نموونە" پشكداری د نەھەمین كۆنفرانسێ زمانێ عەرەبی يێ ناڤدەولەتی كر، یێ ل رێكەڤتی ٦ تا ٨ـی چریا دووێ ٢٠٢٣، ل وەلاتێ ئیماراتێ ھاتیە ئەنجامدان.
ئارمانجا ڤەكۆلینا ناڤبری زانینا كاریگەریا بكارئینانا گێرانا رۆلا د دەستڤەئینانا رەھوانیێن دیالۆگێ بوو د بابەتێ دانوستاندنێ دا ل دەڤ قوتابیێن قوناغا ئێكێ پشكا زمانێ عەرەبی ل كۆلیژا پەروەردا بنیات"، بۆ ئەڤێ چەندێ قوتابیا وانەیێن بابەتێ دانوستاندنێ ب رێكا زارڤەكرنێ و گێرانا رۆلێن دراما فێركاری "باژێرێ رێزمانێ" وەرگرتینە، ئەنجامێن ڤەكۆلینێ دیاركریە، بكارئينانا ئەڤێ رێكێ یا كاریگەر بوو د باشكرنا رەھوانیێن ئاخڤتنێ و دانوستاندنێ ل دەڤ قوتابیا.
ھەژی ئاماژەدانێ یە، پشكداریێن مامۆستایێن زانكۆیا دھۆك د كۆنفرانس و چالاكیێن ئەكادیمی ل سەر ئاستێ ناڤدەولەتی، پشكەكا گرنگە ژ پرۆسێسا ناڤدەولەتیكرنا زانكۆیا دھۆك، ئەڤەژی بۆ سیاسەت و پلانێن زانكۆیا دھۆك دزڤریت بۆ بەرزكرنا ئاستێ مامۆستایێ زانكۆیێ بۆ ئاستەكێ ناڤدەولەتی و د ئەنجامدا پەیوەندیێن زانكۆیا دھۆك ل گەل سازی و زانكۆیێن ناڤدەولەتی بەرفرەھتر و بھێزتر لێدھێن.
كۆنفرانسێ زمانێ عەرەبی ب ئامادەبوونا پتر ژ ١٢٥٠ كەسا ژ ٦٨ دەولەتا و ب پشكداریا پتری ٥٠ سازی و دەستەیێن عەرەبی و ناڤدەولەتی و نێزیكی ١٠٠ سەرنڤێسەرێن گۆڤارێن زانستی و نێزیكی ١٠٠ سەرۆك پشكێن زمانێ عەرەبی ل زانكۆیێن عەرەبی و جیھانی و پشكداریا نێزیكی ٥٥٠ ڤەكۆلەرا و ٧٠٠ ڤەكۆلینا ھاتە ئەنجامدان، كۆنفرانس ب ئێك ژ دەستپێشخەریێن ئەنجومەنێ ناڤدەولەتی یێ زمانێ عەرەبی دھێتە ھژمارتن كو چەندین سازیێن حكومی و تایبەت و شارەزایێن زمانی وەك ئەندام بخۆڤە دگریت.
راگەھاندنا زانكۆیا دھۆك؛ ١٢ـی چریا دووێ ٢٠٢٣
نڤێسین ماھر طاھر كێستەیی