Workshop about ISIS war affect against women
March 14, 2017, 12:53 a.m.

سەنتەرێ‌ رەوشەنبیری و جڤاكی یێ‌ زانكۆیا دهۆك ل رۆژا 8/3/2017 و ب هەلكەفتا رۆژا جیهانی یا ئافرەتان روینشتنەكا زانستی ل دۆر كارتێكرنا شەری ل سەر ئافرەتان ژلایێ‌ جڤاكی و دەروونی ڤە سازكر.

د ڤێ‌ روینشتنێ‌ دا كو وەزیرێ‌ خواندنا بلند و ڤەكۆلینێن زانستی یێ‌ حكومەتا هەرێما كوردستانێ‌ د. یوسف گوران و سەرۆكێ‌ زانكۆیا دهۆك پروفیسور د. مسلح دهۆكی و هژمارەكا بەرپرسێن رێكخراوێن جڤاكێ‌ مەدەنی و مامۆستا و ڤەكۆلەر د ئامادەبوون، سەرۆكێ‌ زانكۆیا دهۆك د پەیڤەكی دا كورتیەك دا سەر كار و چالاكیێن زانكۆیا دهۆك د بیاڤێ‌ مافێن ئافرەتان دا و دیاركر كو ل چەند رۆژێن بوری پەیمانگەها چارەسەركرنا دەروونی ل زانكۆیا دهۆك هاتە ڤەكرن كو ژبلی دانا باوەرنامێ‌ بۆ دەرچوویێن وێ‌ پەیمانگەهێ‌ هەروەسا ل هەمان دەم دێ‌ وێ‌ پەیمانگەهێ‌ كەینە ناڤەندەك بۆ چارەسەركرنا دەروونی و جڤاكی بۆ وان كەسێن تووشی كێشان دبن. 

ژ لایێ‌ خۆڤە د. یوسف گوران د پەیڤەكی دا گۆت دڤێت رۆژا جیهانی یا ئافرەتان بكەینە هەلكەفتەك بۆ دابینكرنا هەمی مافێن ئافرەتان چونكو بێی دابینكرنا مافێن وان نیڤا دیتر یا جڤاكی نەشێن جڤاكی ب رێڤەببەن، ئەو ژی دیاركر كو ئەركێ‌ بەراهیێ‌ یێ‌ حكومەتا هەرێمێ‌ ئەوە دووبارە قوربانیێن شەری ب تایبەت كچ و ژنێن ئێزدی ڤەگەرینتە ناڤ جڤاكی، د ڤی بیاڤی دا ژی دوو پەیمانگەه ئێك ل زانكۆیا دهۆك و ئێك ل زانكۆیا كویە هاتینە ڤەكرن.

د ڤێ‌ روینشتنێ‌ دا بەرپرسێ‌ نڤیسینگەها رزگاركرنا رەڤاندیێن ئێزدیان حسێن قایدی دیاركر كو هەتا نوكە نێزیكی دوو هزار كەسان ژ دەستێن داعش هاتینە رزگار كرن كو پتر ژ هزار كەسان ئافرەت بوون، ئەو ژی ئاشكرا كر كو نوكە پتر ژ سێ‌ هزار كەسان د دەستێن داعش دا ماینە كو نێزیكی دوو هزار ژ وانا ئافرەتن.