ب مەرەما پتر پێشڤەبرنا ئاستێ زانستی و پرۆگرامێن خواندنێ و مەرج و سیستەمێن وەرگرتنا قوتابیا بۆ خواندنا بەکالۆریۆس و ماستەر و دکتۆرایێ، کولیژا پەروەردا جەستەیی و زانستێن وەرزشی ل زانکۆیا دهۆک، ب ئامادەبوونا د. داود سلێمان ئەتروشی سەرۆکێ زانکۆیا دهۆک، و هژمارەکا سەرۆک پشک و راگرێن کولیژێن وەرزشی ل هەرێما کوردستانێ، وۆرکشۆپەک ئەنجامدا و تێدا ب تێروتەسەلی دانوستاندن لدۆر بابەتێن ناڤبری هاتنە کرن.
د وۆرکشۆپێ دا ، د.داود سلێمان ئەتروشی پشتەڤانیا سەرۆکاتیا زانکۆیێ بۆ هەر چالاکیەکا وەرزشی ل سەر ئاستێ زانکۆیا دهۆک و زانکۆیێن هەرێما کوردستانێ، مێهڤانداریکرنا هەر قارەمانیەکا وەرزشی دیارکر، پێخەمەت زێدەتر بهێزکرنا پەیوەندین زانکۆیا دهۆک دگەل زانکۆیێن دی.
دیسان د. ئەحمد قاسم محەمەد، راگرێ كولیژا په‌روه‌ردا جه‌سته‌یی و زانستێن وه‌رزشی، ب گرنگی ڤە باس ل ئەنجامدانا چالاکیێن وەرزشی کر پێخەمەت وێ چەندێ کو قوتابی مفادارێ سەرەکی بیت و پشتی دەرچوونێ ب شێوەکێ ئەکادیمی خزمەتا جڤاکی بکەت".
د تەوەرێ دەستپێکێ یێ وۆرکشۆپێ دا، د. حسێن سەعدی ئیبراهیم، راگرێ کولیژا پەروەردا جەستەیی و زانستێن وەرزشی ل زانکۆیا سەلاحەدین، پێشنیارا ڤەکرنا هندەک پشکێن زانستی یێن گرنگ کر ل کولیژێن وەرزشی کر. ل دویڤ دا د. دیار محەمەد سەدیق راگرێ كولیژا په‌روه‌ردا جه‌سته‌یی و زانستێن وه‌رزشی ل زانكۆیا سلێمانی، ب تێروتەسەلی دانوستاندن ل دۆر خواندنا ئێڤاران کر. پاشی د. ئەحمد قاسم محەمەد راگرێ كولیژا په‌روه‌ردا جه‌سته‌یی و زانستێن وه‌رزشی ل زانكۆیا دهۆك، باس ل مەرجێن وەرگرتنا قوتابیان کر. ژ لایێ خۆ ڤە د. نه‌به‌ز عبدولفەتاح، راگرێ كولیژا په‌روه‌ردا جه‌سته‌یی و زانستێن وه‌رزشی ل زانكویا كۆیە گرنگی دا دارشتنا پرۆگرامێن خواندنێ و پێشڤەبرنا پرۆسێسا بۆلۆنا و وەرگرتنا قوتابیێن خواندنا بلند.
هەژی ئاماژەپێکرنێ یە ل دویماهیا هەر تەوەرەکی، دانوستاندنێن تێروتەسەل ژ لایێ ئامادەبوویان ڤە دهاتنەکرن، هەروەسا ل دویماهیا وۆرکشۆپێ چەندین پێشنیار هاتنە ئاراستەکرن.