سەرۆکێ زانکۆیا دهۆک دگەل ستافێ کۆلیژا زانستێن ئەندازیاریا چاندنێ کۆمبوو
Jan. 30, 2023, 10:40 a.m.

ب مەرەما پتر پێشڤەبرنا کۆلیژا زانستێن ئەندازیاریا چاندنێ ل زانکۆیا دهۆک و پشتەڤانی و پێشڤەبرنا کەرتێ چاندنێ ل پارێزگەها دهۆکێ و هەرێما کوردستانێ، ئەڤرۆ رێکەڤتی ٢٦ـی کانوینا دووێ ٢٠٢٣ ل سەنتەرێ کۆنفرانسان، د. داود سلێمان ئەتروشی سەرۆکێ زانکۆیا دهۆک، دگەل ستافێ ئەکادیمیێ کۆلیژا ناڤبری و سەندیکا ئەندازیارێن چاندنێ و هژمارەکا وەبەرهێنەران کۆمبوو. د کۆمبوونێ دانوستاندنێن ڤەکری ل دۆر کەتوارێ کەرتێ چاندنێ و کۆلیژا ناڤبری و چەوانیا بەزاندنا رێگریان و بلندترکرنا کوالتیا پشکێن جودایێن ڤێ کۆلیژێ هاتنە ئەنجامدان.

د کۆمبوونێ دا و ب ئامادەبوونا هەردوو هاریکارێن سەرۆکێ زانکۆیێ د. لقمان هادی حەسەن و د. دلشاد عەبدولجەبار حەلیم، و د. شوکری حەجی سالح، راگرێ کولیژا ناڤبری، سەرۆکێ زانکۆیا دهۆک باس ل گرنگیا کەرتێ چاندنێ کر و راگەهاند "هەکە مە بڤێت زانکۆیا دهۆک کاریگەریەکا مەزن د ناڤ جڤاکی دا هەبیت، ئێک ژ پێنگاڤان، پێدڤیە گرنگیەکا مەزن ب ڤێ بسپۆریێ بهێتە دان. مە ل زانکۆیا دهۆک پلان هەنە ڤێ کۆلیژێ بگەهینینە ئاستەکێ دی، کو ببیتە ئەگەر ێ پێشڤەبرنا ڤی کەرتێ گرنگ ل دویڤ سیاسەتێن کابینەیا نەهێ یا حکومەتا هەرێمێ بۆ پێشڤەبرنا ڤی کەرتی، هەر ل سەر ڤی بنەمای، د پلان دایە زانکۆیا دهۆک ل گولانا داهاتی، لۆتکا چاندنێ ل هەرێما کوردستانێ ئەنجامبدەت".

سەرۆکێ سەندیکا ئەندازیارێن چاندنێ نێچیرڤان حازم، د ڤێ کۆمبوونێ دا سمینارەک ل دۆر کەتوارێ کەرتێ چاندنێ و چەوانیا پێشڤەبرنێ پێشکێشکر و تێدا ئەنجامێن راپرسیەکێ ل دۆر پرۆژێن هەیی د بوارێ چاندنێ دا و کاودانێن ئەندازیارێن چاندنێ پێشکێشکرن، پاشی پێشنیار و راسپاردێن سەندیکایێ ل دۆر پێشڤەبرنا ڤی کەرتێ گرنگ پێشکێشکرن.

سەرۆکێ زانکۆیا دهۆک باس ل گرنگیا هەبوونا پرۆژێن چاندنێ کر و دیارکر "پێدڤیە ئەم بشێین وەبەرهێنانێ د ڤێ کۆلیژێ دا بکەین و مە بەرهەمێن جودا بۆ جڤاکی هەبن، چونکی ئێمناهیا خۆراکی ئێکە ژ بنەمایێن پێشڤەچوونا وەلاتان، مە ل کوردستانێ ژی هەمی هۆکارێن پشتەڤان هەنە کو مە بەرهەمەکێ خۆمالی هەبیت و بشێین ببینە ژێدەرەکێ سەرەکی ژ پێدڤیێن خۆراکی، لەورا پێدڤیە مە پرۆژە ل گەل کەرتێن جودا هەبن".

هەر د ڤێ کۆمبوونێ دا، دانوستاندنێن ڤەکری ل دۆر کاروبارێن کارگێری، پرۆگرامێ خواندنێ، پێڤاژۆیا بۆلۆنیا و لایەنێ پێداگۆجی، خۆ گونجاندن دگەل بازارێ کاری، ستافێ ئەکادیمیێ کۆلیژێ، ژێرخانە و سەقایێ خواندنێ، ئاستێ قوتابیا و رێکێن پێشڤەبرنێ، چەوانیا بلندترکرنا کوالتیا دەرچوویان، خزمەتێن نڤیسینگەها شیرەتکاری، چەوانیا وەبەرهێنانێ و مفاوەرگرتن ژ کەرتێن جودا هاتنەکرن. ل دۆر ڤان تەوەران مامۆستایێن کۆلیژا ناڤبری بۆچوونێن جودا و پێشنیارێن پتر پێشڤەبرنێ پێشکێشکرن، ل دویماهیێ ژی پێنگاڤێن پرۆسێسا پتر پێشڤەبرنێ هاتنە پێشنیارکرن.

هەژی ئاماژێ یە کو بەری ئەنجامدانا ڤێ کۆمبوونێ، شاندەکێ سەرۆکاتیا زانکۆیا دهۆک ب سەرۆکاتیا د. داود سلێمان ئەتروشی سەرەدانەکا مەیدانی بۆ کۆلیژا زانستێن ئەندازیاریا چاندنێ ئەنجامدا بوو و ژ نێزیک هایدارێ کەتوارێ ڤێ کۆلیژێ ببوو و گوهداریا تێبینیێن مامۆستا و قوتابیان کر، سەرۆکێ زانکۆیا دهۆک بۆ قوتابی و مامۆستا و فەرمانبەران باس ل گرنگیا ڤێ کۆلیژێ کر و پلان و ستراتیژیێن زانکۆیا دهۆک بۆ پێشڤەبرنا ڤێ کۆلیژێ شرۆڤەکرن.

دهێتە زانین كۆلیژا زانستێن ئەندازیاریا چاندنێ‌ ل ٣١ـی چریا ئێکێ ١٩٩٢ هاتیە دامەزراندن، کو هەتا نوكە ٣٧٠٦ قوتابی ژێ‌ دەرچووینە و ١٣٥٩ قوتابی ژی نوکە ل قۆناغێن جودا یێن خواندنێنە. ئەڤ كۆلیژە ژ ١٠ پشكێن زانستی پێكدهێت، ئەوژی (پشكا بیستانكاری، پشكا بەرهەمێ گیانەوەری، پشكا دارستانێ، پشكا زانستێن ئاخ و ئاڤێ، پشكا پاراستنا رووەكی، پشكا دەرامەتێن كێلگەیی، پشكا گەشتیاری و تۆرزیما ژینگەهی و پشكا شیرەتكاریا چاندنێ و جڤاكێ گوندایەتی، پشکا زانستێن بنەکی و پشکا زانست و تەکنۆلۆژیا خوارنێ).

راگەهاندنا زانکۆیا دهۆک؛ ٢٦ـی کانوینا دووێ ٢٠٢٣

نڤێسین: عسمەت خابوور

وێنە: عەلی حەبیب و حسێن تتمی