سەرۆکێ زانکۆیا دهۆک دگەل قوتابیێن ئەندازیاریا بایۆمێدیکال کۆمبوو
Jan. 31, 2023, 2:50 p.m.

پشتی ٢١ قوتابیێن پشکا ئەندازیاریا بایۆمێدیکال ل کولیژا ئەندازیاری ل زانکۆیا دهۆک خواندنا خۆ ل وەلاتێ ئەلمانیا ب دویماهی ئینای و ڤەگەریاینە کوردستانێ، سەرۆکێ زانکۆیا دهۆک د. داود سلێمان ئەتروشی ئەڤرۆ رێکەڤتی ٣١ـی کانوینا دووێ ٢٠٢٣ کۆمبوونەک دگەل ئەنجامدا، ئەڤ کۆمبوونە ب مەرەما زانینا کاریگەریێن ڤێ ئەزمۆنێ بوویە و وەرگرتنا تێبینیێن وان بۆ پتر پێشڤەبرنا ڤی پرۆگرامی، ئەوێ ب هەڤکاری دگەل زانکۆیا تی. ئێچ. ئێم یا ئەلمانی و ب پشتەڤانیا رێکخراوا DAAD ل زانکۆیا دهۆک دهێتە ئەنجامدان.

د کۆمبوونێ دا و ب ئامادەبوونا د. جێمس حەسەدۆ هەیدۆ، راگرێ کولیژا ئەندازیاری و د. سالح مستەفا ئەتروشی، سەرۆکێ پشکا ئەندازیاریا بایۆمێدیکال، سەرۆکێ زانکۆیا دهۆک باس ل گرنگیا ڤی پرۆگرامی و ڤێ بسپۆریێ کر و دەستخۆشی ل قوتابیێن ناڤبری کر بۆ کار و خواندنا وان یا سەرکەڤتیانە ل وەلاتێ ئەلمانیا و گۆت "ئەم ب کار و شیانێن هەوە سەربلندین، هوین بالیۆزێن زانکۆیا دهۆک و هەرێما کوردستانێ بوون و هەوە ب سەرکەڤتیانە ئەڤ ئەرکە ئەنجامدا". سەرۆکێ زانکۆیێ هەروەسا سوپاسیا راگرێ کولیژێ و سەرۆکێ پشکا ناڤبری کر ژبەر کار و خزمەتێن وان بۆ سەرئێخستنا ڤێ پشکێ، ئەو یەکە ژی دیارکر کو د پلانا سەرۆکاتیا زانکۆیا دهۆک دایە ئەڤێ پشکێ پتر پێشڤەببەت ژ بەر پێدڤیا بازارێ کاری ب ڤێ بسپۆریێ.

ژ لایێ خۆ ڤە قوتابیێن پشکا ناڤبری باس ل ئەزمۆن و شارەزاییێن وان بۆ ماوێ نێزیکی سالەکێ ل زانکۆ و کۆمپانیێن ئەلمانی وەرگرتین، کر و ئەو یەکە دیارکر کو پشتی ڤێ ئەزمۆنێ گەلەک شیان و کارامەیی ل دەف پەیدابووینە، کو وەکو دەرئەنجام دێ شێن ب شێوەیەکێ گەلەک باشتر خزمەتا جڤاکی کەن ب رێکا کارکرنێ ل کەرتێن جودا.

هەر د کۆمبوونێ دا، د. جێمس حەسەدۆ هەیدۆ راگرێ کولیژا ئەندازیاری ل زانکۆیا دهۆک سوپاسیا سەرۆکێ زانکۆیا دهۆک کر بۆ پشتەڤانیا بەردەوام بۆ ڤی پرۆگرامێ کێم وێنە و گرنگ، و دابینکرنا ژێرخانا پێدڤی و هەروەسا هەڤدیتن و سەرەدانێن بەردەوام بۆ قوتابی و ستافێ ئەکادیمیێ ڤێ پشکێ.

دهێتە زانین پشکا ئەندازیاریا بایۆمێدیکا یا کولیژا ئەندازیاری ل سالا ٢٠١٨ـێ هاتیە دامەزراندن، وەکو پرۆگرامەکێ زانکۆیا دهۆک ب هەڤکاری دگەل زانکۆیا تی. ئێچ. ئێم. یا ئەلمانی، ب پشتەڤانیا رێکخراوا DAAD یا ئەلمانی، کو پشتی ڤێ سالا خواندنێ ئێکەم گەڕا قوتابیان دێ ژێ دەرچن و قوتابیێن پشکا ناڤبری سالا دویماهیێ ژ خواندنا خۆ ل وەلاتێ ئەلمانیا ئەنجامددەن.

راگەهاندنا زانکۆیا دهۆک؛ ٣١ـی کانوینا دووێ ٢٠٢٣

عسمەت خابوور

وێنە: عەلی حەبیب