ئاهەنگا گەرا 23 یا دەرچویێن زانکۆیا دهۆک ل یاریگەها دهۆک یاوەرزشى ب بەرهەفبوونا راوێژکارێ ئەنجوومەنێ ئاسایشا هەرێما کوردستانێ (مەسرور بارزانى) و سەرۆکێ زانکۆیا دهۆک و مامۆستا و قۆتابیێن دەرێوویێن زانکۆیى و کەس و کارێن قۆتابیان لژێر دروشمێ (بەرەڤ کوردستانەکا بهێز)هاتە گێران.
درى و رەسمێن ئاهەنگا دەرچوونێ دا سەرۆکێ زانکۆیا دهۆک، پ.د.مسلح محەمەدسەعید دهۆکى گۆت:" زانکۆیا دهۆک بەردەوام د پێشکەفتن و پێشڤەچوونێ دایە و کاروانێ زانست و زانین و وەرارێ رێیا خۆ بەرفرەه دکەت و چ ئاستەنگ نابنە رێگر ل هەمبەرى ڤێ رێبازا زانکۆیا دهۆک ل سەر دچیت، کو ئەو ژى پێشکێش کرنا خزمەتێن زانستى و رەوشەنبیرى و جڤاکى و پێگەهاندنێ یە و زانکۆیا دهۆک ڤێ ب ئەرکێ خۆ دبینیت و دێ یا بەردەوام بیت داکو (بەرەف کوردستانەکا بهێزتر) ڤە بچین کو ئەڤە مەکریە درووشم بۆ ڤێ گەرا دەرچوونێ یا قوتابیێن بەکالوریۆسێ".
سەرۆکێ زانکۆیێ خویاکر:" زانکۆیا دهۆک هەتا نوکە د 22 گەرێن دەرچوونێ دا نێزیکى 30 هزار قوتابى د پتر ژ 60 بسپۆریێن جودا دا ب باوەرنامە ئێخستینە و پێشکێشى جڤاکى و دام و دەزگەهێن حکومى و تایبەت کرینە، د ڤێ گەرا 23 یا دەرچوونێ دا دێ (4140) دەرچوویێن زانکۆیا دهۆک باوەرناما بەکالوریۆسێ ب پتر ژ 70 بسپۆریێن زانستى وەرگرن، کو ئەڤە نیشانەکا بەرچاڤە یا پێشڤەچوونا زانکۆیا دهۆک و شانازیەکا مەزنە بۆ زانکۆیا دهۆک کو سالانە ڤى خەلاتى پێشکێشى مالباتێن دەرچوویان دکەت و کور و کچێن وان ب باوەرنامە دئێخیت و دبنە هەلگرێن پەیاما زانست و زانینێ، ئەڤرۆ رۆژەکا دیروکى یە بۆ وە کو ب هەلکەفتا دەرچوونا وە زانکۆ ڤان رێورەسمان بۆ وە رێک دئێخیت، هەروەسا بۆ زانکۆیا دهۆک ژى دەرچوونا ڤێ هژمارا زۆرا قوتابیان د بسپۆرى و د بیاڤێن جودا دا و بکەڤنە د خزمەتا جڤاکى دا دەستکەفتەکێ مەزنە، لەورا ئەنجامدانا ڤان رێورەسمان نیشانا گرنگى پێدانا زانکۆیا دهۆکە ب خواندن و زانست و زانینێ و هەروەسا پویتە پێدانە ب وان کەسان یێن خۆ ماندى دکەن بۆ ب دەستڤەئینانا زانستى و ئاستێ خۆ یێ زانستى پێش د ئێخن".
پ.د. مسلح دهۆکى خویاکر:" زانکۆیا دهۆک هەردەم گرنکى دایە پێگەهاندنا بەرەبابێن نوى و گەنجێن ڤى وەلاتى داکو خزمەتا گەل و وەلاتێ خۆ بکەن، ببنە ئاڤاکەرێن ڤى وەلاتى، چونکو د ڤى دەمى دا پێدڤیە هەر کەس و لایەنەک یێ هاریکار بیت د بەرەف پێش برنا سازیێن ڤى وەلاتى و بکەینە شەنگستە و وەلاتێ خۆ ل سەر ئاڤا بکەین و کوردستانا خۆ بهێزتر بێخین، ئەڤرۆ کە ل هەمبەرى مالبات و کەس و کارێن وە دێ باوەرنامێن وە یێن زانستى پێشکێشى وە کەین، دێ بۆ وان دیار کەین کو مە سوزا خۆ ل گەل وان بجه ئینا و ئەڤرۆکە هوین یێن بووینە خودان باوەرنامە، هوین نوکە د بەرهەڤن ژ بۆ خزمەت کرنا کوردستانێ، چونکو کەسانێن وەکو وە گەنج و خودان باوەرنامە دڤێت ستوینێن ئاڤاکرنا وەلاتى بن بەرى هەر کەسەکى، هوین خەمخۆرێن ڤى وەلاتى بن، چونکو پاشەرۆژا ڤى وەلاتى یا گرێدایە ب وە ڤە، لەورا هەردەم دڤێت هوین خۆ ب خودانێن ڤى وەلاتى بزانن و ل گەل برایێن پێشمەرگە هوین ب زانستێ خۆ دهەڤ چەپەر بن داکو (بەرەف کوردستانەکا بهێزتر) پێنگاڤان بهاڤێژین، زانکۆیا دهۆک هەردەم بزاڤێن وێ ئەو بووینە پشتى قوتابى ژ زانکۆیێ دەردچن ب ئێکجارى ژ زانکۆیێ نەهێنە ڤەقەتیان و پەیوەندى هەر دگەل زانکۆیێ هەبیت، لەورا بەرى دوو سالان زانکۆیا دهۆک دەست ب دامەزراندنا تۆرا دەرچوویێن زانکۆیێ کربوو و ل گولانا ئەڤ سالە پرۆژێ تۆرا دەرچوویێن زانکۆیێ هاتە راگەهاندن، کو مەرەم ژێ ئەڤ تۆرە دەرگەهەک بیت هەردەم دەرچوویێن زانکۆیا دهۆک خۆ تێدا ببینن و ب رێکا ڤێ تۆرێ دەرچووى هەر زانکۆیێ ب مالا خۆ بزانن و هەست ب وێ چەندێ نەکەن کو ڤالاتیەک یا پەیدابووى و ژ زانکۆیێ هاتینە ڤەقەتیان.
دکتورى پتر ئاخفت:" هەر دەرچوویەکێ دهێتە تۆمار کرن ل ڤێ تۆرێ، دێ ئەکاونتەک بۆ هێتە چێکرن و ئەو دەرچووى دشێت پێزانینێن خۆ د وى ئەکاونتى دا بەلاڤ بکەت و بەردەوام نوى بکەت، کو ئەڤە ژى دێ یا هاریکار بیت بۆ دیتنا دەلیڤێن کارى و پشکدارى کرنێ د خۆلێن پێشخستنێ دا، زانکۆیا دهۆک ژ لایێ پەیوەندیان ڤە سالانە پێشڤەچوونێن بەرچاڤ ب خۆڤە دبینیت، چ ژلایێ رێککەفتێن زانستى ل گەل زانکۆ و ناڤەندێن ئەکادیمى یێن نێڤدەولەتى چ ژى ژ لایێ ڤەکرنا پشکێن زانستى یێن هەڤپشک ل گەل زانکۆیێن ناڤدارێن جیهانى، کو ئەڤە ژى دەستکەفتەکێ زانستى یە بۆ زانکۆیا دهۆک و ئەم شانازیێ پێ دبەین، بۆ نموونە ڤەکرنا پەیمانگەها چارەسەریا دەروونى و چارەسەریا تراومایێ ئەوا بەرى دوو سالان ب هەڤکارى دگەل وەزارەتا زانست یا ئەلمانى هاتیە دامەزراندن کو ئەڤ پەیمانگەهە یا ئێکێ یە ل رۆژهەلاتا ناڤین بۆ خاندنا ماستەرێ و ب پشتەڤانیا وەزارەتا زانست یا ئەلمانى هاتیە دامەزراندن و باوەرنامێن ڤێ پەیمانگەهێ دێ د هەڤپشک بن دناڤبەرا زانکۆیا دهۆک و زانکۆیا توبیگن یا ئەلمانى، هەوەسا مە پەیوەندى و بەرنامێن هەڤپشک د ناڤبەرا زانکۆیا دهۆک و زانکۆیێن ناڤدارێن جیهانى یێن هەین بۆ نموونە باوەرناما بەکالوریۆسا هەڤپشک دگەل زانکۆیا دۆرتمۆند یا ئەلمانى و دێ د بەردەوام بین ژى ل سەر زێدەکرنا ڤان بەرنامان چونکو مە ئەزموونەکا سەرکەفتى یا د ڤان بەرنامان دا هەى و گەلەک ژ ڤان بەرنامان بۆ جارا ئێکێ یە ل زانکۆیێن عیراقێ و هەرێما کوردستانێ دهێنە ئەنجام دان".
سەرۆکێ زانکۆیێ ئاماژە دا:" ب هەلکەفتا دەرچونا گەرا 23 ئەم وەکو زانکۆیا دهۆک سوپاسیا وان لایەنان دکەین کو بەردەوام ل گەل زانکۆیا دهۆک د هاریکار بووینە:
ـ سوپاسیەکا تایبەت بۆ جەنابێ سەرۆک مەسعود بارزانى بۆ پشتەڤانیا جەنابێ وى یا بەردەوام بۆ زانکۆیا دهۆک هەر ژ دامەزراندنێ و هەتا نوکە.
ـ سوپاسیەکا بێ سنوور بۆ سەرۆکێ حکومەتا هەرێما کوردستانێ کاک نێچیرڤان بارزانى ژ بۆ پشتەڤانیا وان یا بەردەوام بۆ زانکۆیا دهۆک.
ـ سوپاس بۆ پەرلەمان و حکومەتا هەرێما کوردستانێ و وەزارەتا خواندنا بلند و ڤەکۆلینێن زانستى، و پارێزگەها دهۆکێ ب هەمی دەزگەهێن وێ ڤە بۆ وێ هەماهەنگى و پشتەڤانیا وان ل گەل زانکۆیا دهۆک.
ـ سوپاس بۆ هەمى حزبێن کوردستانى و ب تایبەتى پارتى دیموکراتى کوردستان، بۆ هاریکارى و پشتەڤانیا وان یا بەردەوام بۆ زانکۆیا دهۆک.
ـ سوپاسیەکا تایبەت بۆ مامۆستا و فەرمانبەرێن زانکۆیێ بۆ ماندیبوون و رەنجا وان یا بێ سنوور کو ئەڤ قوتابیێن دەرچوویى ژ ئەنجامێ ماندیبوونا وان یا بەردەوام بوویە.
ـ سوپاس بۆ ئێکەتیا قوتابیێن کوردستانێ بۆ ماندیبوون و هاریکاریا وان یا بەردەوام و هەماهەنگیا وان ل گەل قوتابیان ل ناڤ زانکۆیى.
ل دووماهیێ د. مسلح راگەهاند:" پیرۆزباهیێ ل خەلکێ کوردستانێ ب گشتى و ڤێ دەڤەرێ ب تایبەتى دکەین ب دەرچوونا ڤێ هژمارا زۆر یا قوتابیان ژ زانکۆیا دهۆک و هەر وەسا پیرۆزباهیا کەس و کارێن ڤان دەرچوویان ژى دکەین، هیڤی خوازین شینا تبلێن دەرچوویێن مە ل هەمى دام و دەزگەهان بهێنە دیتن و رۆلەکێ بەرچاڤ د پێشڤەربرنا جڤاکێ کوردستانى دا بگێرن و ببنە سمبولێن وەلاتێ مە کو ئەڤرۆ گەلەک پێدڤى ب خودان شیانێن زانستى و تایبەتمەندیێن وان هەیە، وەکو یا دیار ئەم ل هەرێما کوردستانێ ل رۆژا 30/9/2018 دێ بەرەف سندوقێن هەلبژارتنا ڤە چین بۆ هەلبژارتنا نوینەرێن خۆ بۆ پەرلەمانێ کوردستانێ، لەورا داخازێ ژ هەمى قوتابى و دەرچوویێن زانکۆیێ دکەین بەرەف سندوقێن دەنگدانێ ڤە بچن و دەنگێ خۆ بدەنە وان لیست و کاندیدان ئەوێن هوین دزانن دێ خزمەتا وە کەن و مە بەرەف کوردستانەکا بهێزتر ڤە بەن، چونکو خەلکێ مە یێ ژ هەژیە کارێ باشتر بۆ بهێتە کرن، ئەگەر مە یێن خودان خەبات و سەربۆر کرنە نوینەرێن خۆ پشت راست دێ کارێ باشتر بۆ مە کەن، ئەگەر مە کاندیدێن لیستا ب سەدان شەهیدان کرنە نوینەرێن خۆ پشت راست ئەو خوینا وان شەهیدا گۆرى ئاخا ڤى وەلاتى کرى ب هەروە ناچیت و دێ یا بەرهەمدار بیت، چونکو دەمێ دەنگێ خۆ ددەین دڤێت وژدانا خۆ ئارام کەین و ب پشتراستى دەنگێ خۆ بدەین، زانکۆیا دهۆک ب هەلکەفتا گێرانا ڤان رێورەسمان سلاڤێن گەرم بۆ پێشمەرگێن قارەمانێن کوردستانێ دهنێریت ئەوێن ل چەپەرێن بەرخۆدانێ سەرکەفتنێن مەزن ب دەستڤە ئیناین و پارستنا ئاخا وەلاتێ مەدکەن، دەولە سەرێ وان ئەڤرۆ ئەم ب ئارامى ل کوردستانێ دژین، سەرێ رێز و نوازشێ ژى دچەمینین بۆ شەهیدێن کورد کوردستانێ وشەهیدێن بزاڤا رزگاریخوازا کوردستانێ و سەروەرێ وان بارزانیێ نەمر و کاک ئدریسێ هەردەم ساخ".
مەسرور بارزانی، راوێژکارێ ئەنجوومەنی ئاسایشا هەرێما کوردستان د پەیڤا خودا گۆت:" ئاهەنگا دەرچوونا قوتابیێن زانکۆیا دهۆکدا، پیرۆزباهی ل قوتابییان کر و هیڤیا سەرکەفتنی بۆ خواستن د قۆناخا داهاتیا ژیانێدا".
مەسرور بارزانی دگوتارا خودا بیرا قوتابیان ئیناڤە، کو ل سالا 1992 دەمێ زانکۆیا دهۆک هاتیە دامەزراندن، مەزنترین کێشە ئەوە بوو شیانێن دارایی نەبوو، لوى دەمى سەرۆکێ زانکۆیا دهۆک سەردانا سەرۆک بارزانی کر گۆتێ، ئەگەر شیانێن دارایى نەبن نەشێن زانکۆیێ سەربێخین، ژبەر هندێ جەنابێ سەرۆکى فەرمان کر ب داهاتیێ پارتى خەرجیا زانکۆیا دهۆک بکەن، کۆ ئەو پارە پێدڤى بوو ل حزبێ هاتبایە خەرجکرن بەلێ بۆ زانکۆیا دهۆک هاتە خەرجکرن و ئەڤى وێ رۆژێ زانکۆیا دهۆک دپێشکەفتنێ دایە.
دبوارى هەلبژاردنێن پەرلەمانێ کوردستانێدا، مەسرور بارزانی خویاکر:"چەند ڕۆژێن دیتر دێ رووبەرووی ئەزموونەکا ترى ژیانا خۆ بن، کو چارەنڤیسێ میللەتێ مە دێ دیار کەت و شێوازێ حکومەتا چوار ساڵێن داهاتى دیار کەت. دبیت هوون ببنە خودان ئەو بریارە کۆ باوەریا خۆ ب کێ ددەن، داکۆ حکومەتا نوو پێکبهینێن، دیسان دەنگێ خۆ بدەنە وان کەسێن چەندین سالە بەرەڤانى ژ ڤى وەلاتى کرى و ئەو کەسێن بەرگیرى ژ هەوە کرى، چاڤەریێ نە هوون پاداشت بدەن و باوەریێ پێبکەن ".
ل دووماهیێ هەمى قۆتابیان سوندا وەفاداریێ بۆ کار و وەلاتێ خۆ گۆت
راگەهاندنا زانکۆیا دهۆک: هەلز عەلى سەلیم