ل سەنتەرێ رەوشەنبیری یێ زانکۆیا دهۆک و ب ئامادەبوونا سەرۆکێ زانکۆیێ د. داود سلێمان ئەتروشی و هاریکارێ سەرۆکی بۆ کاروبارێن زانستی د. لوقمان هادی حەسەن و هژمارەکا ئەندازیار و بسپۆران، رێڤەبەریا ئەندازیاریا پرۆژان ل زانکۆیا دهۆک روینشتنەکا ڤەکری لدۆر پلانێن پێشڤەبرنا زانکۆیێ ژ لایێ ئەندازەیی ڤە ئەڤرۆ هاتە ئەنجامدان.
ل دەستپێکێ ئەندازیار حاجی ئیسماعیل شرۆڤەیەک دا دیرۆکا دروستبوونا زانکۆیا دهۆک و بەڕفرەهبوونا وێ، دیسان تۆپۆگرافیا ئەردێ کەمپێ و شێوازێ بەرفرەهکرنێ و نەخشێ ئاڤێ و ئاڤرێژان و تۆرێن ئینتەرنێتێ و کارەبێ و رێکوبانان.
ل دویڤ دا ئەندازیار سامان فەخرەددین ب درێژی باس ل چەندین پێشنیازان کر و هندەک ئاریشە و کێماسیێن هەیی دیارکرن و ئاماژەدا پاشەرۆژا زانکۆیێ ژ لایێ ئەندازەیی ڤە. ئەندازیار سامان هەروەسا دیارکر کو پێدڤیە جاددەیێن کەمپا زانکۆیێ ل دویڤ تۆپۆگرافیا وی جهی بهێنە دیزاینکرن و بازنێ هاتنوچوونێ بهێتە بەرفرەهکرن، هەروەسا گرنگە دوو دەرگەهێن دی بۆ کەمپێ بهێنە ڤەکرن بۆ کێمکرنا قەرەبالغێ و ئاسانکرنا هاتنوچوونێ، دیسان ژی ناڤبری باس ل گرنگیا هەبوونا جاددەکا کەمەری کر.
ژ لایەکێ دی ڤە، پاراستنا ژینگەهێ ئێک ژ تەوەرێن دی یێن ڤێ روینشتنێ بوو، د ڤی بواری دا باس ل بکارئینانا هێزا پاقژ هاتە کرن، ب تایبەتی مفاوەرگرتن ژ تیژکا رۆژێ بۆ دابینکرنا کارەبێ، کو نوکە پرۆژەکێ دوو مێگاواتی یێ ب ڤی شێوەی ل ناڤ کەمپا زانکۆیا دهۆک دهێتە دروستکرن. هەروەسا رێکێن سەرەدەریکرنا سەردەمیانە دگەل ئاڤا پویس و بەرمایکان.
ژ لایێ خۆ ڤە د. داود سلێمان ئەتروشی سەرۆکێ زانکۆیا دهۆک ئاماژەدا رۆلێ ئێکەم سەرۆکێ زانکۆیا دهۆک رێزدار د. عسمەت محەمەد خالد، کو دامەزرێنەرێ زانکۆیا دهۆکە، د ئاڤاکرنا ژێرخانا سەرەکیا زانکۆیا دهۆک دا و سوپاسیێن خۆ بۆ دامەزرێنەرێ زانکۆیا دهۆک ئاراستەکرن. سەرۆکێ زانکۆیا دهۆک دیسان پشتەڤانیا خۆ بۆ رێڤەبەریا ئەندازیاریا پرۆژان ل زانکۆیا دهۆک دیارکر و گۆت "پێشڤەبرنا زانکۆیا دهۆک ئەرکێ مە هەمیانە". دیسان سەرۆکێ زانکۆیێ باس ل زێدەگاڤیێن ل سەر ئەردێ زانکۆیێ کر و جەخت ل سەر وێ یەکێ کر کو پێدڤیە ئەڤ ئاریشە چارەسەرببن.